ORARAA KERISETIANO
E nafea ia riro ei piahi haapii tamau i te mau Papai?
E hinaaro anei oe e faaite i te taiva ore i mua i te tamataraa mai ia Daniela? Ua haapii tamau Daniela i te Parau a te Atua, oia atoa i te mau parau tohu hohonu. (Da 9:2) E tauturu te haapii-tamau-raa i te Bibilia ia oe ia vai taiva ore. E nafea ïa? Maoti te reira e rahi mai ai to oe faaroo e e tupu iho â ta Iehova mau parau fafau. (Ios 23:14) E tauturu atoa te reira ia oe ia rahi mai to oe here i te Atua o te turai ia oe ia rave i te mea maitai. (Sal 97:10) E nafea râ oe e haamata ˈi? Teie te tahi mau manaˈo tauturu.
Eaha ta ˈu e haapii? I roto i te hoê haapiiraa tamau, te vai ra te faaineineraa no te mau putuputuraa a te amuiraa. E faufaahia ˈtu â oe i te taioraa Bibilia o te hebedoma ia faataa oe i te taime no te rave i te mau maimiraa no te mau tuhaa aita oe i taa. Hau atu â, ua maiti vetahi i te haapii atu â no nia i te mau parau tohu Bibilia, i te mau tuhaa rau o te hotu o te varua o te Atua, te tere mitionare o te aposetolo Paulo aore ra no nia i te mau mea i poietehia ta tatou e ite nei. Ia puta mai te hoê uiraa Bibilia i roto i to oe feruriraa, a tapao i te reira e a tuatapapa ˈtu i te tahi atu taime i roto i ta oe iho haapiiraa.
Ihea vau e ite ai i te mau haamaramaramaraa? No te ite i te tahi mau raveraa, a mataitai i te video Mauhaa maimiraa ia itehia te mau faufaa pae varua. No te ite i to outou aravihi, a maimi o vai te mau puai o te ao nei o tei faahohoˈahia e te puaa taehae o te Daniela pene 7.
Ehia taime ta ˈu e faataa no te haapii? Mea faufaa te hoê haapiiraa tamau ia maitai noa to oe ea pae varua. E nehenehe oe e haamata ma te hoê haapiiraa poto aˈe, mai te peu e titauhia, e faaroa ˈtu â ïa i te haapiiraa. E au te haapiiraa i te Parau a te Atua i te heruraa i te mau taoˈa huna, hau atu â oe i te ite mai i te mau taoˈa, hau atu â oe i te heru! (Mas 2:3-6) E puai atu â to oe hinaaro i te Parau a te Atua e e tamau noa oe i te rave i ta oe haapiiraa Bibilia.—Pe1 2:2.
TE FAAHOHOˈA RA TE MAU PUAA TAEHAE O TE DANIELA PENE 7 I TE AHA?
UIRAA HAU:
Mea nafea te Daniela 7:8, 24 i te tupuraa?
TA OE E TUATAPAPA I ROTO I TA OE IHO HAAPIIRAA:
Te faahohoˈa ra te mau puaa taehae o te Apokalupo pene 13 i te aha?