Te faufaaraa o te pure
1. Eaha te titauhia no te rave i ta tatou taviniraa?
1 Eita e maraa ia tatou te taviniraa aita anaˈe Iehova e horoa mai i te puai no te rave i te reira. (Phil. 4:13) E faaohipa Oia i ta ˈna mau melahi no te aratai ia tatou i te feia e au i te mamoe. (Apo. 14:6, 7) Na Iehova e faatupu i te mau huero o te parau mau ta tatou i tanu e i faarari. (Kor. 1, 3:6, 9) E mea faufaa mau â ia pure te mau tavini a te Atua i to tatou Metua i te raˈi!
2. No teihea mau mea e pure ai?
2 No tatou iho: Ia pure tatou i te mau taime atoa e poro ai tatou. (Eph. 6:18) No teihea mau mea e pure ai? E nehenehe tatou e pure ia noaa ia tatou te mǎtaˈu ore e te manaˈo maitai no nia i ta tatou tuhaa fenua. (Ohi. 4:29) E ani paha tatou ia Iehova ia aratai ia tatou i te feia aau tia ia haapii hoi ratou i te Bibilia. E pure poto paha tatou ia Iehova i roto i to tatou aau ia tauturu mai oia ia pahono tatou ma te tano i te hoê uiraa. (Neh. 2:4) E ani atoa paha tatou i te paari ia vai noa ta tatou taviniraa i te parahiraa matamua. E oaoa atoa Iehova ia haamauruuru tatou ia ˈna no te haamaitairaa e fanaˈohia ra e tatou ei tavini na ˈna.—Kol. 3:15.
3. E nafea ta tatou mau pure e turu ai i te pororaa?
3 No vetahi ê: Ia “pure” atoa tatou “te tahi i te tahi,” i te tahi taime ma te faahiti paha i te iˈoa o to tatou mau hoa haamori. (Iak. 5:16; Ohi. 12:5) Ua iti mai anei ta oe ohipa pororaa no te maˈi? A pure ïa no te feia poro ea maitai. Eiaha roa ˈtu e haafaufaa ore i te puai o ta oe mau pure no ratou! E mea tano atoa ia pure ia maitai te manaˈo o te feia mana i nia i te pororaa ‘ia parahi hauti ore to tatou mau taeae ma te hau.’—Tim. 1, 2:1, 2.
4. No te aha e tamau uˈana maite ai i te pure?
4 Eita e tia ia faaite i te parau apî maitai na te mau fenua atoa ma to tatou iho puai. Ia “tamau uˈana maite â [tatou] i te pure,” e poro tatou maoti te tauturu a Iehova.—Roma 12:12.