Te hau noa ˈtu te tamaˈi e te faahuehueraa

“Hou vau a haapii ai i te Bibilia, aita vau i ite no te aha e uˈana ˈi te ohipa ino, te ohipa tano ore, e te fifi i roto i teie nei ao. I teie nei râ, topa te hau. Ua haapii hoi au e haamau te Atua ra o Iehova i te hau ati aˈe te ao nei.” Na Gary, e faehau o ˈna na mua ˈˈe, i faahiti i teie mau parau.

Tera atoa te manaˈo o te tahi atu mau taata. E ite mai oe mea nafea te Bibilia i te tautururaa ia ratou.

TE PARAU RA TE BIBILIA: “Mea maitai hoi oe e Iehova, e ua ineine i te faaore i te hara.”—Salamo 86:5.

TAUTURU: “Te haapapu mai ra teie irava e Atua aroha hamani maitai Iehova. Ua papu ia ˈu e ua ineine o ˈna i te faaore i ta ˈu mau hara atoa i rave a haere ai au i te tamaˈi.”—Wilmar, no Colombie.

TE PARAU RA TE BIBILIA: “Inaha hoi, te poiete nei au i te raˈi apî e te fenua apî. E eita to mutaa iho ra mau mea e haamanaˈohia, eita atoa te reira e faahoruhoru i to ratou aau.”—Isaia 65:17.

TAUTURU: “E hepohepo e e ahoaho iti rahi to ˈu no ta ˈu i faaruru i te tamaˈi. Te haamanaˈo mai ra râ teie irava fatata Iehova i te faaore roa i to ˈu mau manaˈo horuhoru e to ˈu mau moemoeâ riaria. E moˈe roa ia ˈu te reira. Topa te hau!”—Za⁠firah, no Marite.

TE PARAU RA TE BIBILIA: “E tupu ruperupe mai te feia parau-tia i to ˈna mau mahana. E rahi roa te hau e moˈe noa ˈtu te avaˈe.”—Salamo 72:7.

TAUTURU: “Pinepine au i te manaˈo i teie irava. Mea riaria roa te tamaˈi, fatata râ te reira i te mou. Eita ïa tatou e haapeapea faahou no to tatou mau taata here.”—Oleksandra, no Ukraine.

TE PARAU RA TE BIBILIA: “E ora faahou mai to oe feia pohe. . . . A ara e a umere, outou to te repo!”—Isaia 26:19.

TAUTURU: “Ua pohe te rahiraa o to ˈu fetii i te rima o te feia tei imi i te haapohe i te mau Tutsi. Te haapapu mai ra râ teie irava e farerei faahou vau ia ratou. Te tiai ru nei au i te faaroo ia ratou ia umere i te oaoa ia faahoˈihia mai ratou i te ora!”—Marie, no Rwanda.

TE PARAU RA TE BIBILIA: “Tau taime â, e aita faahou te feia ino. . . . E fatu râ te feia mǎrû i te fenua, e e au roa ratou i te rahi o te hau.”—Salamo 37:10, 11.

TAUTURU: “Noa ˈtu ua oti te tamaˈi, te vai noa ra te mau ohipa tano ore e te feia ino. Ua tamahanahana mai râ teie irava ia ˈu. Inaha, te ite ra Iehova i te mau mea atoa, e te taa ra ia ˈna to ˈu tupuraa. Fatata o ˈna i te faaore i te ino atoa, ta ˈna ïa i fafau.”—Daler, no Tadjikistan.

E Ite no Iehova te feia tei faahitihia i roto i teie vea, e mirioni ratou o te fanaˈo ra i te hau maoti te Bibilia. Ua haapii hoi ratou eiaha e hae i te taata no te tahi atu mau nunaa, opu aore ra fenua. (Ephesia 4:31, 32) Aita te mau Ite no Iehova e faaô nei i roto i te poritita e te faahuehueraa.—Ioane 18:36.

Te tauturu atoa nei te mau Ite no Iehova te tahi i te tahi. E fetii taeae ratou e here nei te tahi i te tahi. (Ioane 13:35) Ta Oleksandra ïa, tei faahitihia na, e haapapu ra. I faarue na hoi raua to ˈna tuahine i to raua fenua no te tamaˈi. Te na ô ra o ˈna: “I to mâua iho â taeraa ˈtu i ǒ mai, ua ite atu mâua i te mau Ite no Iehova e tiai noa mai ra. Ua tauturu mai ratou ia mâua i roto i to mâua oraraa i to ratou fenua.”

Te titau manihini nei matou ia oe ia haere i ta matou mau putuputuraa. I reira hoi matou e haapii ai i te faatupu i te hau mai ta te Bibilia e faaue ra. A haere na i nia i te reni natirara jw.org, e ite ïa oe i te vahi piri roa i ǒ oe e putuputu ai matou, e nehenehe atoa oe e ani i te hoê haapiiraa Bibilia tamoni ore e te hoê Ite no Iehova i nia i te buka rairai Ia ora oe e a muri noa ˈtu!