Pahonoraa i ta outou mau uiraa

◼ E mea tia anei ia tapoˈi te hoê vahine poro i to ˈna upoo ia faatere o ˈna i te haapiiraa Bibilia e te tahi tane poro i te pae opani?

Ia faatere tamau te hoê vahine poro i te haapiiraa Bibilia e to reira te hoê tane poro, ia tapoˈi ïa oia i to ˈna upoo. (Kor. 1, 11:3-10) Te faataa ra Te Pare Tiairaa o te 15 no Tiurai 2002 i te api 27: “E tuhaa o te haapiiraa faanaho-ê-na-hia teie i reira te taata o te faatere i te haapiiraa e peretiteni mau ai. I roto i teie mau huru tupuraa, e tuhaa te haapiiraa o te amuiraa. Mai te peu e e faatere te hoê vahine Ite bapetizohia i taua haapiiraa ra e te vai ra te hoê tane Ite bapetizohia, e tano ia tapoˈi oia i to ˈna upoo.” Mai tera ˈtoa ia faaterehia te haapiiraa Bibilia i te hoê fare, i te pae opani aore ra i te tahi atu vahi.

Mai te peu râ e a tahi ra te haapiiraa Bibilia e faaterehia ˈi, aita e titauhia ia tapoˈi te tuahine i to ˈna upoo to reira anaˈe te hoê tane poro. Mai tera ˈtoa ia hoˈi-faahou-anaˈe-hia e farerei i te taata no te faaite i te tereraa o te hoê haapiiraa Bibilia aore ra no te hiˈopoa i te tahi manaˈo i roto i te mau papai Kerisetiano. I te mea e e rave rahi taime tatou e hoi ai e farerei i te taata hou a haamau ai i te haapiiraa Bibilia, e titauhia ia hiˈopoa i te tupuraa no te ite afea e mea tano ai ia tapoˈi i te upoo.