A faaohipa i te mau tupuraa atoa no te haaparare i te poroi o te Basileia!

1. Eaha te haapiiraa e huti mai i te hiˈoraa o Davida?

¹ Aita te arii ra o Davida i vaiiho i te tahi noa ˈˈe tupuraa ia haafifi ia ˈna. Ei hiˈoraa, ua hinaaro o ˈna e patu i te hoê fare no Iehova. I to ˈna iteraa e aita oia i faatiahia ia na reira, ua faatano Davida i ta ˈna mau fa. Ua faanaho oia i te mau ohipa ia nehenehe Solomona e patu i te hiero. (Arii 1, 8:17-19; Par. 1, 29:3-9) Ua tiatonu Davida i nia i te mau mea ta ˈna e nehenehe e rave, eiaha râ i te mau mea ta ˈna i ore i rave. E nafea tatou e pee ai i te hiˈoraa o Davida a imi ai i te mau ravea atoa no te haaparare i te poroi o te Basileia?

2. Eaha te tahi hiˈopoaraa ta oe e nehenehe e rave?

² A rave i tei tia ia oe: E rave rahi o tei faaohie i to ratou oraraa no te tavini ei pionie tauturu aore ra pionie tamau. (Mat. 6:22) E nehenehe atoa ta oe? A hiˈopoa i to oe oraraa na roto i te pure. E ite paha oe e “e opani rahi hoi e te maitai tei iritihia” no oe. Mai te peu e tera iho â, eiaha e haamarirau!—Kor. 1, 16:8, 9.

3. E nafea ïa mai te peu e eita oe e nehenehe e riro ei pionie?

³ Eita anaˈe oe e nehenehe e riro ei pionie, a haamanaˈo e te vai ra te tahi atu mau tupuraa e nehenehe oe e poro hau atu â. Ei hiˈoraa, i ta oe vahi raveraa ohipa, a poro i te feia e ere i te Ite no Iehova i te taime faafaaearaa. Aore ra ia maˈihia oe, a poro i te feia e rapaau ra ia oe. A haamanaˈo: mai te peu e e mea ruhiruhia oe aore ra ua roohia oe i te hoê maˈi atâta e ua rave oe 15 minuti i roto i te pororaa, e nehenehe oe e tapao i te reira i nia i ta oe tapura taviniraa. A tapao atoa i te taime i roto i te pororaa faanaho-ore-hia, tae noa ˈtu i te mau papai i pûpûhia, te mau api parau e te mau titau-manihini-raa no te Oroa haamanaˈoraa aore ra tairururaa. E maere oe i te iteraa e e rahi atu â te taime ta oe e tapao!

4. Eaha ta oe e faaoti papu?

⁴ Noa ˈtu to tatou huru tupuraa, e rave anaˈe i te mau tutavaraa atoa no te haaparare i te parau apî maitai. E oaoa ïa tatou i te iteraa e ua rave tatou i te mau mea atoa no te Basileia.—Mar. 14:8; Luka 21:2-4.