A huri i raro i te mau feruriraa hape e patoi ra i te ite no nia i te Atua!

1. Eaha te faaararaa a te aposetolo Paulo i te mau Kerisetiano faatavaihia?

TEIE te faaararaa ta te aposetolo Paulo i horoa i te mau Kerisetiano matamua: “Eiaha . . . outou ia faaau faahou i to outou haerea i to teie faanahoraa o te ao nei.” (Roma 12:2) No te aha oia i aˈo ai i te mau tane e vahine tei pûpû aˈena ia ratou i te Atua e tei faatavaihia i te varua moˈa?—Roma 1:7.

2-3. Eaha ta Satani mau raveraa no te faaatea ê ia tatou ia Iehova e e nafea ia tahitahi i te mau mea i aˈa roa i roto i to tatou feruriraa?

² Ua haapeapea Paulo no te mea ua pee te tahi mau Kerisetiano i te mau feruriraa hape e haapiiraa no ǒ mai i te ao a Satani. (Eph. 4:17-19) Ua rau te raveraa a te Diabolo no te faaatea ê i te mau Kerisetiano ia Iehova. E nehenehe atoa te reira e tupu i nia ia tatou. E faaohipa Satani i to tatou hinaaro tia ore ia itehia tatou e te taata aore ra i te mau mea ta tatou i haapii tei aˈa roa i roto ia tatou.

³ E nehenehe anei e tahitahi i te mau mea atoa i aˈa roa i roto i to tatou feruriraa? (Kor. 2, 10:4) A hiˈo na i ta Paulo i pahono: “Te huri nei hoi matou i raro i te mau feruriraa hape e te mau mea teitei atoa o te patoi ra i te ite no nia i te Atua, e te faatîtî nei matou i te mau manaˈo atoa ia auraro noa i te Mesia.” (Kor. 2, 10:5) E upootia tatou i nia i te mau feruriraa hape maoti te tauturu a Iehova. Mai te huero raau e faaore i te mauiui, e nehenehe atoa te Parau a te Atua e faaore roa i te ino ta te ao a Satani e faatupu i nia i to tatou feruriraa.

“IA TAUI RÂ OUTOU . . . I TO OUTOU FERURIRAA”

4. Eaha te mau tauiraa ta tatou i rave i to tatou haapiiraa i te Bibilia?

⁴ I to tatou haapiiraa i te Bibilia, ua rave tatou i te mau tauiraa i titauhia no te tavini ia Iehova. E rave rahi o tatou tei haapae i te mau peu ino. (Kor. 1, 6:9-11) Auê tatou i te mauruuru i te fanaˈoraa i ta Iehova tauturu!

5. Ia au i te Roma 12:2, eaha na ohipa e piti e titauhia ia rave tatou?

⁵ Noa ˈtu ua taui tatou hou te bapetizoraa, e titauhia ia ara ia ore tatou ia hoˈi faahou i te mau peu ino ta tatou i vaiiho. E nafea ïa? Te pahono ra Paulo: “Eiaha atoa outou ia faaau faahou i to outou haerea i to teie faanahoraa o te ao nei, ia taui râ outou a faaapî ai i to outou feruriraa.” (Roma 12:2) E piti ïa ohipa te titauhia ia rave. Na mua roa, ia faaea tatou i te “faaau faahou” i teie nei ao. A piti, ia “taui” tatou ma te faaapî i to tatou feruriraa.

6. Eaha te haapiiraa faufaa ta Iesu i horoa i roto i te Mataio 12:43-45?

⁶ Aita Paulo i manaˈo i te hoê tauiraa rapaeau noa, i te hoê tauiraa taatoa râ. (A hiˈo i te tumu parau “Tauiraa aore ra faahuaraa?”) Ia faaapî ïa te Kerisetiano i to ˈna feruriraa, huru o roto e to ˈna mau manaˈo turai e tia ˈi. E ui anaˈe ïa ia tatou iho, ‘Ei Kerisetiano, ua taui noa anei au i to ˈu huru rapaeau aore ra ua taui atoa vau i to ˈu aau e feruriraa?’ A hiˈo na i ta Iesu i faataa i roto i te Mataio 12:43-45. (A taio.) Teie te haapiiraa faufaa e huti mai: Eita e navai noa ia tahitahi i te mau manaˈo ino, e titau-atoa-hia râ ia faaî i to tatou feruriraa i te mau manaˈo no ǒ mai i te Atua.

