A faaite i te parau mau ma te au noa

1. Eaha te rave no te riro ei mero no te utuafare o Iehova?

IA FAREREI tatou i te hoê Ite no Iehova, tera te uiraa matamua e hiti mai: “Mea nafea oe i te iteraa i te parau mau?” E pahono mai vetahi “ua paari ratou i roto i te parau mau.” E parau mai te tahi atu “mea apî ratou i roto i te parau mau.” Te faaite ra teie mau pahonoraa e ua ohipa te parau mau i roto i to ratou oraraa. No te aha? Ua ite hoi tatou e no te riro ei mero no te utuafare o Iehova, mea faufaa ia here i te parau mau e ia ora ia au i te reira. E titau-atoa-hia ia faaite tatou i te haerea afaro i roto i ta tatou mau parau e ohipa.—Sal. 15:1-3.

2. (1) Eaha te manaˈo o te taata no nia ia Iesu? (2) Mai te aha te huru o te taata i ta ˈna mau haapiiraa?

² Ua faaite noa Iesu i te parau mau. Noa ˈtu aita to ˈna mau enemi i au i ta ˈna mau parau, ua farii ratou e taata parau mau o ˈna. (Mat. 22:16) Ua faaite Iesu i ta ˈna mau pǐpǐ mai te aha te huru o te taata i ta ˈna mau haapiiraa. Ua parau oia: “Ua haere mai hoi au e faatupu i te amahamaha, e patoi te tamaiti i to ˈna metua tane, te tamahine i to ˈna metua vahine, e te hunoa vahine i to ˈna metua vahine hoovai.” (Mat. 10:35) Aita Iesu i hinaaro ia patoi mai te taata i ta ˈna poroi, ua taa râ ia ˈna e ere pauroa te farii i ta ˈna mau haapiiraa. (Mat. 23:37) Ua ite o ˈna e piti huru to te taata no nia i ta ˈna poroi. Te vai ra o te here i te parau mau Bibilia e te vai ra eita.—Tes. 2, 2:9-11.

3. Eaha ta tatou e hiˈopoa i roto i teie tumu parau?

³ Mai ia Iesu, e tutava tatou i te faaite i te haerea afaro ma te faaite i te parau mau i te mau taime atoa, noa ˈtu eita te taata e au mai ia tatou. E poro e e haapii tatou i te parau mau noa ˈtu e patoi mai vetahi. Te auraa anei ïa aita e faufaa ia haapao e nafea tatou ia faaite i te parau mau aore ra i teihea taime tatou e na reira ˈi? Eita! I roto i teie tumu parau, e pahono na mua tatou i teie uiraa: Ihea tatou e ite ai i te parau mau? I muri iho, e hiˈopoa tatou i teie uiraa: No te aha, e nafea, e i teihea taime tatou e faaite ai i te parau mau Bibilia? E tauturu mai te pahonoraa ia haamaitai i ta tatou huru paraparau, oia hoi ia poro i te taata ma te tano e i te taime tano.

IHEA TATOU E ITE AI I TE PARAU MAU?

4. No te aha o Iehova te Tumu o te parau mau?

⁴ O Iehova te Tumu o te parau mau. Te auraa, e parau mau anaˈe ta ˈna e faaite. Ei hiˈoraa, mea papu ta ˈna i faahiti no nia i te maitai e te ino. (Sal. 19:9; 119:​142, 151) Te mau mea atoa ta ˈna i fafau no a muri aˈe, e tupu iho â. (Isa. 55:​10, 11) E tapea noa o ˈna i ta ˈna mau parau fafau. (Num. 23:19) E ore atoa e tia ia Iehova ia haavare. (Heb. 6:18) E tumu papu ïa ia piihia o ˈna “te Atua parau mau.”​—Sal. 31:5.

