Ia aravihi atu â i roto i te taviniraa—A poro ma te faaohipa i te interphone

No te aha e mea faufaa ˈi? E taiâ paha tatou i te poro ma te faaohipa i te interphone (e ravea paraparauraa teie tamauhia i te pae uputa). Eaha te rave ia ore teie tupuraa e faaiti i to tatou itoito i te mau ohipa maitatai? A haamanaˈo e tera noa paha te ravea no vetahi no te faaroo i te parau apî oaoa. (Roma 10:14) Ia au i tei tupu ê na, e nehenehe e faaite i te poroi ma te aravihi maoti te interphone. (A hiˈo i te Annuaire 2011 i te api 65 paratarafa 2 tae atu i te api 66 paratarafa 1 e te Annuaire 2000 i te api 54 paratarafa 3.) A hiˈopoa i to muri nei mau manaˈo tauturu.

Nafea ïa?

A faaineine i te tahi faaiteraa poto e a papai roa ˈtu i ta oe e parau. E nehenehe oe e taio i te reira i te taata na roto i te interphone. Eita ïa oe e taiâ. I te omuaraa, a faataa no te aha oe i haere mai ai. A faaohipa i to te taata iˈoa mai te peu e te vai ra i nia i te tapura iˈoa o te feia noho. I te pae hopea, a ani atu e nehenehe anei oe e pûpû i te tahi api parau aore ra vea (aore ra vaiiho i te reira i te uputa) no te horoa i te tahi mau haamaramaramaraa hau.
A tapea i te hoê manaˈo maitai. A paraparau ma te mata ataata e ma te faaohipa i te aparaa rima mai te huru ra e tei mua te taata ia oe.
Eiaha e ru. A taio i ta oe i papai mai te hoê aparauraa. A faahiti i te parau ma te maramarama e a faatano i te puairaa o te reo. I te roaraa o te aparauraa, eiaha e faafaaea hanoa. Eiaha atoa râ e paraparau ma te vitiviti.
A feruri maitai. I te mau fare tahua rau, peneiaˈe e rave rahi interphone. A maiti noa paha ïa e toru taata ta oe e poro atu. Hou a faarue ai, a papai o vai ta oe i paraparau atu. E huru ê paha te feia e noho ra i te fare tahua rau ia vai maoro tatou i te vahi tomoraa no te taumi i te pitopito o te mau interphone atoa.

Ta oe e rave i teie avaˈe:

I te haamoriraa utuafare, e rave te mau melo i te mau faaineineraa poto no tera taviniraa. E nehenehe ïa ratou e rave i te reira ma te huri i te tua te tahi i te tahi.