E haere anaˈe ma te faaroo

¹ E mau mirioni taata o te patu nei i to ratou oraraa i nia i te mau taoˈa materia, a tuu ai ratou ma te maamaa i to ratou tiaturi i roto i te mana haavare o te faufaa. (Mat. 13:22) E oto râ ratou ia erehia ratou i ta ratou mau faufaa, ia eiâhia, aore ra ia ite ratou e aita hoê aˈe faufaa. Te aˈo-puai-hia ra tatou ia pee i te hoê eˈa hau aˈe i te paari, i te imi-hua-raa i te mau taoˈa i te pae varua. (Mat. 6:19, 20) Te auraa ra, e tia ia tatou ‘ia haere ma te faaroo.’—Kor. 2, 5:7.

² E huriraa te taˈo ra “faaroo” no te hoê parau Heleni oia hoi to ˈna auraa, te tiaturi, te manaˈo papu maitai. E haere ma te faaroo, oia ïa te auraa, e faaruru i te mau haafifiraa ma te tuu i to ˈna tiaturiraa i roto i te Atua, ma te turui i nia i to ˈna aravihi no te aratai i to tatou mau taahiraa avae e to ˈna hinaaro e haamâha i to tatou mau hinaaro. O Iesu te hiˈoraa tia roa; ua vai noa to ˈna feruriraa i nia i te mea faufaa mau. (Heb. 12:2) Oia atoa, e tia ia rotahi to tatou mafatu i nia i te mau mea i te pae varua, o tei ore e itehia e te mata. (Kor. 2, 4:18) Ia taa noa ia tatou e mea papu ore roa teie nei oraraa, e ia farii tatou e tei te Atua ra to tatou ora taatoa.

³ E tia atoa ia papu maitai to tatou manaˈo e te aratai nei Iehova ia tatou na roto i ta ˈna faanahonahoraa ite-mata-hia, i raro aˈe i te aratairaa a “te tavini haapao maitai e te paari.” (Mat. 24:45-47) E faaite tatou i to tatou faaroo na roto i te ‘auraroraa i te feia e aratai nei’ i te amuiraa. (Heb. 13:17) Te faaite ra te peeraa ma te haehaa i te mau faanahoraa teotaratia, e te tiaturi nei tatou ia Iehova. (Pet. 1, 5:6) E turaihia tatou ia turu taatoa ma te faaherehere ore i te ohipa tei horoahia na te faanahonahoraa. E na reira, taati-puai-hia e te here e te tahoê, e haafatata ˈtu ïa tatou i to tatou mau taeae.—Kor. 1, 1:10.

⁴ Nafea ia haapuai i to tatou faaroo: Eiaha e vaiiho i to tatou faaroo ia pohe. E tia ia tatou ia haa i te hoê aroraa puai ia tupu oia i te rahi. Na te tamauraa i roto i te haapiiraa, te pure e te haereraa i te mau putuputuraa, e tauturu ia tatou ia haapuai i to tatou faaroo, e na roto i te tauturu a Iehova, e nehenehe oia e faaruru i te mau huru tamataraa atoa. (Eph. 6:16) Ua haamau anei tatou i te hoê porotarama maitai na tatou iho, no te taioraa i te Bibilia i te mau mahana atoa e no te faaineineraa i te mau putuputuraa? Te feruri pinepine ra anei tatou i nia i te mea o ta tatou e haapii nei, e te haafatata ra anei tatou ia Iehova na roto i te pure? E peu matauhia anei na tatou ia haere i te mau putuputuraa atoa e ia horoa i te pahonoraa ia nehenehe anaˈe?—Heb. 10:23-25.

⁵ E itehia te hoê faaroo puai na roto i te mau ohipa maitatai. (Iak. 2:26) Hoê o te mau ravea maitatai roa ˈˈe no te faaite i to tatou faaroo, o te paraparauraa ïa ia vetahi ê no nia i to tatou tiaturiraa. Te tamoemoe ra anei tatou i te mau taime e tano no te faaite atu i te parau apî maitai? Ia taui rii tatou i te huru o to tatou oraraa, e nehenehe anei ta tatou e rave hau atu â i roto i te pororaa? Te pee ra anei tatou i te mau manaˈo e horoahia maira no te haamaitai i te huru e te aravihi o ta tatou taviniraa? Te haamau ra anei tatou i te mau tapao no tatou iho i te pae varua e te tutava ra anei tatou e ia naeahia?

⁶ Ua faaara Iesu ia tatou i te atâtaraa ia pau rahi roa te taime i roto i te mau ohipa matauhia o te oraraa, e ia vaiiho i te mau hinaaro i te pae materia aore ra miimii ia haamohimohi i to tatou mata i te pae varua. (Luka 21:34-36) E tia ia tatou ia ara maitai i ta tatou huru haereraa, ia ore tatou ia iri i te pae no to tatou faaroo. (Eph. 5:15; Tim. 1, 1:19) Te hinaaro nei tatou pauroa e parau ia tae i tera mahana e: “I tô na vau i te tôraa maitai, ua oti to ˈu hororaa, i mau maite na vau i te [“faaroo,” MN].”—Tim. 2, 4:7.