E hopoi mai anei te haapiiraa teitei e te moni i te hoê a muri aˈe papu?

E rave rahi te manaˈo ra e no te fanaˈo i te hoê a muri aˈe papu, e titauhia ia haere i te haapiiraa teitei e ia riro ei taata moni. Te tiaturi nei ratou e nehenehe te haapiiraa teitei e tauturu i te hoê taata ia riro ei rave ohipa, ei mero utuafare e ei taata maitai. Hau atu â, te manaˈo ra ratou e fanaˈo ratou i te hoê ohipa aufau-maitai-hia, te moni e te oaoa.

TE FAAOTIRAA A E RAVE RAHI TAATA

Teie ta Zhang Chen, te hoê tane no Taina i parau: “Ua manaˈo vau e ia noaa ia ˈu te mau parau tuite teitei, eita vau e veve faahou e maoti te hoê ohipa aufau-maitai-hia, e fanaˈo vau i te hoê oraraa au mau e te oaoa.”

No te fanaˈo i te hoê oraraa papu, mea rahi te haere ra i te mau haapiiraa teitei tuiroo noa ˈtu tei te fenua ê. Ua na reira te rahiraa tae roa ˈtu i te mau taime opaniraa no te maˈi pee COVID-19. I 2012, ua tapao te hoê taiete titorotororaa, i roto i te mau piahi atoa e haere ra i te haapiiraa teitei i te fenua ê, e 52 piahi i nia i te hanere no Asia mai ratou.

E haapaeraa rahi ta te mau metua e rave ia nehenehe ta ratou mau tamarii e haere i te fenua ê no te haapiiraa teitei. Te faatia ra Qixiang, te hoê tane no Taïwan: “E ere to ˈu na metua i te taata moni. E maha tamarii matou, ua haere râ matou pauroa i te haapiiraa teitei i Marite.” Mai e rave rahi utuafare, ua tarahu ratou e rave rahi moni no te aufau i te reira.

E HOPOI MAI ANEI TE HAAPIIRAA TEITEI I TE HOÊ A MURI AˈE PAPU?

Ua rohirohi roa te hoê potii e te hepohepo ra o ˈna i mua i ta ˈna matini roro uira i te maororaa po. — E rave rahi tei ore i oaoa mau noa ˈtu e parau tuite e e taoˈa rahi ta ratou

E nehenehe te haapiiraa e haamaitai i te oraraa. Aita râ te reira e tupu noa mai ta te mau piahi e manaˈo ra. Ei hiˈoraa, i muri aˈe e rave rahi matahiti haapaeraa e tarahuraa i te moni, aita te rahiraa i fanaˈo i te ohipa ta ratou i hinaaro noa na. I roto i te hoê vea no Singapour, ua papai Rachel Mui: “Te rahi noa ˈtu ra te piahi e parau tuite ta ratou, aita râ ta ratou e ohipa.” Te ora ra Jianjie i Taïwan e e rave rahi parau tuite ta ˈna. Te na ô ra o ˈna: “Aita te farii nei e te vai ra te tahi mea faufaa aˈe i te haapiiraa teitei e te moni e ravea. Noa ˈtu ta ratou parau tuite, e farii noa ratou i te ohipa na mua mai.”

No te feia tei fanaˈo i te ohipa ta ratou i hinaaro mau, aita te mau mea i tupu mai ta ratou i opua. Teie te hiˈoraa o Niran tei haere i te haapiiraa teitei i Beretane. I to ˈna hoˈiraa i Thaïlande, ua itehia ia ˈna te ohipa ta ˈna i hinaaro. Te na ô ra o ˈna: “Maoti ta ˈu parau tuite, ua noaa mai ia ˈu te hoê ohipa aufau-maitai-hia. Ua titauhia râ ia ohipa rahi atu â e ia rave i te hora hau. I te pae hopea, ua tihatihia te rahiraa o te mau rave ohipa, o vau atoa to roto. I reira to ˈu taaraa e aita hoê aˈe ohipa te nehenehe e hopoi mai i te hoê a muri aˈe papu.”

