E tamau noa anaˈe i te poro
1 E mau taime ati rahi teie. E mea matauhia te mau aroraa tivira, te mau tamaˈi nunaa, te mau ati natura e vetahi atu mau tupuraa ino mau. I teie mahana, e hinaaro hau atu â te huitaata e faaroo i te mau parau apî oaoa. Mea rahi râ aita e tâuˈa ra i te mau mea pae varua. I te tahi mau vahi, e mea fifi ia farerei i te taata i te fare, e mea fifi atu â ia ite i te taata e hinaaro e faaroo mai aore ra e haapii i te Bibilia. Noa ˈtu râ, e mea faufaa roa ia tamau noa tatou i te poro i te parau apî maitai o te Basileia o te Atua i haamauhia.—Mat. 24:14.
2 Te here i te taata: E haapapu ta tatou pororaa i to Iehova here i te taata. “Aita roa [oia] i hinaaro e ia pohe atu te hoê, ia noaa paatoa râ te tatarahapa.” (Pet. 2, 3:9; Ezek. 33:11) No reira oia i faaoti ai e, mai ta Iesu i parau, “e mata na . . . te evanelia i te faaite-haere-hia i te mau fenua atoa nei.” (Mar. 13:10) Te titau nei te Atua i te taata ia fariu ia ˈna ra no te ora ˈtu i te haavaraa e faataehia i mua nei i nia i ta Satani ao. (Ioe. 2:28, 29, 32; Zeph. 2:2, 3) Aita anei tatou e mauruuru ra e ua pûpû mai Iehova i tera ravea ia tatou atoa?—Tim. 1, 1:12, 13.
3 Te faaite ra te tapura na te ao atoa e, i te roaraa o te matahiti taviniraa 2004, ua faaterehia i te faito au noa e 6 085 387 haapiiraa bibilia i te avaˈe taitahi e fatata e 5 000 pǐpǐ apî tei bapetizohia i te mau hebedoma atoa! Ua farereihia vetahi o ratou no to Iehova haamaitairaa i te mau tutavaraa tuutuu ore a te feia poro tei faaitoito i te paraparau i te taata atoa i roto i ta ratou tuhaa fenua. Ua faatupu te reira i te oaoa rahi i roto i te mau amuiraa e e auê ïa fanaˈoraa taa ê te riroraa ei hoa rave ohipa no te Atua i roto i tera ohipa faaoraraa!—Kor. 1, 3:5, 6, 9.
4 E arue anaˈe i to te Atua iˈoa: E tamau noa tatou i te poro no te arue ia Iehova i mua i te taata e i te faaraa i to ˈna iˈoa i mua i te huitaata atoa. (Heb. 13:15) Ua haavare Satani “i to te ao atoa nei” ia tiaturi ratou e aita e ravea ta te Atua no te faaafaro i te mau fifi o te huitaata, aita oia e tâuˈa ra i to ratou mauiui, aore ra e aita e Atua. (Apo. 12:9) Na roto i ta tatou pororaa, e paruru tatou i te parau mau no nia i to tatou Metua hanahana i te raˈi. Ia tamau noa tatou i te arue i to ˈna iˈoa—i teie nei e a muri noa ˈtu!—Sal. 145:1, 2.