Mea au roa ia poro i te parau apî oaoa

Mea fifi anei no oe ia poro? No nia i teie uiraa, e pahono te rahiraa o tatou e ‘E.’ No te aha? Peneiaˈe te farerei pinepine nei tatou i roto i te tuhaa fenua i te mau taata o te ore e tâuˈa mai aore ra e patoi mai aore ra e mǎtaˈu tatou e paraparau i te feia ěê. Mea papu, e nehenehe to tatou oaoa e iti mai i teie mau mea. Tera râ, e haamori tatou i te hoê Atua oaoa o te hinaaro ra ia tavini tatou ia ˈna ma te oaoa. (Sal 100:2; Ti1 1:11) Eaha na tumu maitai e toru e au ai tatou i te pororaa?

A tahi, e faaite tatou i te hoê poroi no nia i te tiaturiraa. Noa ˈtu e iti mai to tatou tiaturiraa i roto i te totaiete i teie mahana, e nehenehe tatou e faaî i te aau o te taata i “te parau oaoa e te maitai.” (Isa 52:7) E î atoa râ to tatou aau i te oaoa i te parau apî oaoa o te Faatereraa arii a te Atua. Hou râ tatou e haere ai e poro, a feruri maite anaˈe i te mau haamaitairaa ta te Faatereraa arii a te Atua e hopoi mai i te fenua nei.

Te piti, e faufaahia te parau apî oaoa ta tatou e poro ra i te taata, i te pae tino e i te pae varua. E haapii ratou i te haapae i te mau ohipa iino e i te fanaˈo i te tiaturiraa o te ora mure ore. (Isa 48:17, 18; Ro 1:16) E nehenehe tatou e feruri ia tatou e rave ra i te ohipa paimiraa e faaoraraa taata. Noa ˈtu aita te tahi mau taata e hinaaro ra ia faaorahia ratou, e tamau tatou i te imi i te feia e hinaaro ra i te ora.—Mt 10:11-14.

Te toru, e te mea faufaa roa ˈˈe, e faahanahana ta tatou pororaa ia Iehova. Te haafaufaa rahi nei oia i ta tatou ohipa pororaa. (Isa 43:10; Heb 6:10) Hau atu â, e horoa mai Iehova ma te aau tae i to ˈna varua moˈa no te rave i ta ˈna ohipa. E taparu anaˈe ia Iehova ia horoa mai i te oaoa, hoê huru maitai o te hotu o te varua moˈa. (Ga 5:22) Maoti ta ˈna tauturu, e nehenehe tatou e faaruru i to tatou mau ahoaho e e poro ma te mǎtaˈu ore. (Ohi 4:31) No reira, noa ˈtu eaha te huru o te taata, e au roa tatou i ta tatou hopoia e poro.—Ezk 3:3.

A MATAITAI I TE VIDEO E NOAA FAAHOU TE OAOA MAOTI TE HAAPIIRAA E TE FERURIRURIRAA E A PAHONO I TEIE MAU UIRAA:

• No te aha mea tia ia tuu tatou i ta tatou haapiiraa Kerisetiano i te parahiraa matamua, noa ˈtu e faataa tatou e rave rahi hora i roto i te pororaa i te avaˈe tataitahi?

• I roto i teihea tuhaa e pee ai tatou i te hiˈoraa o Maria?

• Afea tatou e rave ai i te taime no te feruri maite i nia i te Parau a te Atua?

• Eaha ta oe e au roa ia poro oe i te parau apî oaoa?