E faaite ta tatou taviniraa i to tatou here i te Atua
1. No to ˈna here i te Atua i aha ˈi Iesu?
1 No to ˈna here i rave ai Iesu i ta ˈna taviniraa. Ua haapapu mau te mau tuhaa atoa o ta ˈna taviniraa i to ˈna here no Iehova. Ua parau Iesu e: “Ia ite . . . to te ao e, te hinaaro nei au i te Metua, e te haapao nei au i ta ˈna i faaue mai ia ˈu.” (Ioa. 14:31) Ei pǐpǐ a Iesu, e fanaˈoraa taa ê atoa ta tatou e faaite i to tatou here hohonu i te Atua i roto i ta tatou taviniraa.—Mat. 22:37; Eph. 5:1, 2.
2. E turai to tatou here no Iehova ia tatou ia aha i roto i te taviniraa?
2 “Ia raa to oe iˈoa”: Ia paraparau tatou ma te itoito rahi ia vetahi ê no nia ia Iehova e to ˈna Basileia, te faaite ra ïa tatou i to tatou here no te Atua e te faaraa ra hoi tatou i to ˈna iˈoa. (Sal. 83:18; Ezek. 36:23; Mat. 6:9) E faaite noa ta tatou taviniraa, mai ta Iesu, i to tatou hinaaro mau ia raa te iˈoa o Iehova e ia tupu to ˈna hinaaro.—Mat. 26:39.
3. E nafea to tatou here no Iehova e tauturu mai ai ia faaruru i te mau fifi?
3 No te here e faaruru ai tatou i te mau fifi: E hau ê to tatou here no Iehova i te mau haafifiraa atoa. (Kor. 1, 13:4, 7) Ua farerei Iesu i te tahi mau tupuraa o te nehenehe hoi e tapea ia ˈna eiaha ia rave i ta ˈna taviniraa. Ua tauturu atu râ to ˈna here hohonu e to ˈna hinaaro e tavini ia Iehova ia faaruru i te mau fifi atoa. (Mar. 3:21; Pet. 1, 2:18-23) E rave rahi atoa fifi to tatou. Na to tatou râ here no te Atua e tauturu mai ia faaruru atu. Ma te pee i te hiˈoraa o te Mesia, e rave tatou i ta tatou taviniraa ma te tiaturi e te toaruaru ore. Noa ˈtu te patoiraa a te fetii, te maˈi, te matahiti rahi, aore ra te tâuˈa ore rahi, eita tatou e faaea i te faaite i to tatou here no Iehova ma te rave maite i ta tatou taviniraa.
4. Te horoa maira to tatou here no Iehova i teihea fanaˈoraa taa ê?
4 Mea puai te here e mea fanaˈo tatou. E nehenehe hoi tatou e faaite i to tatou here taatoa no te Atua i roto i ta tatou taviniraa. (Kor. 1, 13:13) A piri oioi mai ai te taime e raa roa ˈi te iˈoa o Iehova, ia ‘tupu maite â to tatou hinaaro e ia rahi atu â.’—Phil. 1:9; Mat. 22:36-38.