A “FAAAPÎ I TO OUTOU HURU FERURIRAA”

7. E nafea ia taui i to tatou huru o roto?

⁷ E nehenehe mau anei e taui i to tatou huru o roto? Te parau ra te Bibilia: “Ia tamau noa outou i te faaapî i to outou huru feruriraa, e ia ahu mai i te huru taata apî tei poietehia ia au i te hinaaro o te Atua i te parau-tia e te haapao maitai mau ra.” (Eph. 4:23, 24) E, e nehenehe e taui, e titauhia râ te tutavaraa tamau. Eita hoi e titau-noa-hia ia patoi i te mau manaˈo e peu iino, ia taui roa râ i te “huru feruriraa,” oia hoi, te mau hinaaro o to tatou aau, to tatou haerea e manaˈo turai.

8-9. Eaha te auraa ia taui i to tatou huru o roto? A horoa i te hiˈoraa.

⁸ A feruri na i te hoê taeae mea ino i nia i te taata na mua ˈˈe. Ua faaea oia i te inu e i te tupai i te taata, bapetizohia ˈtura oia. E rave rahi o to ˈna oire tei faahiahia i te mau tauiraa ta ˈna i rave. I muri iti noa ˈˈe râ i to ˈna bapetizoraa, ua haere atu te hoê taero ava i to ˈna fare no te imi peapea ia ˈna. Ua faaoromai te taeae i te haamataraa. I to tera râ taata faainoraa i te iˈoa o Iehova, tupai atura te taeae i tera taata. Te ite ra outou i te fifi? Ua tauturu atu ta ˈna haapiiraa Bibilia ia faaea i te tupai i te taata, aita râ te puai e ohipa ra i roto i to ˈna feruriraa i taui. Te auraa, aita o ˈna i taui i to ˈna huru o roto!

⁹ Ua tamau te taeae i te rave i te mau tutavaraa. (Mas. 24:16) Ua tauturu te mau matahiapo ia ˈna ia tamau i te haere i mua i te pae varua e riro maira oia ei matahiapo. I te hoê po, ua tamatahia â to ˈna faaroo. I rapae mai i te Piha a te Basileia, te opua ra te hoê taero ava e tupai i te hoê matahiapo. Eaha ta to tatou taeae i rave? Ma te mǎrû e te haehaa, ua haaferuri oia i te taero ava, mǎrû maira taua taata ra e aratai atura te taeae ia ˈna i to ˈna fare. Te ite ra anei outou i te taa-ê-raa? I roto roa i to ˈna aau, ua riro mai te taeae ei taata haehaa e te faatupu i te hau. Ua faahanahana mau te reira ia Iehova!

10. Eaha te titauhia ia rave no te taui i to tatou huru o roto?

¹⁰ Parau mau, eita to tatou huru o roto e taui taue noa mai. Eita atoa te reira e tupu no te mea mea maoro tatou “i roto i te parau mau.” E titauhia râ ia “tutava maite” i tera e tera matahiti no te taui roa i to tatou huru o roto. (Pet. 2, 1:5) Eaha te nehenehe e tauturu mai? O ta tatou ïa e hiˈopoa mai.

E NAFEA IA TAUI I TO TATOU HURU FERURIRAA?

11. E nafea te pure e tauturu mai ai ia taui i to tatou huru feruriraa?

¹¹ A tahi, a pure. Mea faufaa roa ia pure mai te papai salamo tei parau: “E faaau na oe i te aau mâ i roto ia ˈu nei, e tau Atua. E faahou [aore ra faaapî] na hoi oe i te aau manaˈo tia i roto ia ˈu nei.” (Sal. 51:10) Hou râ a ani ai i te tauturu a Iehova, mea titauhia na mua roa ia hinaaro tatou e taui i to tatou huru feruriraa. Teie ta Iehova i fafau i te mau Iseraela aau tae i te tau o Ezekiela: “E na ˈu e horoa ˈtu i te aau hoê no ratou, e na ˈu e tuu i te varua apî i roto ia ratou . . . e na ˈu e horoa ˈtu i te aau mǎrû [o te farii i ta te Atua aratairaa].” (Ezk. 11:19) Ua tauturu Iehova i te mau Iseraela ia taui, e na reira atoa ïa oia no tatou.

12-13. (a) Ia au i te Salamo 119:59, ia feruri maite tatou i te aha e tia ˈi? (b) Eaha te mau uiraa o te tauturu mai ia hiˈopoa ia tatou iho?