Noa ˈtu mea rahi ta tatou moni e e manaˈo tatou e oraraa papu to tatou, e faaruru tatou pauroa i te maˈi, te fifi i roto i te utuafare e te haapeapearaa i te pae faufaa. Te na ô ra Katsutoshi no Tapone: “E oraraa fanaˈo to ˈu, aita râ vau i oaoa mau no te pohehae e te faainoraa a te taata.” Te parau ra Lam, te hoê vahine e ora ra i Vietnam: “E rave rahi te rohi nei no te hoê ohipa aufau-maitai-hia a manaˈo atu ai e fanaˈo ratou i te hoê oraraa papu. I te pae hopea râ, e haapeapea rahi atu â ratou a roohia ˈtu ai i te maˈi e te ahoaho rahi.”

EITA TE MONI E TE HAAPIIRAA TEITEI E NAVAI NO TE FANAˈO I TE HOÊ A MURI AˈE PAPU

Papu, e titauhia i te taata ia haere i te haapiiraa e ia noaa mai te moni no te aupuru i to ratou utuafare. Aita râ te reira e navai no te fanaˈo i te hoê a muri aˈe papu. No te aha? A tapao na i ta te mau Papai moˈa e parau ra.

E ERE NA TE PARAU TUITE NOA E HOPOI MAI I TE HOÊ ORARAA FAAHIAHIA

“Eita te taata vitiviti e upootia noa i te hororaa, . . . aita atoa . . . ta te feia maramarama e taoˈa noa, eita atoa te feia e ite to ratou e manuïa noa, no te mea e roohia ratou pauroa i te taime e te tupuraa manaˈo-ore-hia.”—KOHELETA 9:11.

Noa ˈtu mea rahi te parau tuite a te hoê taata, e ere te auraa e oraraa faahiahia to ˈna no te mea aita to ˈna e mana i nia i te tahi mau tupuraa mai te mau fifi poritita aore ra tapihooraa, oia atoa te hamani-ino-raa a vetahi ê.

EITA TE MONI E VAI NOA

“Eiaha e faarohirohi ia oe ia rahi ta oe mau taoˈa. A faaea, ia maramarama râ oe. Ia hiˈo atu oe i te reira, aita faahou, e hohora mau â hoi te reira i to ˈna na pererau mai te aeto a maue atu ai i te raˈi.”—MASELI 23:4, 5.

E nehenehe te moni e riro ei parururaa, eita râ te reira e vai noa mai. E nehenehe te oraraa o te hoê taata e taui taue a ere atu ai o ˈna i te moni. Ia tupu te ati natura mai te aueueraa fenua, te ati auahi e te mataˈi rorofai, e nehenehe te hoê taata e ere i ta ˈna mau faufaa e to ˈna fare.

PINEPINE TE MONI I TE HOPOI MAI I TE FIFI

“No te rahi râ o ta ˈna mau taoˈa e ore ai e topa te taoto o te taata taoˈa rahi.”—KOHELETA 5:12.

Tera tei tupu no Franklin e ora ra i Hong-Kong. Ua haere o ˈna i te haapiiraa teitei e e ohipa aufau-maitai-hia ta ˈna. E tiaraa teitei atoa to ˈna i roto i te taiete. Te na ô ra o ˈna: “No te ahoaho rahi, ua maˈihia vau e aita e topa faahou te taoto.” Aita ˈtura i haere faahou ia ˈna ia rave i te ohipa. Te parau ra o ˈna: “Manaˈo atura vau, ‘No te aha vau e tamau ai i roto i tera huru oraraa?’ e feruri atura vau no nia i te tumu o te ora.”

“Eiaha e faarohirohi ia oe ia rahi ta oe mau taoˈa.”—MASELI 23:4

Mai ia Franklin, e rave rahi te farii nei e te vai ra te tahi mea faufaa aˈe i te haapiiraa teitei e te moni. Ma te ore e haapao noa i te mau mea materia, te imi nei vetahi i te riro ei taata maitai e i te hamani maitai ia vetahi ê no te fanaˈo i te hoê oraraa oaoa aˈe. E hopoi mai anei râ te reira i te hoê a muri aˈe papu? E pahonohia tera uiraa i roto i to mua ˈtu tumu parau.