Te haamanaˈo ra anei outou?

E nehenehe anei outou e pahono i teie mau uiraa o tei niuhia i nia te mau tumu parau haapiiraa o Te Pare Tiairaa 2019?

Eaha te auraa o ta te Atua parau fafau, “Te mauhaa ra no oe i hamanihia ˈi ra, e ore ïa e tupu”? (Isa. 54:17)

E paruru te Atua ia tatou i mua i to tatou mau enemi. (Isa. 25:4, 5) Eita roa ta ratou opuaraa e tupu!—w19.01 api 6-7.

I te faautuaraahia to Kanaana e te mau Iseraela faaroo ore, mea nafea Iehova i te haapapuraa e Atua parau-tia o ˈna?

Ua faautua Iehova i te feia o tei viivii i te peu taotoraa tia ore, oia atoa tei rave ino i te vahine e te tamarii. Ua haamaitai râ oia i te feia i faaroo ia ˈna e tei haa ma te parau-tia i nia ia vetahi ê.—w19.02 api 22-23.

E nafea tatou na te hoê anaˈe taata e ore e tavini ra ia Iehova e faaoti i te pure?

E faaite tatou i te faatura ma te faaea mû noa. Eita râ tatou e parau “amene” e eita atoa e tapea i te rima o te tahi atu i te roaraa o te pure. E nehenehe tatou e faaoti i te pure i roto i to tatou aau.—w19.03 api 31.

No te aha e hara rahi ia rave ino te hoê i te tamarii?

No te mea ua hara oia i tei rave-ino-hia, i te amuiraa, i te feia mana e i te Atua. I te mau fenua te vai ra tera ture, e titauhia i te mau matahiapo ia faaara oioi i te feia mana.—w19.05 api 9-10.

E nafea ia faaapî i to outou huru feruriraa?

A pure ia Iehova, a feruri maite no te ite eaha te titauhia ia outou ia taui e a maiti i te hoa maitatai.—w19.06 api 11.

Eaha te titauhia ia rave i teie nei â no te hamani-ino-raa e tiai mai ra?

Ia piri noa ˈtu â outou ia Iehova. Ia papu atoa mea here na Iehova ia outou e eita roa o ˈna e faarue ia outou. A taio i te Bibilia i te mau mahana atoa e a tamau i te pure. A tiaturi papu e tupu iho â ta ˈna mau parau fafau na roto i ta ˈna Faatereraa arii. A tamau aau i te tahi mau irava Bibilia e himene arueraa.—w19.07 api 2-4.

E nafea ia tauturu i te fetii ia ora mai?

Mea faufaa ia faaite i te aumauiui, te hoê haerea maitai, te faaoromai e ia faahiti i te mau parau tamiti-maitai-hia.—w19.08 api 15-17.

E nafea tatou e tamahanahanahia ˈi mai ta Iesu i parau i roto i te Mataio 11:28?

Na roto i te mau tiaau î i te here, te mau hoa papu e ta tatou taviniraa.—w19.09 api 9.

E nafea te Atua ia tuu i roto ia tatou i te hinaaro e te puai no te rave i ta ˈna e au? (Phil. 2:13)

A taio e a feruri maite ai i ta ˈna Parau, e haapuai te Atua ia tatou ma te tuu i roto ia tatou i te hinaaro e te puai no te rave i te mau mea atoa ta ˈna e au. E horoa te varua o te Atua ia tatou i te titauhia no te rave i to ˈNa hinaaro.—w19.10 api 21.

E nafea tatou hou a rave ai i te faaotiraa faufaa?

A rave i te maimiraa, a ani i te paari i te Atua, a feruri i te tumu e rave ai outou i tera faaotiraa, a haamau i te hoê fa taa maitai e eiaha e titau i te ore e maraa.—w19.11 api 27-29.

Ua parau anei Satani ia Eva e ora ˈtu te tahi mea i roto i te taata ia pohe o ˈna?

Aita. Aita te Diabolo i parau ia Eva e tamau te tahi mea i roto ia ˈna i te ora noa ˈtu e pohe o ˈna. Aita hoê aˈe haapiiraa hape i toe mai i muri aˈe i te diluvi! Ua fa faahou mai tera haapiiraa hape hou a faahuru-ê-hia ˈi te mau reo i Babela.—w19.12 api 15.