5. No te aha e ere mea fifi ia ite o vai “te Atua parau mau”? A faataa na. (Ohipa 17:27)

⁵ Te parau ra te tahi mau taata e mea fifi ia ite o vai Iehova, “te Atua parau mau.” Mea hape râ to ratou manaˈo. Te haaatihia ra tatou i te mau haapapuraa e Atua mau Iehova, na roto ïa i te mau mea atoa ta ˈna i poiete. (Roma 1:20) I to Paulo paraparauraa i te hoê pǔpǔ maramarama no Ateno, ua parau o ˈna te hinaaro ra te Atua ia ‘imi tatou ia ˈna, aita hoi oia i atea ia tatou tataitahi.’ (A taio i te Ohipa 17:27.) Oia mau, e faafatata mai Iehova ia ˈna ra i te taata haehaa o te imi ra i te parau mau.—Ioa. 6:44.

6. A faahiti na i te tahi pue parau mau o te Bibilia, e a faataa na no te aha oe e mauruuru roa ˈi i te iteraa i te parau mau.

⁶ Hoê ravea e ite ai tatou o vai Iehova, o te haapiiraa ïa i te Bibilia. Ua arataihia te mau tane tei papai i teie buka e te varua moˈa o te Atua. (Pet. 2, 1:20, 21) E parau mau anaˈe ïa to roto i te Bibilia, e nehenehe e tiaturihia. Ei hiˈoraa, e tiaturi tatou i te faataaraa horoahia no nia i te haamataraa o te ao nui e te tumu o te ora. (Gen. 1:1, 26) Mea papu tei faataahia no nia i te tumu tatou e hara ˈi, e mauiui e e pohe ai. (Roma 5:12; 6:23) E parau mau atoa ia parauhia e faaohipa Iehova i ta ˈna Tamaiti no te faaore i te mau mauiui atoa ta Satani “te metua no te haavare” i faatupu. (Ioa. 8:44; Roma 16:20) E nehenehe tatou e tiaturi i teie mau parau fafau: E haamou Iesu i te feia ino, e faatia mai i te feia pohe, e faaapî i te fenua e e aratai o ˈna i te taata i te tia-roa-raa. (Ioa. 11:25, 26; Ioa. 1, 3:8) Auê ïa haamaitairaa ta Iehova e horoa mai! Ua faaite mai o ˈna i te parau mau e e faaohipa o ˈna ia tatou no te haapii i te reira ia vetahi ê.—Mat. 28:19, 20.

TE TUMU TATOU E FAAITE AI I TE PARAU MAU

7-8. Mea faufaa anei te tumu e faaite ai tatou i te parau mau? A horoa i te hoê hiˈoraa. (Mareko 3:11, 12) (A hiˈo atoa i te hohoˈa.)

⁷ Mai tei faahitihia na mua ˈtu, mea faufaa ia faaite i te parau mau no te riro ei mero no te utuafare o Iehova. Teie nei râ, no te faaoaoa ia ˈna, e titauhia ia rave hau atu â tatou. Mea faufaa no Iehova te tumu tatou e faaite ai i te parau mau. A feruri na i tei tupu a haere mai ai Iesu e poro i te fenua nei. (A taio i te Mareko 3:11, 12.) A poro ai o ˈna i te miti no Galilea, e nahoa taata tei putuputu mai ati aˈe ia ˈna. I rotopu ia ratou te vai ra ua uruhia e te demoni, e ua tipapa ratou i mua ia ˈna a parau atu ai ma te reo puai: “O te Tamaiti a te Atua oe.” No te aha te mau demoni i na reira ˈi? Ua hinaaro ratou ia tiaturi te feia e faaroo ra ia ratou, e i muri iho ia faaatea ê mai teie mau taata ia Iehova. Ua faaite te mau demoni i te parau mau no te faatupu noa râ i to ratou mau hinaaro miimii. Ua taa râ ia Iesu te reira, e aita roa ˈtu o ˈna i au. No reira oia i faaue ai i te mau demoni eiaha e poro no nia ia ˈna.

