Pahonoraa i ta outou mau uiraa

◼ Eaha ta tatou e nehenehe e rave no te haamaitai i te manuïaraa o ta tatou mau putuputuraa?

E nehenehe vetahi e manaˈo e o te mau matahiapo e te mau tavini tauturu anaˈe te tumu o te manuïaraa o te mau putuputuraa a te amuiraa no te mea na ratou e faatere ra e e vauvau ra i te rahiraa o te mau tumu parau. Inaha, e nehenehe ta tatou tataitahi e turu no te faariroraa i te mau putuputuraa ei mea au roa e te faufaa. E nehenehe tatou e amui atu i teie hoê ahuru ravea i te manuïaraa o te mau putuputuraa:

E faaineine anaˈe ia tatou. Ia faaineine maitai anaˈe tatou i te mau putuputuraa, e huti te reira i to tatou ara-maite-raa. Mai te peu e e na reira tatou paatoa, e hau atu ïa te oraora-maitai-raa e te faufaaraa o te mau putuputuraa. E haere tamau atu tatou. Mea itoito aˈe no tatou tataitahi i te iteraa e rave rahi taata o tei amui mai; te taa maitai aˈe ra ïa ia tatou i te faufaaraa ia haere i te mau putuputuraa. E haere mai tatou i te hora tia. Mai te peu e ua parahi tatou na mua aˈe i te haamataraa o te putuputuraa, e fanaˈo ïa tatou i te himene omuaraa e te pure, e e fanaˈo ïa tatou i te taatoaraa o te putuputuraa. E haere anaˈe mai ma te ineine maitai. Ia rave mai tatou i ta tatou Bibilia e te mau papai e faaohipahia i te putuputuraa, e nehenehe ïa tatou e apee e e taa maitai aˈe i te mau tumu parau e tuatapapahia ra. Eiaha tatou e vaiiho ia tatou ia nevanevahia. E faaroo maitai tatou mai te peu e e parahi tatou i mua. E haafifi te mau paraparauraa mǎrû e te mau haereraa e hoˈiraa i te vahi haumitiraa ia tatou e te tahi atu mau taata atoa. E riro anaˈe ei feia apiti. Mai te peu e e rahi noa ˈtu â te taata i tae mai i te amo i te rima i nia e i te horoa i te hoê pahonoraa, e faaitoito e e patu hau atu â ïa ta ratou mau faaiteraa i te faaroo i te mau taeae e te mau tuahine. E horoa anaˈe i te mau pahonoraa poto. E turai te reira i te rahiraa ia pahono. E tia ia tatou ia horoa i ta tatou mau pahonoraa, mea poto iho â râ, ia au i te mau tumu parau e tuatapapahia ra. E hohora anaˈe i ta tatou mau tumu parau. Noa ˈtu e e feia haapii tatou i roto i te Haapiiraa o te taviniraa teotaratia aore ra te apiti ra tatou i roto i te haapiiraa no te taviniraa, e faaineine maitai anaˈe ia tatou, e hiˈo faahou i ta tatou mau tumu parau e e tutava anaˈe eiaha e faaore i te reira. E haapopou anaˈe i te feia e tumu parau ta ratou. E faaite anaˈe ia vetahi ê e te mauruuru nei tatou i ta ratou mau tutavaraa. E faaitoito e e horoa te reira ia ratou i te hinaaro e haamaitai atu â a muri aˈe. E faaitoito tatou i te tahi e te tahi. E rahi atu te mauruuru e te mau haamaitairaa e fanaˈohia i te haereraa i te mau putuputuraa na roto i te hoê aroha auhoa e te mau tauaparauraa anaanatae na mua aˈe e i muri aˈe i te mau putuputuraa.