E titau te pororaa i te faaoromai
1 E 30 tiahapa matahiti i te maoro, ua oaoa te aposetolo Paulo i te raveraa i te toroa maitai ei poro evanelia. Mai no te mau tutavaraa hoona atoa, ua faaû oia i te tahi mau fifi. (Kor. 2, 11:23-29) Aita râ Paulo i faaea. (Kor. 2, 4:1) Ua taa ia ˈna e no ǒ mai ia Iehova ra te puai no te faaoromai i roto i ta ˈna taviniraa. (Phil. 4:13, MN) No to ˈna hiˈoraa o te faaoromai haapao maitai, ua tia ia Paulo ia parau e: “Ei pee mai outou ia ˈu mai ia ˈu atoa e pee i te Mesia nei.”—Kor. 1, 11:1.
2 E faaoromai i te mau fifi i teie tau: I te mau mahana atoa, mea rahi o to tatou mau taeae o te faaruru ra i te tâhitohitoraa, te patoiraa, aore ra te tâuˈa ore o te mau melo utuafare, hoa ohipa, aore ra hoa haapiiraa. (Mat. 10:35; Ioa. 15:20) Peneiaˈe o oe atoa. I te tahi aˈe pae, te faaû ra paha oe i te hoê maˈi, aore ra te faaitoito ra paha oe i te mau mahana atoa i te patoi i te mau faaanaanataeraa e faahemaraa o te tamata i to oe faaroo e faaoromai. E noaa mai te puai ma te feruriruri i te mau hiˈoraa o te mau tavini haapao maitai i tahito e to te mau hoa Kerisetiano i teie tau atoa, o tei faaruru e tei upootia i nia i te mau fifi.—Pet. 1, 5:9.
3 E noaa mai te puai no te mau papu i roto i ta tatou taviniraa ia papu ia tatou e te ‘ahu ra tatou i te haana tamaˈi atoa a te Atua.’ (Eph. 6:10-13, 15) E mea faufaa roa atoa ia pure i te Atua no te ani i te faaoromai. E horoa mai oia i to ˈna varua moˈa ia nehenehe tatou e faaoromai i te mau fifi. (Kor. 2, 6:4-7) No te upootia i roto i ta tatou aroraa pae varua, e titauhia ia haapao tatou i te mau haamanaˈoraa a te Atua no te faaapî i to tatou feruriraa. (Sal. 119:24, 85-88) Mai te hoê tamarii o te taio na nia iho noa i te hoê rata ta to ˈna papa hamani maitai i papai na ˈna, e taio tatou i te Bibilia i te mau mahana atoa, o te haapaari hoi i to tatou mau taairaa e o Iehova. E noaa ia tatou te paari no te faaruru i te mau fifi maoti ta tatou iho haapiiraa tamau, a nehenehe atu ai te mau manaˈo o te Atua e ohipa i nia i ta tatou mau faaotiraa e e haapuai i to tatou haapao maitai.—Mas. 2:10, 11.
4 E hopoi mai te faaoromai i te mau maitai: Mai ia Paulo, te faahotu nei tatou i te faaoromai haapao maitai i roto i te taviniraa, o te faaoaoa hoi i te aau o Iehova e o te hopoi mai i te mau maitai na tatou e na vetahi ê. (Mas. 27:11) E faaoti papu anaˈe ïa e tamau maite i roto i te taviniraa, a haapapu atu ai e e faaroo mau papu to tatou e “tei rahi roa te maitai i to te auro moe noa nei, tamata noâ i te auahi.”—Pet. 1, 1:6, 7.