Ia riro tatou ei hiˈoraa i te parau e i te haerea
1 Ua faaue te aposetolo Paulo ia Timoteo ia riro ei hiˈoraa i te parau e i te haerea. (Tim. 1, 4:12) Tatou atoa, e tia i ta tatou mau parau e to tatou haerea ia riro ei hiˈoraa, ia rave iho â râ tatou i ta tatou taviniraa, no te mea na te reira e faataa ahiri e e haaputapû tatou i te mafatu o te taata o ta tatou e farerei, aore ra eita.
2 E tia ia itehia ta tatou mau peu maitatai i roto i te mau tuhaa atoa, e to tatou iho â râ haerea faatura, to tatou tâuˈaraa ia vetahi ê, to tatou maitai, ta tatou peu mǎrû e te tanotanoraa o ta tatou parau. Ia faaite anaˈe tatou i teie mau huru maitatai, e faaite atoa ïa tatou e te taa ra ia tatou i te mana o ta tatou mau ohipa i nia i te huru hohonu o vetahi ê. E nehenehe te mau peu maitatai i roto i te taviniraa, e faaauhia i te tamitiraa i te maa no te haamaitai roa ˈtu â i to ˈna au. Ahiri e eita e tamitihia, aita e auraa to te maa maitai e eita atoa e aminamina. Hoê â huru ia erehia tatou i te mau peu maitatai i roto i to tatou mau taairaa e o vetahi ê.—Kol. 4:6.
3 Ia riro tatou ei hiˈoraa i te parau: Ua riro te mata ataata e te auhoa e te aroharaa mahanahana maitai, ei mau tuhaa faufaa roa o ta tatou faaiteraa i te parau apî maitai. Ia “tamiti” tatou i ta tatou omuaraa parau ma te mahanahana e te tae mau o te aau, e taa i te taata e te anaanatae mau ra tatou ia ˈna. Ia paraparau anaˈe oia, e tia ia tatou ia faaroo maitai i ta ˈna parau e ia faatura iho â i to ˈna manaˈo. Ia paraparau anaˈe tatou, e faahiti tatou i te parau e tano e te mǎrû atoa.—Hiˈo Ohipa 6:8.
4 I te tahi mau taime, e farerei tatou i te hoê taata patoi, e te iria atoa paha. Nafea ïa tatou? Ua faaue mai Petero ia tatou ia paraparau “ma te mǎrû e te auraro maite atu.” (Pet. 1, 3:15; Roma 12:17, 18) Ua parau o Iesu e, ia patoi etaeta mai te hoê taata i te poroi o te Basileia, ‘e ueue noa ˈtu tatou i te repo o to tatou avae.’ (Mat. 10:14) Ia faaite noa tatou i te mau peu maitatai roa i roto i teie mau huru tupuraa, peneiaˈe e nehenehe tatou e tamǎrû i te mafatu o te feia e patoi mai ia tatou.
5 Ia riro tatou ei hiˈoraa i te haerea: No te poro i te parau apî maitai na te mau aroâ e i nia i te mau mahora e haerehia e te taata, e tia ia tatou ia faatura i te taata, ia ore e huti rahi roa i te ara-maite-raa, ia ore roa e onoono e ia ore atoa e haapeapea i te taata. Ia fariihia tatou i roto i te fare o te taata e anaanatae mai, e tia ia tatou ia riro ei taata ite i te peu, ia faatura ˈtu i te taata i titau manihini mai ia tatou, e ia faaite i to tatou mauruuru no to ˈna farii maitai. E tia i te tamarii tei na muri iho mai ia tatou, ia faatura i te feia i farii mai ia tatou e ta ratou mau tauihaa, e ia faaroo maitai atoa i te aparauraa. E hiˈoraa au ore roa te horoahia e te mau tamarii turituri.—Mas. 29:15.
6 Na nia i to tatou huru rapaeau, e tia ia ite oioi noa te taata e e mau tavini tatou no te Parau a te Atua. Eiaha tatou ia faanehenehe e ia faaeta ma te haapao ore e te tâuˈa ore, eiaha atoa ma te faaiteite rahi roa e te huru ê. Ia vai tura noa to tatou huru rapaeau mai tei au i te parau apî maitai! (Hiˈo Philipi 1:27.) Ia ara maitai tatou i to tatou huru e ta tatou mau tauihaa, eita ïa tatou e riro ei tumu turoriraa no vetahi ê aore ra ei tumu ia faainohia ta tatou taviniraa. (Kor. 2, 6:3, 4) Na ta tatou mau parau e to tatou haerea tei riro ei hiˈoraa, e faarahi atu â i te anaanatae o te poroi o te Basileia, e e faahanahana atoa ia Iehova.—Pet. 1, 2:12.