¹² A piti, a feruriruri. A taio ai i te Parau a te Atua i te mau mahana atoa, e feruri maite anaˈe i te mau huru e manaˈo e titauhia ia taui. (A taio i te Salamo 119:59; Heb. 4:12; Iak. 1:25) Peneiaˈe i te mau huru e manaˈo atoa no ǒ mai i teie nei ao o te ohipa ra i nia i to tatou feruriraa. Ia oti, e farii anaˈe ma te haavare ore i to tatou mau paruparu a tutava ˈtu ai i te faaore i te reira.

¹³ Teie te tahi mau uiraa o te tauturu mai ia hiˈopoa ia tatou iho, ‘Ua pata mai anei te nounou aore ra te feii i roto i to ˈu aau? (Pet. 1, 2:1) Te faateitei ra anei au no to ˈu huru oraraa aore ra nunaa? (Mas. 16:5) Te hiˈo ino ra anei au i te feia veve aore ra i te tahi atu nunaa taata? (Iak. 2:2-4) Te faahinaaro ra anei au i te mau mea ta teie nei ao e pûpû nei? (Ioa. 1, 2:15-17) O te mau ohipa faufau e taparahi taata anei ta ˈu faaanaanataeraa?’ (Sal. 97:10; 101:3; Am. 5:15) E mauruuru roa to tatou Metua i te raˈi ia huri tatou i raro i “te mau mea e au i te pare.”—Sal. 19:14.

14. No te aha mea faufaa ia maiti i te hoa maitatai?

¹⁴ A toru, a maiti i te hoa maitatai. E ohipa te huru o te feia ta tatou e amuimui atu i nia i to tatou feruriraa. (Mas. 13:20) I te ohipa aore ra fare haapiiraa, ua haaatihia tatou e te feia aita e farii ra i te manaˈo o te Atua. I te mau putuputuraa râ, e ite tatou i te mau hoa maitatai o te faaitoito te tahi i te tahi ia “faaite i te here e ia rave i te mau ohipa maitai roa.”—Heb. 10:24, 25.

IA “MAU PAPU I TE FAAROO”

15-16. Mea nafea Satani ia haafariu ê i to tatou feruriraa?

¹⁵ A haamanaˈo ua faaoti papu Satani i te haafariu ê i to tatou feruriraa. E faaohipa ïa oia i te mau haapiiraa e manaˈo atoa ia ore te parau mau ia ohipa i nia i to tatou feruriraa.

¹⁶ Te tamau ra te Diabolo i te haa mai ta ˈna i rave i nia ia Eva. (Gen. 3:1) I roto i te ao a Satani, mea pinepine te taata i te ui, ‘Eita iho â anei te Atua e farii ia faaipoipo te tane i te tane e te vahine i te vahine? Eita iho â anei te Atua e mauruuru ia faatupu tatou i te Noela e te oroa fanauraa? Parau mau anei ua titau te Atua ia patoi i te pâmuraa toto? Ua faaue mau anei te Atua ia faaea i te amuimui i te fetii tei tiavaruhia i te amuiraa?’

17. Eaha te titauhia ia rave i mua i te manaˈo hape? Ia au i te Kolosa 2:6, 7, eaha te haamaitairaa e noaa mai?

¹⁷ Mea faufaa roa ia papu ia tatou te mau haapiiraa Bibilia. E tupu te feaa ia vaiiho tatou i te tahi manaˈo hape ia ô mai i roto i to tatou feruriraa. E tuino te manaˈo feaa i to tatou huru feruriraa e to tatou faaroo. Eaha ïa te titauhia ia rave? Te parau ra te Bibilia ia taui i to tatou feruriraa ia papu ia tatou iho “te maitai e te au e te tia roa o te hinaaro o te Atua.” (Roma 12:2) Ma te haapii tamau i te Parau a te Atua, e papu ia tatou iho te pue parau mau Bibilia e mea tia atoa te mau ture aveia a Iehova. E mau papu ïa to tatou faaroo mai te hoê tumu raau tei aˈa maitai.—A taio i te Kolosa 2:6, 7.

18. E nafea ia ore to tatou feruriraa ia hema i te ao a Satani?

¹⁸ Na te taata tataitahi e tutava ia mau papu to ˈna iho faaroo. E tamau anaˈe ïa i te taui e i te faaapî i to tatou huru feruriraa. E pure tamau anaˈe no te ani i te varua moˈa o Iehova. E feruri maite anaˈe no te paheru aita anei e mea ino i roto i to tatou feruriraa e aau. E e imi anaˈe i te mau hoa maitatai o te tauturu mai ia taui i to tatou huru feruriraa. Eita ïa tatou e hema i te ao a Satani, e upootia râ i nia i “te mau feruriraa hape e te mau mea teitei atoa o te patoi ra i te ite no nia i te Atua.”—Kor. 2, 10:5.