Te itea-papu-hia nei to ˈna mau huru maitatai

Te tiaturi ra anei oe i te Atua? Mai te peu e e, e nehenehe anei ta oe e haapapu i to ˈna vai-mau-raa? Ua haaatihia tatou i te haapapuraa o te hoê Atua Poiete paari, puai e î i te here. Eaha tera haapapuraa e e nafea te reira e ite-maitai-hia ˈi? No te pahono, e hiˈo anaˈe i ta te aposetolo Paulo i faahiti i roto i ta ˈna rata i te mau Kerisetiano i Roma.

Te na ô ra Paulo: ‘Te mau huru maitatai o te Atua, te itea papuhia nei ïa i te mau mea i hamanihia nei, mai te hamaniraa mai â o teie nei ao; oia hoi to ˈna ra mana hope ra e te Atuaraa ra; aita ˈtura o ratou otoheraa.’ (Roma 1:20) Ia au i tei faahitihia, ua vaiiho te Atua i to ˈna tapao i nia i ta ˈna poieteraa. E hiˈopoa maite anaˈe i ta te aposetolo mau parau.

Mai ta Paulo i faaite, e itehia to te Atua mau huru maitatai “mai te hamaniraa mai â o teie nei ao.” I roto i teie irava, aita te taˈo Heleni “ao” e parau ra no te fenua nei, no te huitaata râ.a No reira, ia au i ta Paulo i faahiti, e itehia te haapapuraa o te mau huru maitatai o te Atua Poiete i te mau mea ta ˈna i hamani mai te taime i poietehia ˈi te taata.

Tei te mau vahi atoa tera haapapuraa. Aita i hunahia i roto i te natura, “te itea papuhia nei” râ. Mai tei rahi roa ˈˈe i tei haihai roa ˈˈe, te faaite nei te mau mea i poietehia e te vai ra te hoê Atua Poiete e e huru maitatai to ˈna. Eita anei te hamaniraa faahiahia o te mau mea i roto i te natura e faaite ra i te paari o te Atua? E te mau fetia o te raˈi e te fatiraa o te mau are, i to ˈna puai? E te maa monamona e rave rau e te hitiraa e toparaa mahana nehenehe mau, i to ˈna here no te huitaata?—Salamo 104:24; Isaia 40:26.

E ite-maitai-hia tera haapapuraa. Eita ˈtura ïa ta te feia e ore e haapao i te reira e tei patoi i te tiaturi i te Atua e “otoheraa.” Ua horoa te tahi aivanaa i te faahiˈoraa no te taa i te reira: A feruri na i te taata faahoro pereoo o te ore e haapao i te tapao purumu “A taviri i te pae aui.” Faautua ihora te mutoi ia ˈna. E imi paha taua taata ra i te otoheraa ma te parau e aita o ˈna i ite aˈe i te tapao. Aita râ e varehia ta ˈna mau parau i te mea e e ite-maitai-hia te reira. Ei taata faahoro, tei ia tatou te hopoia e ite e e haapao i te tapao purumu. Tei roto i te natura te tapao o te haapapuraa o te vai-mau-raa o te Atua. E ite-maitai-hia te reira. Mea maramarama te taata, e nehenehe iho â ta ˈna e ite i te “tapao.” Aita e otoheraa.

E au te poieteraa i te hoê buka e haapii maira no nia i to tatou Atua Poiete. Te vai ra râ te tahi atu buka o te faaite mai atu â no nia ia ˈna, te Bibilia. I roto e pahonohia ˈi teie uiraa faufaa roa: Eaha ta te Atua opuaraa no te fenua nei e te huitaata? Ma te ite i te pahonoraa o tera uiraa e haafatata ˈtu ai oe i te Atua i ‘itea papuhia to ˈna mau huru maitatai’ i te ao e haaati maira.