Ua ite anei oe?

E farii anei to Roma ia fanaˈo te hoê taata ta ratou i haapohe i nia i te pou i te hoê hunaraa, mai tei ravehia no Iesu?

E RAVE rahi tei ite maitai i te aamu o Iesu patitihia i nia i te hoê pou e e piti taata ino tei pihai iho ia ˈna. (Mat. 27:35-38) Ua manaˈo râ vetahi e ua hape te Bibilia i te parauraa ua faaineinehia te tino pohe o Iesu no te hunaraa e ua tuuhia i roto i te menema.—Mar. 15:42-46.

Te feaa ra vetahi i te mau Evanelia no te mea no ratou, aita te taata haapohehia e nehenehe e fanaˈo i te hoê hunaraa, oia atoa i te tahi menema. Te manaˈo ra ratou e mea ê te huru raveraa a to Roma i nia i te hoê taata ino. Te faataa ra te taata papai vea Ariel Sabar i tera manaˈo: “Ua riro te faasatauroraa ei faautuaraa no te feia ino mau o te hoê nunaa. No vetahi aivanaa, mea maamaa ia manaˈo e e horoa to Roma i te hoê hunaraa tano i te feia ta ratou i haapohe.” (Te vea Smithsonian) Ua hinaaro to Roma e faahaama roa i te feia ino faautuahia. Pinepine ratou i te vaiiho i te tino pohe i nia i te pou ei maa na te mau animara. I muri iho, e faarue ratou i te toea i roto i te hoê apoo.

Mea ê râ tei itehia maoti te mau maimiraa ihipǎpǎ no nia i te haapoheraa o te tahi mau ati Iuda. I 1968, ua itehia hoê toea ivi o te tahi taata tei haapohehia i te senekele matamua. Ua tuuhia te reira i roto i te hoê afata vairaa ivi e ua hunahia i roto i te hoê menema fetii ati Iuda i pihai iho ia Ierusalema. I roto i te mau toea ivi, ua itehia te hoê ivi poro avae. Ua patitihia te reira i nia i te hoê tapu raau e te hoê naero 11,5 tenetimetera te roa. Te parau ra Sabar: “Na te hoê tane o Yehochanan te iˈoa, te poro avae itehia. Ua faaite te reira no te aha tatou e nehenehe ai e tiaturi i te aamu o te mau Evanelia no nia i te hunaraa o Iesu i roto i te hoê menema.” Hau atu, “e haapapuraa te poro avae o Yehochanan e ua farii to Roma ia hunahia te hoê ati Iuda haapohehia i nia i te hoê pou, mai tei ravehia i te tau o Iesu.”

A ite ai i te ivi o tera poro avae, e rave rau manaˈo tei faahitihia no nia i te huru patitiraa i te tino o Iesu i nia i te pou. Te mea papu râ, ua fanaˈo te tahi mau taata ino i te hoê hunaraa e aita ratou i faarue-noa-hia i roto i te hoê apoo. E nehenehe ïa e tiaturi i ta te Bibilia e parau ra no nia i te tino o Iesu. Maoti te haapapuraa ihipǎpǎ, ua tano te Bibilia i te parauraa ua faaineinehia te tino pohe o Iesu no te hunaraa e ua tuuhia i roto i te menema.

Hau atu, ua tohu Iehova e e hunahia Iesu i roto i te menema o te hoê taata taoˈa rahi. E tupu iho â te parau a te Atua e aita hoê aˈe taata e nehenehe e patoi i te reira.—Isa. 53:9; 55:11.