⁸ Eaha te haapiiraa ta tatou e huti mai? Mea faufaa no Iehova te tumu tatou e faaite ai i te parau mau. Mea faufaa ia haapii tatou i te taata ma te here e te aau haavare ore. E ia aruehia tatou no ta tatou e rave nei, e faahoˈi tatou i te hanahana ia Iehova ra.—Mat. 5:16; a hiˈo atoa i te Ohipa 14:12-15.

9. Eaha ta tatou e ore e rave, e no te aha?

⁹ Teie te tahi atu tupuraa no te haaferuri ia tatou ia ore e imi i te hanahana. Ua faaite mai te hoê matahiapo i te tahi parau apî ia tatou. I muri iho, ua faatia ˈtu tatou i te tahi mau taata. Ia ratou i faaroo e mea tano iho â ta tatou i faatia, ua faahiahia roa ratou ia tatou a manaˈo atu ai mea rahi te parau apî ta tatou i ite. Parau mau, ua faahiahia roa ratou ia tatou, e ere râ tera te manaˈo o Iehova. (Mas. 11:13) No te aha? Noa ˈtu mea papu ta tatou i parau, e ere mea tano na tatou e faaite ia vetahi ê. E ere atoa mea tano te tumu i hinaaro ai tatou e haapurara i teie parau.

E NAFEA IA FAAITE I TE PARAU MAU?

10. E nafea outou ia faataa i te auraa o te taˈo “parau nehenehe”? (Kolosa 4:6)

¹⁰ A taio i te Kolosa 4:6. Ua haamanaˈo Paulo i te mau Kerisetiano no Kolosa i te faufaaraa ia faahiti noa i te mau “parau nehenehe.” Eaha ïa te auraa? Te auraa o te taˈo Heleni tei faaohipahia i ǒ nei, o te tautururaa ïa ia vetahi ê na roto i ta tatou mau parau, e te faufaaraa ia faahiti i te mau parau maitatai e te au ia faaroo.

11-12. No te aha mea faufaa ia haapao maitai ia haapii tatou i te Bibilia? A horoa i te hoê hiˈoraa. (A hiˈo atoa i te hohoˈa.)

¹¹ E titauhia ia faahiti tatou i te mau parau nehenehe ia haapii tatou i te Bibilia ia vetahi ê. Te faaau atoa ra te Bibilia i te pue parau mau i te hoê ˈoˈe mea oi maitai o te nehenehe e faataa ê i te rapaeauraa o te taata e to ˈna rotoraa. Te auraa, e nehenehe te Bibilia e faaite eaha mau na to roto i to tatou feruriraa e aau. (Heb. 4:12) Ia ore râ tatou e faaohipa maitai i te Bibilia, e nehenehe tatou e haamauiui ia vetahi ê, e e faatupu i te tatamaˈiraa faufaa ore. E nafea ïa?

¹² A feruri na i teie tupuraa. I roto i te pororaa, e farerei tatou i te hoê tane aau maitai o te pure tamau ra i te mau hohoˈa. Mea au atoa na ˈna e faatupu i te oroa Noela e te Pakate e to ˈna utuafare. Ma te faaohipa i te Bibilia, e nehenehe tatou e faataa ia ˈna e mea faufaa ore ia pure i te mau tii pohe. Aore ra e haapapu tatou ia ˈna e aita te oroa Noela e te Pakate e tuati ra i ta te Bibilia e haapii ra. (Isa. 44:14-20; Kor. 2, 6:14-17) Ia na reira tatou i te farereiraa matamua, ua faaite iho â tatou i te parau mau. Tera râ, aita tatou i faaohipa maitai i te Parau a te Atua.

