TE PAHONO RA TE BIBILIA
No te aha e pure ai ia tae mai te Basileia o te Atua?
E hinaaro anei oe e ite atu â no nia i te Basileia o te Atua e ta te reira e faatupu?
E faatereraa i te raˈi te Basileia o te Atua. Ua parau Iesu i ta ˈna mau pǐpǐ ia pure ia tae mai te reira ia itehia te parau-tia e te hau i nia i te fenua nei. Eita hoê noa ˈˈe faatereraa taata e nehenehe e faaore i te ino, te ohipa tia ore aore ra te maˈi, area te Basileia o te Atua, oia ïa. Ua faaoti te Atua o ta ˈna Tamaiti Iesu te riro ei Arii o te Basileia. Ua maiti atoa Iehova vetahi pǐpǐ a Iesu no te riro ei arii apiti o te faatere e o ˈna i te Basileia.—A taio i te Luka 11:2; 22:28-30.
Fatata roa te Basileia o te Atua i te haamou i te feia atoa e patoi i te faatereraa a te Atua. A pure ai ia tae mai te Basileia o te Atua, te ani ra ïa tatou ia monohia te mau faatereraa taata atoa.—A taio i te Daniela 7:13, 14; Apokalupo 11:15, 18.
No te aha te taata e maitai ai i te Basileia o te Atua?
O Iesu te Arii maitai roa ˈˈe no te mea e faatere aroha oia. Ei Tamaiti na te Atua, e mana atoa to ˈna no te tauturu i te feia atoa e pure i te Atua.—A taio i te Salamo 72:8, 12-14.
E haamaitai te Basileia o te Atua i te feia atoa e pure ma te haavare ore ia tae mai te reira e te ora ia au i te hinaaro o te Atua. Eita roa oe e tatarahapa i te haapii i ta te Bibilia e parau ra no nia i te Basileia o te Atua.—A taio i te Luka 18:16, 17; Ioane 4:23.