Ua tauihia anei te Parau papaihia a te Atua?

Te uiui nei vetahi mau taata e ua tauihia anei te huru papairaa i te Parau a te Atua. Ua parau te peropheta Isaia e e ‘vai maite noa’ te Parau a te Atua e a muri noa ˈtu. (Isaia 40:8) E nafea tatou e papu ai e ua paruru-maite-hia te mau parau fafau a te Atua?

E mana to te Atua no te paruru i ta ˈna Parau ia ore ia haaviiviihia. I te mau tau tahito, ia oti te ohipa a te mau papai parau, e taio ïa ratou i te reta tataitahi o te papai moˈa no te haapapu e aita hoê aˈe tuhaa i tuuhia ˈtu, tauihia aore ra i iritihia. E mau taata hara hoi te mau taata atoa, e nehenehe ïa te mau papai parau e hapehia.

E NAFEA TATOU E PAPU AI E O TE POROI TUMU IHO Â A TE ATUA TEI PAPAIHIA I ROTO I TE BIBILIA?

Te vai ra tau tausani papai o te mau papai tahito o te Bibilia. Mai te peu e itehia te hoê tuhaa hape haihai roa i roto i te hoê papai, e faaauhia te reira i te tahi atu mau papai no te ite i te parau mau.—No te ite hau atu â, a hiˈo i te tumu parau “Ua tauihia aore ra ua faahuru-ê-hia anei te Bibilia?” i nia i te reni natirara jw.org (Farani).

Ei hiˈoraa, ua itehia mai te mau otaro tahito parauhia te mau otaro o te miti Pohe e te mau Bédouins i roto i te mau ana i pihai iho i te miti Pohe i 1947. I roto i taua mau papai tahito ra, te vai ra te tahi mau tuhaa o te mau Papai moˈa tei papaihia hau atu 2 000 matahiti. Ua faaau te mau aivanaa i teie mau papai tahito e te Bibilia o teie nei tau. Eaha ta ratou i ite?

Ua itehia mai i te mau aivanaa e te tuati ra te Bibilia o teie nei tau i te mau papai tahito.a E nehenehe e tiaturi e ua haapao maitai te Atua ia paruruhia ta ˈna Parau moˈa no tatou i teie mahana.

No reira, e nehenehe ta tatou e taio i te Parau a te Atua ma te taiâ ore e ma te tiaturi e mea tano te reira. A tapea ˈi i taua manaˈo, e hiˈopoa mai tatou eaha te haapii mai no nia i te Atua maoti ta ˈna mau peropheta.