E nafea te mau melahi e te mau demoni e ohipa ˈi i nia ia tatou?

I roto i teie tumu parau, e ite oe i te mau uiraa ta oe paha i uiui na e ihea e taio ai i te pahonoraa i roto i ta oe Bibilia. E oaoa te mau Ite no Iehova i te aparau no nia i teie mau pahonoraa e oe.

1. O vai te mau melahi?

E varua te mau melahi e te ora nei ratou i te raˈi. E huru ora teitei aˈe ratou i te taata. Ua poiete te Atua mau, e varua atoa hoi, i te mau melahi hou a poiete ai i te fenua. (Ioba 38:4, 7; Mataio 18:10) E mirioni melahi taiva ore i pihaiiho ia Iehova.—A taio i te Salamo 103:20, 21; Daniela 7:9, 10.

2. E tauturu anei te mau melahi i te taata?

Ua tauturu te mau melahi i te taata parau-tia ra o Lota. I ora na o ˈna i te hoê oire ta te Atua e haamou no te ino o te taata. Ua faaara e piti melahi ia Lota e i to ˈna utuafare ia horo ê. E ohipa hauti teie faaararaa no te tahi mau taata e ua tâuˈa ore ratou i te reira. Ua ora mai râ o Lota e ta ˈna na tamahine no to ratou faarooraa i te faaararaa ta Iehova i horoa na roto i ta ˈNa mau melahi.—A taio i te Genese 19:1, 13-17, 26.

Ia au i te Bibilia, te tauturu nei te mau melahi i te taata i teie mahana ma te aratai i te ohipa a te feia e poro ra i te evanelia o te Basileia o te Atua ma te taiva ore. (Mataio 24:14) E faaararaa atoa to roto i te evanelia. Mai te faaararaa i horoahia ia Lota, e ere te reira i te ohipa hauti. No ǒ mai te reira i te Atua ra na roto i te mau melahi.—A taio i te Apokalupo 1:1; 14:6, 7.

E nehenehe te Atua e faaohipa i te mau melahi no te faaitoito ia tatou i mua i te mau tamataraa. Ua faaohipa oia i te hoê melahi no te faaitoito ia Iesu.—A taio i te Luka 22:41-43.

Ua fatata te Atua i te faaohipa i te mau melahi no te tahi atu ohipa: e haamou i te feia ino e haamauiui ra i te taata. E ite ïa te huitaata i te tamǎrûraa faahiahia.—A taio i te Tesalonia 2, 1:6-8.

3. E nafea te mau demoni e ohipa ˈi i nia ia tatou?

I te fenua, mea rahi te taata tei rave i te ohipa ino ma te faaroo ore i te Atua. Oia atoa i te raˈi, mea rahi te melahi tei patoi i te Atua. (Petero 2, 2:4) E piihia ratou: te mau demoni. Te mea ino roa ˈˈe o ratou, o Satani ïa te Diabolo. Te haavare nei Satani e ta ˈna mau demoni i te huitaata.—A taio i te Apokalupo 12:9.

Ua faaohipa Satani i te mau ohipa tapihooraa tia ore, faatereraa taata e haapaoraa hape no te haafariu ê i te taata i te Atua. O Satani ïa te tumu o te parau-tia ore, te haavîraa uˈana e te mauiui o te taata.—A taio i te Ioane 1, 5:19.

4. E nafea te mau demoni e haavare ai i te taata?

Ua haavare Satani i te taata e rave rahi ma te haapii atu e e riro mai te feia pohe ei varua o te nehenehe e tauaparau e o ratou. Te na ô nei râ te Bibilia e aore e ohipa ta te taata pohe e nehenehe e rave. (Koheleta 9:5) E pinepine râ te mau demoni i te haavare i te taata ma te paraparau mai te feia herehia tei pohe. (Isaia 8:19) E faaohipa atoa ratou i te mau taura, te feia tahutahu, te feia hiˈohiˈo e hiˈo fetia. Te faaara maira te Parau a te Atua ia haapae i tera mau peu atoa. E titauhia ïa ia faarue i te mau mea atoa taaihia i te mau demoni e i te peu tahutahu.—A taio i te Deuteronomi 18:10, 11; Ohipa 19:19.

Ia here tatou ia Iehova, eita tatou e ora ma te mǎtaˈu i te mau demoni. Ia haapii tatou i te Parau a te Atua a rave atu ai i ta te reira e parau ra, te patoi nei tatou i te Diabolo e te haafatata ˈtu nei i te Atua. Mea puai aˈe Iehova i te mau demoni. E nehenehe ta ˈna mau melahi e faaitoito ia tatou i te taime e hinaarohia ˈi.—A taio i te Salamo 34:7; Iakobo 4:7, 8.

No te faahohonu atu â, a hiˈo i te pene 10 o teie buka, Eaha ta te Bibilia e haapii mau ra?, piahia e te mau Ite no Iehova.