Uiraa a te feia taio
Eaha te auraa o teie mau parau a Iesu: “Eiaha e manaˈo ua haere mai au e hopoi i te hau”?
Ua haapii Iesu i te taata ia faatupu i te hau. I te hoê taime, ua parau o ˈna i ta ˈna mau aposetolo: “Eiaha e manaˈo ua haere mai au e hopoi i te hau i te fenua nei. Aita vau i haere mai e hopoi i te hau, i te ˈoˈe râ. Ua haere mai hoi au e faatupu i te amahamaha, e patoi te tamaiti i to ˈna metua tane, te tamahine i to ˈna metua vahine, e te hunoa vahine i to ˈna metua vahine hoovai.” (Mat. 10:34, 35) Eaha râ te auraa o tera mau parau a Iesu?
Aita Iesu i hinaaro ia amahamaha te hoê utuafare. Ua ite râ o ˈna e, no ta ˈna mau haapiiraa e tupu te amahamaharaa i roto i te mau utuafare. Eita ïa te feia e hinaaro ra e riro ei pǐpǐ na te Mesia a bapetizo atu ai ia ratou e maere aita anaˈe to ratou fetii e mauruuru i te faaotiraa ta ratou i rave. E nehenehe te patoiraa a te hoê hoa faaipoipo aore ra te tahi atu mero utuafare, e riro ei fifi no te Kerisetiano ia pee noa i te mau haapiiraa a te Mesia.
I roto i te Bibilia, te faaitoitohia ra te mau Kerisetiano ia “parahi hau noa e te taata atoa.” (Roma 12:18) I roto râ i te tahi mau utuafare, e nehenehe te mau haapiiraa a Iesu e riro mai te ˈoˈe ra te huru. E tupu te reira, ia farii te hoê mero utuafare i te mau haapiiraa a Iesu, area te tahi atu mau mero, eita ratou e farii e e patoi ratou i te reira. I tera taime ïa taua mau mero utuafare ra e riro ai ei “enemi” no te taata e haapii ra i te parau mau.—Mat. 10:36.
No te mau pǐpǐ a te Mesia e ora ra i roto i te hoê utuafare amaha i te pae faaroo, e ere roa ˈtu i te mea ohie, no te mea e titauhia ia ratou ia maiti o vai ta ratou e hinaaro e faaoaoa, o Iehova e o Iesu anei aore ra to ratou mau fetii. Ei hiˈoraa, e faahepo mai paha te fetii ia faatupu i te mau oroa aita e niu Bibilia. Na te Kerisetiano tataitahi ïa e faaoti o vai ta ˈna e hinaaro e faaoaoa. Ua parau Iesu: “Te taata mea here aˈe na ˈna i to ˈna metua tane aore ra to ˈna metua vahine ia ˈu nei, e ore ïa e tia ia ˈna ia riro ei pǐpǐ na ˈu.” (Mat. 10:37) Aita Iesu i parau e e titauhia i te feia e haapii ra i te parau mau ia faaea i te here i to ratou mau metua. Maoti râ te mau haapiiraa a Iesu e nehenehe ai hoê taata e faaoti eaha te mea faufaa roa ˈˈe i roto i to ˈna oraraa. Noa ˈtu e patoi mai te hoê fetii no te mea te tutava nei tatou i te tavini ia Iehova, e here noa iho â tatou ia ˈna. Tera râ, o Iehova ta tatou e tuu na mua roa i roto i to tatou oraraa.
Mea mauiui mau ia patoi mai te fetii. E haamanaˈo râ te mau pǐpǐ a Iesu i teie mau parau: “Tei ore e hinaaro e amo i ta ˈna pou haamauiuiraa e e pee mai ia ˈu, e ore ïa e tia ia ˈna ia riro ei pǐpǐ na ˈu.” (Mat. 10:38) Te auraa ïa, ia hinaaro te hoê taata e riro ei pǐpǐ na Iesu e farii atoa o ˈna ia haamauiuihia o ˈna. E tiaturi papu râ o ˈna e na roto i to ˈna hiˈoraa e nehenehe to ˈna mau fetii e farii i te parau mau i te hoê mahana.—Pet. 1, 3:1, 2