E taoˈa faufaa rahi ta tatou e tufa ˈtu
1 Mea rahi roa te taoˈa faufaa rahi pae varua ta tatou e poihere ra i roto i te Parau a te Atua. (Sal. 12:6; 119:11, 14) I te hoê mahana, ua faaohipa Iesu i te mau faahohoˈaraa e faataa ra i te mau tuhaa taa ê o te Basileia, e ua ui atura i ta ˈna mau pǐpǐ: “Ua ite outou i teie atoa nei mau parau?” I to ratou pahonoraa e, parau ihora oia ia ratou: “Te mau papai parau atoa i haapiihia i te parau o te basileia o te ao ra, e au ïa i te taata utuafare, o tei hopoi mai i te mea apî e te mea tahito no roto i ta ˈna ra pueraa.”—Mat. 13:1-52.
2 E nehenehe te pue parau mau bibilia ta tatou i ite i to tatou haamataraa i te haapii e hiˈohia mai te mau taoˈa tahito. A haere ai tatou i mua i roto i ta tatou iho haapiiraa i te mau mea hohonu o te Parau a te Atua, e ite tatou i te tahi atu â pue parau mau bibilia, te riro no tatou ei taoˈa apî. (Kor. 1, 2:7) Oia atoa, na roto i “te tavini haapao maitai e te paari,” e ite tatou i te mau taoˈa apî.—Mat. 24:45.
3 E haafaufaa rahi tatou i teie mau taoˈa pae varua, tahito e apî. E turai te reira ia tatou ia imi i te fanaˈo i te faaineineraa e te aravihi ei orometua haapii i te Parau a te Atua, ma te faaite noa ˈtu ia vetahi ê i te pue parau mau faufaa rahi ta tatou i haapii.
4 A haapii na roto i to Iesu hiˈoraa: No te faaite eaha to ˈna manaˈo i teie mau taoˈa, ua tutava Iesu i te faaite i te reira ia vetahi ê. Noa ˈtu e ua rohirohi oia, aita oia i faaea i te faaite i te mau taoˈa no roto mai i ta ˈna “fare vairaa.”—Ioa. 4:6-14.
5 Ua turai to Iesu here no te feia veve i te pae varua ia ˈna ia tufa ˈtu i te mau taoˈa faaora o te pue parau mau a te Atua. (Sal. 72:13) Ua aroha oia i te feia poia i te pae varua e ua turaihia ia ‘haapii ia ratou i te parau e rave rahi.’—Mar. 6:34.
6 A pee ia Iesu: Ia haafaufaa rahi roa tatou i ta tatou mau taoˈa, e hinaaro oioi tatou, mai ia Iesu, e faaite i te taata i te mau taoˈa maitatai pae varua i roto roa i te Bibilia. (Mas. 2:1-5) Noa ˈtu e e rohirohi tatou i te tahi taime, e paraparau tatou no nia i te pue parau mau bibilia ma te aau tae haavare ore. (Mar. 6:34) E turai to tatou mauruuru hohonu no ta tatou mau taoˈa ia tatou ia rave rahi i roto i te taviniraa, ma te imi maite noa i te apiti rahi atu â.