E haapuai te pororaa ia tatou i te pae varua
1. Eaha te maitai ta te ohipa pororaa e horoa mai?
1 E nehenehe te apitiraa ma te itoito i te ohipa pororaa e haapuai ia tatou i te pae varua e e faarahi i to tatou oaoa. Parau mau, e ohipa tatou i roto i te taviniraa na mua roa no te faaoaoa ia Iehova. Teie râ, ma te auraro i te faaueraa e ‘faaite hua i te parau,’ e fanaˈo tatou i te mau haamaitairaa a Iehova e e maitai atoa tatou i roto i te tahi atu mau tuhaa. (Tim. 2, 4:2; Isa. 48:17, 18) E nafea râ te pororaa e haapuai ai e e faaoaoa ˈi ia tatou?
2. E nafea te taviniraa e haapuai ai ia tatou?
2 Haapuaihia e haamaitaihia: E faaitoito te pororaa ia tatou ia haapao i te mau faufaa a te Basileia eiaha râ i te mau fifi e farereihia ra. (Kor. 2, 4:18) E haapuai te faataaraa i te mau haapiiraa bibilia i to tatou faaroo i ta Iehova mau parau fafau e e faarahi i to tatou mauruuru no te parau mau. (Isa. 65:13, 14) A tauturu ai tatou ia vetahi ê ia rahi mai i te pae varua ia ‘ore ratou ia riro i to teie nei ao,’ e haapapu tatou i ta tatou iho faaotiraa e faataa ê mai i teie nei ao.—Ioa. 17:14, 16; Roma 12:2.
3. E nafea ta tatou taviniraa e tauturu ai ia tatou ia faahotu i te mau huru maitatai Kerisetiano?
3 E tauturu te apitiraa i te taviniraa ia tatou ia faahotu i te mau huru maitatai Kerisetiano. Ei hiˈoraa, e tauturu te tutavaraa i te ‘faaau ia tatou iho i te mau mea atoa i te taata atoa nei’ ia tatou ia faahotu hau atu â i te haehaa. (Kor. 1, 9:19-23) A paraparau ai tatou i te feia o tei ‘purara e tei faarue-taue-hia mai te mamoe tiai ore ra,’ e haapii iho â tatou i te aumihi e te aumauiui. (Mat. 9:36) E haapii tatou i te faaoromai ia tamau maite tatou noa ˈtu te tâuˈa ore aore ra te patoiraa. E rahi atu â to tatou oaoa ia faaohipa tatou i to tatou oraraa no te tauturu ia vetahi ê.—Ohi. 20:35.
4. Eaha to oe manaˈo i ta oe taviniraa?
4 Auê ïa haamaitairaa ia fanaˈo i te hoê taviniraa o te arue ra i te Ihotaata otahi e au ia haamorihia! E haapuai te taviniraa ia tatou. E haamaitai rahi te reira i te feia o te horoa taatoa ra ia ratou i roto i te ‘faaite-hua-raa ˈtu i te evanelia.’—Ohi. 20:24.