E tarahu ta tatou i to tatou taata-tupu
1 Ua manaˈo te aposetolo Paulo e e mea tia ia poro oia i te mau taata. Ua ite o ˈna e ua rave Iehova e ia nehenehe te taata atoa ia ora maoti te toto taoˈa ra o ta ˈna Tamaiti. (Tim. 1, 2:3-6) No reira oia i parau ai e: “E amutarahu vau na te Heleni, e na te taata ěê; na te feia paari, e na te ite ore.” Ma te tuutuu ore e ma te ru, ua aufau maitai oia i ta ˈna tarahu i to ˈna taata-tupu ma te poro ia ratou i te parau apî maitai.—Roma 1:14, 15; MN.
2 Mai ia Paulo, te tutava nei te mau Kerisetiano o to tatou nei tau i te poro i te parau apî maitai i to ratou taata-tupu i te mau taime atoa. No te “ati rahi” e fatata oioi maira, e mea ru ia imi tatou i te mau taata e anaanatae mau ra. Ia turai ïa to tatou here haavare ore no to tatou taata-tupu ia tatou ia haa i roto i teie ohipa faaora!—Mat. 24:21; Ezek. 33:8.
3 E aufau anaˈe i ta tatou tarahu: Te farerei nei iho â tatou i te mau taata ia poro tatou i tera fare i tera fare. I roto i te mau tuhaa fenua e rave rahi taata aita to te fare ia haere atu tatou, e papai maitai tatou e e hoˈi tatou i te tahi atu taime; e farerei aˈe ïa tatou ia ratou i te fare. (Kor. 1, 10:33) E nehenehe atoa tatou e horoa i te faaiteraa i te mau vahi tapihooraa, i roto i te mau aroâ, i roto i te mau ô, i te mau vahi tapearaa pereoo e na roto i te niuniu paraparau. E uiui anaˈe ïa: ‘Te rave ra anei au i te nehenehe aˈe ia ˈu no te faaohipa i te mau raveraa atoa o te pororaa ia parauhia te poroi o te ora?’—Mat. 10:11.
4 Ua manaˈo te hoê tuahine pionie e e tuhaa rahi na ˈna te farereiraa i te mau taata atoa i roto i ta ˈna tuhaa fenua. I te hoê râ fare, e piri noa na te mau maramarama e ma te taata ore noa i reira. I te hoê râ mahana, i te hoê taime aita o ˈna i roto i te pororaa, ua ite o ˈna i te hoê pereoo i mua i tera fare ma te taata ore noa i reira. No to ˈna hinaaro ore e ere i tera ravea maitai, ua pate o ˈna i te ǒe. Ua pahono mai te hoê taata, e i muri aˈe i ta raua tauaparauraa, ua hoˈi faahou te tuahine na muri i ta ˈna tane e rave rahi taime. I te pae hopea, ua farii te taata i te hoê haapiiraa bibilia, e i teie nei, e taeae bapetizohia oia. Ua mauruuru o ˈna i to teie tuahine manaˈoraa e e mea tia ia ˈna ia poro ia vetahi ê.
5 Te poto nei te taime, teie te taime e aufau ai tatou i ta tatou tarahu i to tatou taata-tupu ma te haa puai i roto i te ohipa pororaa.—Kor. 2, 6:1, 2.