A pee i te hiˈoraa o te mau peropheta: Hosea
1. Ua ui aˈena paha oe i teihea uiraa?
1 A feruriruri ai i to Iehova maitai e aroha rahi, ua ui aˈena paha oe ‘Eaha te mau haapaeraa ta ˈu e rave no te tavini ia Iehova?’ (Sal. 103:2-4; 116:12) Ua rave iho â te peropheta Hosea i ta Iehova i faaue ia ˈna noa ˈtu e mea titauhia ia rave i te mau haapaeraa. E nafea tatou e pee ai i to ˈna hiˈoraa?
2. E nafea ia pee i to Hosea faaoromai i roto i te ohipa pororaa?
2 A poro i te tau fifi: Aita faahou to te basileia o na opu hoê ahuru o Iseraela i haafaufaa i te haamoriraa mau. No reira Hosea i faaite na mua ˈi ta ˈna poroi ia ratou. Mai ia Ieroboama a Nebata, a haamori ai i te kafa, ua rave te arii Ieroboama II i te mea ino i te aro o Iehova. (Arii 2, 14:23, 24) No te ino o te mau arii i muri mai, ua atea ê roa to tera basileia i te Atua. No reira ratou i haamouhia ˈi i 740 hou to tatou nei tau. Noa ˈtu e ua turu te rahiraa i te haamoriraa haavare, e 59 matahiti to Hosea tavini-noa-raa ma te taiva ore ei peropheta. E faaoti atoa anei tatou i te poro i tera e tera matahiti noa ˈtu te patoiraa e te tâuˈa ore o te taata?—Tim. 2, 4:2.
3. Mea nafea Hosea i faahohoˈa maitai ai i to Iehova aroha rahi?
3 A haamanaˈo i to Iehova aroha rahi: Ua faaue Iehova ia Hosea ia faaipoipo i “te hoê vahine i mataro i te taiata.” (Hos. 1:2) Noa ˈtu e ua fanau Gomera i te hoê tamaiti na ˈna, e au ra e i muri aˈe, e piti atu â tamarii ta ˈna no te taata ê. Te faahohoˈa maitai ra to Hosea hinaaro e faaore i te hara a ta ˈna vahine i to Iehova aroha rahi i te nunaa Iseraela a tatarahapa ˈi ratou. (Hos. 3:1; Roma 9:22-26) Ua ineine anei tatou i te haafaufaa na mua i te faaiteraa i to Iehova aroha rahi i te taata aore ra i to tatou manaˈo?—Kor. 1, 9:19-23.
4. Eaha paha te tahi mau haapaeraa ta tatou e rave no te tavini ia Iehova?
4 Ua haapae vetahi mau tavini o Iehova i te mau toroa aufau-maitai-hia ia rahi atu â te taime no te taviniraa. Area te tahi atu, ua maiti ïa i te ore e fanau i te tamarii e i te faaea taa noa no te tapi i te mau ohipa i taaihia i te Basileia. Ma te feruri i to Hosea oraraa, e parau paha tatou, ‘Eita taˈu e nehenehe e rave mai ia ˈna.’ No reira, e haafaufaa anaˈe i to Iehova hamani maitai rahi e a tiaturi i te turu a to ˈna varua moˈa. Mai ia Hosea, e faaohipa paha ïa oia ia tatou mai ta tatou i ore i manaˈo aˈenei.—Mat. 19:26; Phil. 2:13.