Te huru faufaa roa ˈˈe
1. Eaha te huru faufaa roa ˈˈe o te hoê taata haapii maitai?
1 Na te aha e faariro i te hoê taata ei taata haapii Bibilia maitai? Na ta ˈna anei i haapii? To ˈna ite? To ˈna aravihi? O te huru maitai hoi i hope roa ˈi te Ture, o te tapao hoi o te mau pǐpǐ a Iesu, e o to Iehova huru au rahi-roa ˈˈe-hia. (Ioa. 13:35; Gal. 5:14; Ioa. 1, 4:8) O te aroha ïa aore ra here. E faaite te taata haapii maitai i te here.
2. E nafea e faaite ai i te here i te taata?
2 A here i te taata: Ua faaite Iesu, te Orometua rahi roa ˈˈe, i te here i te taata e ua turai te reira ia ratou ia faaroo ia ˈna. (Luka 5:12, 13; Ioa. 13:1; 15:13) Ia tâuˈa tatou i te taata, e poro ïa tatou i te mau taime atoa. Eiaha te mau fifi mai te hamani-ino-raa e te tâuˈa ore ia faatoaruaru ia tatou. E anaanatae tatou i te taata e porohia ˈtura, ma te faatano i ta tatou faaiteraa i ta ratou e tapitapi ra. E rave tatou i te taime no te piahi taitahi e no te faaineine atoa i te haapiiraa hou e faatere ai i te reira.
3. E tauturu mai te hinaaro i te pue parau mau Bibilia ia aha i roto i te taviniraa?
3 A hinaaro i te pue parau mau Bibilia: Ua hinaaro e ua haafaufaa atoa Iesu i te pue parau mau Bibilia. (Mat. 13:52) Ia hinaaro tatou i te parau mau, e paraparau ïa tatou ma te faaaraara i te anaanatae o te feia e faaroo ra. E tauturu mai te reira ia tiatonu noa i nia i te poroi faufaa ta tatou e faaite ra eiaha râ i nia i to tatou mau taotiaraa, e itoitohia ïa tatou.
4. E nafea ia atuatu i te here?
4 A atuatu i te here: E nafea? Ma te feruri mea nafea to Iehova e Iesu faaiteraa i to raua here e ma te manaˈo i te tupuraa peapea mau i te pae varua o te taata i roto i ta tatou tapura fenua. (Mar. 6:34; Ioa. 1, 4:10, 11) E rahi atu â to tatou hinaaro i te pue parau mau Bibilia maoti te haapiiraa e te feruriruriraa. E tuhaa te here o te hotu a te varua. (Gal. 5:22) Ia pure ïa tatou ia Iehova ia horoa mai i to ˈna varua moˈa e ia faarahi atu â i to tatou here. (Luka 11:13; Ioa. 1, 5:14) Noa ˈtu eaha te faito i noaa ia oe i te haapiiraa, to oe ite i te parau mau, e to oe mau aravihi, e riro oe ei taata haapii maitai ia faaite oe i te here.