“Teie nei mau parau . . . ei roto i to aau e vai ai”

E au ra te mau metua i te tiai mamoe. E mea tia ia haapao maitai ratou i ta ratou mau tamarii. Mea ohie hoi ia faahahi ê e ia faahema ia ratou. (Mas. 27:23) E nafea ïa te mau metua e amo maitai ai i ta ratou hopoia? E mea tia ia faataa ratou i te taime i te mau mahana atoa no te tauaparau e ta ratou mau tamarii. E ite ïa te mau metua eaha to ratou mau manaˈo hohonu. (Mas. 20:5) E mea tia atoa ia tauturu te mau metua i ta ratou mau tamarii ia faatupu i te faaroo puai a nehenehe atu ai e faaruru i te mau tamataraa. (Kor. 1, 3:10-15) E faaite te video « Ces paroles devront être sur ton cœur » i te faufaaraa ia faatere tamau i te haamoriraa utuafare. A mataitai ïa i teie video e to oe utuafare. I muri iho, a tauaparau ma te faaohipa i to muri nei mau uiraa.

(1) No te aha te utuafare o Roman i faaea ˈi i te manaˈo mai ia Iehova? (2) No te aha aita ˈi te taeae Roman i nehenehe e faatere i te haamoriraa utuafare i te omuaraa? (3) Eaha te irava Bibilia o te tauturu maitai aˈe i te mau metua ia haapii i ta ratou mau tamarii? (Deut. 6:6, 7) (4) Eaha te nehenehe e tauturu i te mau melo utuafare ia tauaparau maitai atu â? (5) Eaha te mau haapaeraa tei titauhia i te mau metua ia rave no ta ratou mau tamarii? (6) E nafea te taeae e tuahine Barrow i tauturu ai i te utuafare o Roman? (Mas. 27:17) (7) Eaha ta te upoo utuafare e faaineine ia maitai atu â te haamoriraa utuafare? (8) Eaha ta te taeae Roman i haamata i te rave no te maitai o to ˈna utuafare? (9) No te aha e mea faufaa roa ˈi ia faatere-tamau-hia te haamoriraa utuafare? (Eph. 6:4) (10) Eaha te tahi mau manaˈo tauturu no te haamoriraa utuafare? (11) E nafea taeae Roman i aˈo ai ma te mǎrû e te papu râ ia Marcus no te tauturu ia ˈna ia hinaaro e rave i te mea tia? (Ier. 17:9) (12) E nafea taeae e tuahine Roman i haaferuri ai ia Rebecca no te tauturu ia ˈna ia rave i te faaotiraa maitai no nia i to ˈna mau taairaa e o Justin? (Mar. 12:30; Tim. 2, 2:22) (13) E nafea taeae e tuahine Roman i faaite ai i to raua faaroo a taui ai i to raua huru oraraa? (Mat. 6:33) (14) E nafea teie video e faaite ai e mea faufaa ia haapao te mau upoo utuafare i te mau hinaaro pae varua o to ratou utuafare? (Tim. 1, 5:8) (15) Eaha ta oe e faaoti papu e rave ei upoo utuafare?

NA TE MAU UPOO UTUAFARE: Ua hautihia tera aamu no teie tau i te tairururaa e toru mahana i 2011. I tera taime, ua ite anei oe i te tahi tuhaa o ta oe haamoriraa utuafare e titauhia ia haamaitai? Eaha ˈtura ïa i teie nei? Mai te peu e mea titauhia, a rave i te mau faatanoraa na roto i te pure ia nehenehe to oe utuafare e fanaˈo i te mau haamaitairaa e a muri noa ˈtu.—Eph. 5:15-17.