“Ia vai maite outou i roto i te here o te Atua”

1. No teihea fa i neneihia ˈi te buka “Ia vai maite outou i roto i te here o te Atua”?

¹ Te tiai ru nei tatou i te hiˈopoa i te buka apî “Ia vai maite outou i roto i te here o te Atua” i te Haapiiraa bibilia a te amuiraa mai te hebedoma o te 23 no Fepuare atu! Te faaoti ra te rata a te Tino aratai na te taata taitahi e here ra ia Iehova ma teie mau parau: “Te tiaturi mau nei matou e e tauturu teie buka ia oe ia tamau i te faaohipa i te parau mau i roto i to oe oraraa e ia vai maite hoi oe ‘i roto i te here o te Atua e tae noa ˈtu i te ora mure ore ra.’—Iuda 21, MN.”

2. I roto i teihea tuhaa e tauturu ai teie buka apî ia tatou?

² Eaha te tiaihia ra: E nafea te mau faaueraa tumu bibilia e tano ai i te pae o te amuimuiraa, faaanaanataeraa, faatura i te mana faatere, ta tatou iho mau peu matauhia, te faaipoiporaa, te mau parau, e te mau peu tutuu? E haamatarohia to tatou manaˈo haava e te mau ture aveia teitei tia faaitehia i roto i te Parau a te Atua. (Sal. 19:7, 8) A rahi atu â ˈi to tatou maramarama i te huru feruriraa o Iehova, na te hinaaro e faaoaoa ia ˈna e turai ia tatou ia faaroo atu i roto i te mau tuhaa atoa o te oraraa.—Mas. 27:11; Ioa. 1, 5:3.

3. No te aha e mea tia ˈi ia apiti hope tatou i te haapiiraa i te hebedoma taitahi?

³ A faaoti i te apiti atu: A faaineine ai oe ia oe, a haamau ei fa e haamaitai i te Atua i rotopu i to ˈna nunaa tei amui mai. (Heb. 13:15) E hiˈopoa amui te amuiraa taatoa i tera buka haapiiraa apî. I te mea e e tuhaa nainai te hiˈopoahia i te mau hebedoma atoa, e nehenehe ïa tatou e faaineine maitai no te faaite atu i ta tatou i haapii. E faaaraara ta tatou mau pahonoraa poto faaineine-maitai-hia ia vetahi ê ia rahi te aroha e ia rave i te mau ohipa maitatai, e e paturu i te hoê aparauraa maramarama e te anaanatae o te tumu parau. (Heb. 10:24) E oaoa rahi atoa tatou ia faaite tatou i to tatou faaroo.

4. No te aha e mea faufaa roa ˈi ia haapao i te mau faaueraa a Iehova?

⁴ I to ˈna po hopea i te fenua nei ei taata, ua taai Iesu i te haapaoraa i te mau faaueraa a Iehova i te vai-maite-raa i roto i to ˈNa here. (Ioa. 15:10) Maoti te tauturu a te buka “Te here o te Atua” e faaoti papu roa ˈtu â ˈi tatou i te faaohipa i te mau faaueraa tumu o te Bibilia i roto i te oraraa o te mau mahana atoa e i te ‘vai maite i roto i te here o te Atua.’—Iuda 21, MN.