A pee i te hiˈoraa o te mau peropheta: Iona
1. Eaha to Iona mau huru maitatai?
1 Ia faaroo oe i te iˈoa Iona, eaha ta oe e manaˈo? No vetahi, e taata mǎtaˈu hanoa aore ra etaeta. Ei peropheta râ, ua faaite oia i te haehaa, te itoito e te feruriraa haapae. E nafea ia pee i to Iona hiˈoraa ma te faatupu i to ˈna mau huru maitatai?—Iak. 5:10.
2. E nafea ia pee i te haehaa o Iona?
2 Haehaa: A horoahia ˈi ta ˈna tuhaa fenua pororaa, ua horo ê Iona. E ere iho â i te mea maere. Ua matauhia na to Asura ei nunaa ino i parauhia ˈi Nineve “te oire i viivii i te toto.” (Nah. 3:1-3) Ua aˈo râ Iehova ia Iona. Horoa faahou atura i te hopoia e i reira ma te haehaa ua farii atu. (Mas. 24:32; Iona 3:1-3) Noa ˈtu e ua horo ê oia i te taime matamua, ua rave oia i to Iehova hinaaro. (Mat. 21:28-31) Ia aˈohia aore ra e ere anaˈe i te mea ohie ia poro i roto i te tahi tuhaa fenua, e tamau anei tatou mai ia Iona i te faaite i te evanelia?
3. No te aha e titauhia ˈi te itoito e te feruriraa haapae i roto i te taviniraa?
3 Itoito e feruriraa haapae: Ua ite Iona e no ta ˈna faaotiraa i ati ai te mau ihitai i te pohe. Ua farii atu ïa oia i te horoa i to ˈna ora no ratou. (Iona 1:3, 4, 12) I to ˈna haereraa i Nineve, ua tomo oia i roto i te oire no te imi paha i te tahi vahi tano no te faaite i ta Iehova haavaraa. Ua mǎtaˈu anei oia? Ei peropheta na te Atua, ua ohipa o ˈna ma te itoito! (Iona 3:3, 4) E tatou? E hinaaro iho â tatou i te itoito no ǒ mai i te Atua no te poro noa ˈtu te patoiraa. (Ohi. 4:29, 31) E titau-atoa-hia te feruriraa haapae no te horoa i te taime e ta tatou mau faufaa no te taviniraa.—Ohi. 20:24.
4. No te aha e faaherehere ai i te taime no te hiˈopoa i te hiˈoraa o ta Iehova mau peropheta?
4 E faufaahia oe ia taio i te aamu o te mau peropheta a Iehova ma te uiui: “Ahani o vau tera, eaha ta ˈu e rave? E nafea vau ia faaite i to ˈna mau huru maitatai?” (Heb. 6:11, 12) I roto i Ta tatou taviniraa i te Basileia i mua nei, e hiˈopoahia ˈtu â te hiˈoraa o te tahi atu mau peropheta taiva ore a Iehova. E haapiiraa faufaa mau ïa te huti mai.