Te haamanaˈo ra anei outou?

Ua taio maitai anei outou i te mau tumu parau i roto i Te Pare Tiairaa? E hiˈo anaˈe e nafea outou ia pahono i teie mau uiraa:

Mai te aha to tatou huru i nia i te feia faatavaihia e tia ˈi?

E haafaufaa tatou i te faaroo o te feia faatavaihia, eita râ tatou e tuu ia ratou i nia aˈe ia vetahi ê. Eita tatou e “faatietie” ia ratou. (Iuda 16) Eita atoa tatou e uiui ia ratou no nia i to ratou tiaturiraa no a muri aˈe.—w20.01 api 29.

Te tâuˈa mai ra anei Iehova ia tatou?

Te faaite ra te Bibilia ua ite Iehova ia tatou hou tatou a fanauhia ˈi. Na Iehova e faaroo i ta tatou mau pure. Te ite ra o ˈna eaha to roto i to tatou feruriraa e aau, e e nehenehe tatou e faaoaoa aore ra e haamauiui ia ˈna. (Par. 1, 28:9; Mas. 27:11) Na ˈna i faatae ia tatou ia ˈna ra.—w20.02 api 12.

Eaha te mau hiˈoraa Bibilia e tauturu ia tatou ia ite eaha te taime tano no te parau e eaha te taime tano no te mamû noa?

E parau to tatou vaha i te parau mau no nia ia Iehova e a ite ai i te hoê ia haere na nia i te eˈa e hapa ˈi o ˈna. E horoa te mau matahiapo i te aˈoraa. E mamû noa tatou ma te ore e aniani aore ra e faaite mea nafea te taviniraa e ravehia ˈi i te mau fenua ua opanihia ta tatou ohipa. Eiaha atoa tatou e faaite i te tahi parau e ore e tia ia faaitehia!—w20.03 api 20-21.

Eaha te mau taa-ê-raa i rotopu i te mau vivi o te Ioela pene 2 e to te Apokalupo pene 9?

Ia au i te Ioela 2:20-29, e faataa ê te Atua i te mau vivi e e faahoˈi o ˈna i te pau ta ratou i faatupu. I muri aˈe i te reira, e ninii te Atua i to ˈna varua. Ua tupu tera parau tohu a haru ai to Babulonia ia Ierusalema. I roto i te Apokalupo 9:1-11, te faahohoˈahia ra te mau vivi i te feia faatavaihia i te mau mahana hopea e poro ra i ta te Atua mau faautuaraa o te haamauiui i te feia atoa e turu i teie ao ino.—w20.04 api 3-6.

O vai te arii no apatoerau i teie mahana?

O Rusia e te mau faatereraa e turu ra ia ˈna. Ua haafifi ratou i te nunaa o te Atua ma te opani i te ohipa pororaa e ma te hamani ino i te mau Ite no Iehova. E tamau te arii no apatoerau e te arii no apatoa i te aro te tahi i te tahi.—w20.05 api 13.

Ua faahitihia anei te mau huru maitatai atoa “ta te varua moˈa e faatupu” i roto i te Galatia 5:22, 23?

Aita. E tauturu te varua moˈa ia faatupu i te tahi atu â mau huru maitatai mai te parau-tia. (Eph. 5:8, 9)—w20.06 api 17.

No te aha mea atâta ia faaite i te parau no nia ia oe i nia i te natirara?

E nehenehe e manaˈohia e ere oe i te mea haehaa, e taata faaoru râ.—w20.07 api 6-7.

E nafea te feia poro e haapii mai ai i te hiˈoraa o te feia taiˈa aravihi?

E haere ratou i te taime e i te vahi mea rahi te iˈa. E faaohipa ratou i te mauhaa tano e e taˈia ratou ma te itoito noa ˈtu te huru o te reva. E na reira atoa tatou i roto i te ohipa pororaa.—w20.09 api 5.

Eaha ta tatou e nehenehe e rave ia here atu â te piahi ia Iehova?

E faaitoito anaˈe i te piahi ia taio i te Bibilia i te mau mahana atoa e ia feruri i ta ˈna i taio. E haapii anaˈe ia ˈna e nafea ia pure.—w20.11 api 4.

A parau ai, “no te Mesia atoa e noaa ˈi i te taata atoa te ora,” o vai ta Paulo i manaˈo?—Kor. 1, 15:22.

Aita Paulo e parau ra e faatiahia te mau taata atoa i te raˈi. Te manaˈo ra oia i te mau Kerisetiano faatavaihia “tei haamoˈahia ia riro ei hoê e te Mesia ra o Iesu.” (Kor. 1, 1:2; 15:18)—w20.12 api 5-6.

Eaha ta te feia faatavaihia o “te tauihia, i reira iho mai te amoraa mata ra, ia oto te pu hopea” e rave i te raˈi?—Kor. 1, 15:51-53.

E apiti ratou e o Iesu no te aratai i te taata ma te sepeta auri. (Apo. 2:26, 27)—w20.12 api 12-13.