Te mau tapura opereraa vea: E navai anei ia afai i te vea?

1. No te aha te faanahonahoraa a Iehova i faaitoito noa ˈi i te taata poro ia hoˈi e farerei i te taata e farii tamau nei i te vea?

¹ E rave rahi taata o te ore e hinaaro e haapii i te Bibilia e o tatou. Mea au râ na ratou i te taio i ta tatou mau vea. No reira te faanahonahoraa a Iehova i faaitoito noa ˈi i te taata poro ia hoˈi e farerei i te taata e farii tamau nei i te vea. I te mea e e taio pinepine te taata i ta tatou mau papai, e tupu ïa to ratou hinaaro i te Parau a te Atua. (Pet. 1, 2:2) I te pae hopea, e nehenehe ratou e putapû i ta ratou i taio a hinaaro atu ai e haapii i te Bibilia.

2. Eaha te rave ia anaanatae noa te taata e farii tamau nei i te vea?

² A faarari i te mau huero o te parau mau i te pape: Eita e navai ia afai noa i te mau vea. A tauaparau i te taata e a tutava i te haamatau ia ˈna. E ite ïa oe eaha to ˈna huru tupuraa, ta ˈna mau tiaturiraa e ta ˈna e anaanatae ra a nehenehe atu ai e faatano i ta oe e parau atu. (Mas. 16:23) A faaineine maitai i te mau farerei-faahou-raa atoa. Ia nehenehe, a faarari i te mau huero o te parau mau i roto i to ˈna aau ma te faataa poto i te tahi manaˈo e irava o te vea. (Kor. 1, 3:6) A tapao i te mau mahana atoa i hoˈi ai oe e farerei ia ˈna, oia atoa te papai ta oe i vaiiho e te tumu parau e te irava ta orua i hiˈopoa.

3. Ehia taime tatou e hoˈi ai e farerei i te taata e farii tamau nei i te vea?

³ Ehia taime i roto i te avaˈe? E mea tia ia hoˈi e farerei i te taata hoê taime i te avaˈe no te afai atu i te mau vea apî. Ia au râ i to ˈna anaanatae e to oe huru tupuraa, e faaoti paha oe i te haere pinepine e hiˈo ia ˈna i taua noâ avaˈe. Ei hiˈoraa, hoê aore ra piti hebedoma i muri aˈe i to oe vaiihoraa i te mau vea, e nehenehe oe e hoˈi atu ma te parau, “Ua hinaaro vau e faaite ia oe i te tahi manaˈo i roto i te mau vea ta ˈu i vaiiho.” Ia na reira oe, e anaanatae ïa te taata i te taio i te tahi tumu parau taa maitai. Mai te peu e ua taio ê na oia i te reira, e nehenehe oe e ani atu eaha to ˈna manaˈo i nia i tera tumu parau a tauaparau atu ai. Ia anaanatae roa te taata i te taio i ta tatou mau papai, e nehenehe oe e hoˈi atu no te pûpû i te tahi api parau iti, buka rairai aore ra buka e pûpûhia i tera avaˈe.

4. I te tahi taime, eaha te rave no te ite e ua ineine anei te taata i te haapii i te Bibilia?

⁴ Eiaha e tiai ia ani mai te taata i te hoê haapiiraa! A imi i te ravea no te haamata i te tahi. Eaha te rave ia ore te taata e farii i te hoê haapiiraa Bibilia? I te tahi taime, e nehenehe e faaite atu i te tuhaa “Te pahono ra te Bibilia” i roto i Te Pare Tiairaa no te ite e ua ineine anei oia i te tauaparau i nia i te reira. Peneiaˈe e nehenehe oe e haamata i te haapiiraa i te uputa. Aita anaˈe, a tamau i te afai i te mau vea ia anaanatae noa te taata i te mau tumu parau Bibilia.