13. E nafea tatou ia tamiti i ta tatou mau parau?

¹³ Ua parau atoa Paulo mea faufaa ia tamitihia ta tatou mau parau. Aita o ˈna i parau ia taviri aore ra ia huna i te parau mau. Ua faaitoito râ o ˈna ia “tamitihia” ta tatou mau parau ia nehenehe te taata e farii i te parau mau. (Ioba 12:11) E ere paha i te mea ohie. No nia i te parau o te maa, e manaˈo paha tatou e au mai te taata ia tamitihia te maa mai ta tatou e hinaaro. Hoê â huru no ta tatou mau parau. E manaˈo paha tatou e mea au na te taata atoa ta tatou huru paraparau. E ere râ! Ei hiˈoraa, i te tahi mau fenua ia faaite te taata i to ratou manaˈo, mea haere afaro noa. E na reira atoa ratou i nia i te feia paari. I te tahi râ mau fenua, e huru ê ïa te taata i tera huru paraparau, eita ratou e afaro mai. Ua parau Paulo mea faufaa ia ite tatou “e nafea ia pahono i te taata tataitahi.” No reira, eita tatou e tamiti i ta tatou mau parau ia au i to tatou hinaaro aore ra te peu tumu i ǒ tatou, ia au râ i te feia e faaroo mai ra.

I TEIHEA TAIME E FAAITE AI I TE PARAU MAU?

14. Ua haapii anei Iesu pauroa ta ˈna i ite i ta ˈna mau pǐpǐ? A faataa na.

¹⁴ Ua tamau Iesu i te paraparau e i te haapii e rave rahi parau mau i ta ˈna mau pǐpǐ ma te hamani maitai. (Mar. 6:34) Teie râ, mea rahi â te haapiiraa e titauhia ia ite ratou. Aita Iesu i faaite atu i te mau mea atoa ta ˈna i ite. Ua haapao râ o ˈna i ta ratou e nehenehe e apo mai. Ua taa ia ˈna e ere tera te taime tano no te haapii ia ratou i te tahi atu pue parau mau. No reira o ˈna i parau ai eita e taa ia ratou i teie nei. (Ioa. 16:12) Eaha te haapiiraa no tatou?

15. Mea tano anei ia haapii tatou i te mau piahi pauroa ta tatou i ite? A faataa na. (Maseli 25:11) (A hiˈo atoa i te hohoˈa.)

¹⁵ Te faaite ra te hiˈoraa o Iesu e te iteraa i te parau mau, e ere ïa te haapiiraa ia vetahi ê pauroa ta tatou i ite. E nafea ia pee i to ˈna hiˈoraa? Mea faufaa ia feruri tatou i to vetahi ê tupuraa. E rave faahou tatou i te hiˈoraa o te tane mea au na ˈna e faatupu i te Noela e te Pakate e to ˈna utuafare. Ua ite tatou nohea mai teie mau oroa e eita roa ˈtu te Atua e farii i te reira. A feruri na e ua haamata tatou i te faatere i ta ˈna haapiiraa piti hebedoma hou te Noela. E taime tano anei teie no te faataa ia ˈna i ta te Bibilia e parau ra no nia i tera oroa? Mea tano anei ia parau roa ˈtu tatou ia ˈna ia faaea i te faatupu i te Noela? Parau mau, e nehenehe te tahi mau piahi e faaohipa oioi i ta ratou e haapii ra. No vetahi râ, e titauhia te taime no te rave i te tahi mau tauiraa. E nehenehe tatou e tauturu i ta tatou mau piahi ia haere i mua i te pae varua ma te faaite atu eaha te rave i te taime tano, te taime ïa ua ineine ratou no te reira.—A taio i te Maseli 25:11.

16. E nafea outou e tauturu ai i te mau piahi ia ‘pee noa i te parau mau’?

¹⁶ Aita ˈtu oaoa maori râ te tautururaa i te taata ia ite i te parau mau! E nehenehe tatou e tauturu ia ratou ia ‘pee noa i te parau mau.’ E nafea ïa? Ma te tamau i te horoa i te hiˈoraa maitai. (Ioa. 3, 3, 4) A faaite na roto i to outou huru oraraa e te tiaturi ra outou i te mau parau fafau o te Bibilia. A faaite i te parau mau ma te aau haavare ore. A faaite i te mau parau nehenehe e te hamani maitai i te taime tano ia haapii outou i te Bibilia ia vetahi ê. A faahoˈi i te hanahana ia Iehova ra. A na reira ˈi, e faaite outou e te haamori ra outou ia Iehova, te Atua parau mau.