Ua ineine anei oe no te Oroa haamanaˈoraa?

Mea faufaa roa te oroa Pasa hopea ta Iesu i faatupu. I te mea e ua ite o ˈna e fatata o ˈna i te pohe, ua faanaho Iesu e amu i te Pasa e ta ˈna mau aposetolo e e haamau i te hoê oroa apî tamatahiti, te Amuraa maa a te Fatu. Ua tono ïa Iesu ia Petero raua Ioane no te faaineine i te piha. (Lu 22:7-13; a hiˈo i te hohoˈa i te api matamua.) Te haamanaˈo mai ra te reira i te faufaaraa ia faaineine ia tatou no te Oroa haamanaˈoraa i te 27 no Mati. Ua faanaho aˈena paha te mau amuiraa i te taeae orero, te pane e te uaina, e te vai atu â. Tera râ, eaha ta tatou taitahi e nehenehe e rave no te faaineine ia tatou no te Oroa haamanaˈoraa?

A faaineine i to oe aau. A taio e a feruriruri i nia i te taioraa Bibilia faataahia no te tau o te Oroa haamanaˈoraa. E itehia te reira i roto i te buka iti E hiˈopoa anaˈe i te mau Papai i te mahana hoê. I roto i te tapura o te tuhaa hau B12 o Te Bibilia, Huriraa o te ao apî, te vai ra te tahi atu mau haamaramaramaraa. E nehenehe e hiˈopoa atoa i te Faaineineraa no te putuputuraa Oraraa e taviniraa Kerisetiano no Eperera 2020 no te ite atu â. I te haamoriraa utuafare, e e nehenehe e hiˈopoa i tei piahia no nia i te faufaaraa o te hoo, i roto i te buka Index des publications des Témoins de Jéhovah aore ra te buka Maimiraa Bibilia.

A titau manihini i te taata. A apiti i te opereraa o te titau-manihini-raa. A feruri i te mau taata ta oe e nehenehe e titau manihini, mai ta oe mau farerei-faahou-raa, te mau piahi tei faaea i ta ratou haapiiraa Bibilia, te feia ta oe i matau e te mau fetii. E haamanaˈo te mau matahiapo i te titau manihini i te mau taeae e tuahine tei faaea i te poro. Eaha te rave, aita anaˈe te tahi taata e faaea i roto i ta oe tuhaa fenua? E nehenehe oe e ite i te hora e te vahi e tupu ai te Oroa haamanaˈoraa i to ˈna vahi nohoraa ma te haere i nia jw.org, i te api omuaraa. A pata i nia i te tuhaa NO NIA IA MATOU e i nia “Oroa haamanaˈoraa.”

Eaha ˈtu â te rave no te faaineine ia tatou?