A faatere i te mau haapiiraa Bibilia ma te aravihi
1. Eaha ta te mau taata poro e haapiiraa Bibilia ta ratou e tia ia rave?
1 Eita hoê aˈe taata e nehenehe e tavini i te Atua maori râ ia “faatae mai” Iehova ia ˈna. (Ioa. 6:44) Noa ˈtu râ, e mea tia i te mau taata poro o te faatere ra i te mau haapiiraa Bibilia ia tauturu i te mau taata ia piri atu â i to ratou Metua i te raˈi ra. (Iak. 4:8) E titau te reira i te faaineineraa. Eita e navai ia taio noa i te paratarafa taitahi e ia tuu noa i te uiraa. Eita te reira e tauturu i te mau piahi ia taa i te poroi e ia haere i mua i te pae varua.
2. Eaha te faahopearaa ia faatere oe i te hoê haapiiraa Bibilia ma te aravihi?
2 No te faatere i te mau haapiiraa ma te aravihi, e mea tia ia tauturu te mau taata poro i te mau piahi ia (1) taa i ta te Bibilia e haapii ra, (2) ia farii e (3) ia faaohipa i te reira. (Ioa. 3:16; 17:3; Iak. 2:26) E mea titauhia paha i te piahi tau avaˈe no te faaohipa i na manaˈo e toru. E tauturu râ te reira ia ˈna ia piri atu â ia Iehova e ia pûpû ia ˈna i te Atua.
3. No te aha te mau taata poro haapii aravihi e tuu ai i te mau uiraa manaˈo?
3 Eaha to te piahi Bibilia manaˈo? E taa maitai anei i te piahi Bibilia ta ˈna e haapii ra? E farii anei o ˈna i te reira? No te ite i te pahonoraa, eiaha oe e paraparau rahi. A faaitoito râ i te piahi ia faaite i to ˈna manaˈo. (Iak. 1:19) E taa anei ia ˈna i ta te Bibilia e parau ra no nia i te tumu parau hiˈopoahia? E nehenehe anei o ˈna e faataa i te tumu parau na roto i ta ˈna iho mau parau? Eaha to ˈna manaˈo no nia i ta ˈna i haapii? E tiaturi anei o ˈna e mea tano iho â ta te Bibilia e haapii ra? (Tes. 1, 2:13) E taa anei ia ˈna e e mea titauhia ia faaohipa i ta ˈna e haapii ra i roto i to ˈna oraraa? (Kol. 3:10) No te pahono i tera mau uiraa, e mea faufaa ia tuu i te mau uiraa manaˈo ma te tura e i muri iho, ia faaroo.—Mat. 16:13-16.
4. Eaha te ravehia ia ore te piahi e taa maitai aore ra faaohipa i ta te Bibilia e haapii ra?
4 Mea fifi ia faaore i te tahi huru feruriraa aore ra peu. E titau-atoa-hia te taime ia na reira. (Kor. 2, 10:5) Eaha te ravehia ia ore te piahi e farii aore ra faaohipa i ta ˈna e haapii ra? E mea titauhia te faaoromai. A vaiiho ïa i te taime e au ia nehenehe te Parau a te Atua e te varua moˈa e ohipa i nia i te aau o te piahi. (Kor. 1, 3:6, 7; Heb. 4:12) Mai te peu e eita te piahi e taa maitai i te hoê tumu parau aore ra e faaohipa i ta te Bibilia e haapii ra, eiaha e onoono. E mea au aˈe ia tauaparau no nia i te tahi atu tumu parau. A tamau ai tatou i te haapii ia ˈna i te Bibilia ma te faaoromai e ma te here, e hinaaro paha oia e rave i te mau tauiraa e titauhia.