E faaohipa maitai anaˈe i te mau buka tahito
1 I te mau vahi atoa o te fenua, ua î te mau fare vairaa buka i te mau mirioni buka tahito. E mau haamaitairaa mure ore anei ta te huitaata e huti mai nei? (Koh. 12:12) Mea faufaa roa ˈtu â te mau papai o te haamatara ra i te Basileia o te Atua e ta ˈna mau haamaitairaa no te huitaata nei. Te pue noa ra ta te rahiraa o te mau amuiraa i taua huru buka ra e rave rau i neneihia hou te matahiti 1985. E pûpû ïa tatou i te reira i te avaˈe Tenuare.
2 E mea faufaa mau ratou: Te manaˈo nei paha tatou e ua tahito teie mau buka, ia faaauhia i te mau papai apî. Ia haamanaˈo râ tatou e tei roto te parau mau i hutihia mai roto mai i te mau Papai. Te faufaa noa râ te poroi o te Basileia i faataahia i roto, i teie mahana, e e nehenehe oia e haapapu i te faaoraraa o te taata e haapao ra i te reira. (Ioa. 17:3) No reira, e tutava taa ê anaˈe ïa no te faaohipa maitai i teie mau buka tahito.
3 Teie te hoê tupuraa o te haamatara nei i to ratou faufaaraa. Ua tufa te hoê vahine i te mau papai e rave rahi a te mau Ite no Iehova no ǒ mai i to ˈna mama ruau ra. Ua ani aˈera te hoê vahine poro ia ˈna e ua ite anei oe eaha te faufaaraa mau o teie pueraa buka. Ua pahono atura teie vahine e: “I te mea mau, aita vau i ite i to ratou faufaaraa. Nafea hoi e itea mai ai ia ˈu?” Ua farii oia i te hoê haapiiraa Bibilia e ua ite aˈera oia i te faufaaraa e vai ra i roto i te pueraa buka a to ˈna mama ruau. Aita anei ïa taua haapueraa buka tahito ra i riro mai ei tufaraa faufaa?
4 E pûpû rahi anaˈe i te reira: E pûpû anaˈe i te mau buka tahito na te mau fare, i te mau taata atoa râ ta tatou e hoˈi faahou e farerei e mea au na ratou ia taio i ta tatou mau papai, i te feia i tamatahitihia i Te Pare Tiairaa e te A ara mai na! e i te mau taata o ta tatou eˈa opereraa vea atoa. E nehenehe atoa vetahi o taua mau buka ra e horoa mai na te mau taata o ta tatou e haapii ra i te hoê ite no nia e rave rahi mau mea o te faarahi atu â i to ratou maramarama no nia i te parau mau. E haamanaˈo anaˈe atoa e faaî i ta tatou iho vairaa buka. E riro mai ïa te reira ei pueraa buka teotaratia faufaa na tatou, i reira tatou e hiˈo ai ia faufaahia ta tatou mau taime haapiiraa tataitahi.
5 Eiaha tatou e faataoto i ta tatou mau buka tahito. E faaohipa maitai anaˈe i taua mau buka ra no te faaitoito i te mau taata ta tatou e farerei ‘ia mǎtaˈu i te Atua mau e ia haapao i ta ˈna mau faaueraa.’—Koh. 12:13.