A pee i te hiˈoraa o te mau peropheta: Zephania
1. I roto i teihea tupuraa i tavini ai Zephania ei peropheta e no te aha oia e riro ai ei hiˈoraa maitai no tatou?
1 I te afaraa o te mau matahiti 600 hou te Mesia, ua faaohipa-tahaa-hia te haamoriraa a Baala i Iuda. Ua haapohe-noa-hia te arii ino ra o Amona e na te taata apî ra o Iosia i faatere ei arii. (Par. 2, 33:21–34:1) I tera taime, ua maiti Iehova ia Zephania no te faaite i ta ˈNa poroi haavaraa. Noa ˈtu e e melo paha Zephania o te fare arii o Iuda, aita o ˈna i faahuru ê i to Iehova faautuaraa i ta Iuda aratairaa. (Zeph. 1:1; 3:1-4) E tutava atoa tatou i te pee i to Zephania itoito. Eita tatou e vaiiho i te mau taairaa fetii ia ohipa ma te huru tano ore i nia i ta tatou haamoriraa ia Iehova. (Mat. 10:34-37) Eaha te poroi ta Zephania i faaite ai e eaha te mau faahopearaa?
2. Eaha te tia ia rave ia tapunihia tatou i te mahana o to Iehova riri?
2 A imi ia Iehova: O Iehova anaˈe te nehenehe e faaora i te taata i te mahana o to ˈna riri. No reira, ua parau Zephania i te mau taata no Iuda e taime â no te imi ia Iehova, no te imi i te parau-tia e i te haehaa. (Zeph. 2:2, 3) Oia atoa no tatou i teie mahana. Mai ia Zephania, e faaitoito tatou ia vetahi ê ia imi ia Iehova. E titau-atoa-hia ia ohipa tatou e ia faaoti eiaha roa ˈtu ia “fariu ê” ia Iehova. (Zeph. 1:6, Te Bibilia Moˈa V.C.J.S., 1976) E imi tatou ia Iehova ma te hiˈopoa maite i ta ˈna Parau e ma te ani i ta ˈna aratairaa na roto i te pure. E imi tatou i te parau-tia ma te ora i te hoê oraraa mâ i te pae morare. E imi atoa tatou i te haehaa ma te auraro e ma te pee oioi i te aratairaa a te faanahonahoraa a Iehova.
3. No te aha e tapea ai tatou i te manaˈo maitai i roto i te pororaa?
3 E mau faahopearaa maitai: Ua faaite Zephania i te hoê poroi haavaraa e ua ohipa maitai te reira i nia i te tahi noa mau taata i Iuda. Oia atoa i nia i te taata apî ra o Iosia tei imi ia Iehova a tamarii ai oia. I muri aˈe, ua rave o ˈna i te hoê tere tinairaa i te haamoriraa idolo i Iuda. (Par. 2, 34:2-5) I teie mahana, noa ˈtu e e mairi te huero o te Basileia na te hiti purumu, i te vahi ofaifai aore ra i roto i te mau raau taratara, e mairi atoa taua huero ra i te repo maitai e e hotu mai te reira. (Mat. 13:18-23) E tiaturi tatou e e tamau â Iehova i te haamaitai i ta tatou mau tutavaraa a ohipa rahi ai tatou no te ueue i te huero o te Basileia.—Sal. 126:6.
4. No te aha e “tiai” noa ai tatou ia Iehova?
4 No te tahi mau taata i Iuda, aita roa ˈtu Iehova e ohipa. Ua haapapu roa râ Iehova e ua fatata to ˈna mahana rahi. (Zeph. 1:12, 14) O te feia anaˈe i imi ia ˈna tei faaorahia. (Zeph. 3:12, 17) Ia oaoa tatou i te tavini i to tatou Atua rahi ma te auhoê e to tatou mau hoa haamori a “tiai” noa ˈi tatou ia Iehova!—Zeph. 3:8, 9.