E Kerisetiano mau anei te taatoaraa?
EHIA rahiraa Kerisetiano na te ao? Ia au i te hoê buka (Atlas of Global Christianity), i 2010 e fatata e 2,3 miria ratou i roto e 41 000 tiahapa haapaoraa, tera haapaoraa ta ˈna iho haapiiraa e ture aveia no nia i te haerea. I mua i teie rahiraa haapaoraa “Kerisetiano,” e ere i te mea maere e ua painu roa aore ra ua inoino roa vetahi. E ui paha ratou, ‘E Kerisetiano mau anei te feia atoa e parau ra e e Kerisetiano ratou?’
E rave anaˈe i te hiˈoraa o te hoê ratere. Ia tapae oia i te tahi otia fenua, e titauhia ia faaite oia i te mutoi e no te tahi fenua iho â o ˈna. E mea tia atoa ia faaite oia i te tahi parau mana, mai te buka ratere, no te haapapu e o ˈna iho â te taata ta ˈna e parau ra. Oia atoa no te hoê Kerisetiano mau, eita e navai ia parau noa o ˈna e e faaroo to ˈna i te Mesia. E titauhia te tahi mau tapao hau no te haapapu i te reira. Teihea ïa?
Ua faaohipa-matamua-hia te taˈo “Cherisetiano,” aore ra Kerisetiano, tau taime i muri aˈe i te matahiti 44. Ua faaite te taata tuatapapa Bibilia ra o Luka: “I Anetiohia na te mairiraahia to te mau pǐpǐ iˈoa e Cherisetiano.” (Ohipa 11:26) O te mau pǐpǐ a te Mesia tei parauhia te mau Kerisetiano. Na te aha e faariro i te hoê taata ei pǐpǐ a Iesu Mesia? Te faataa ra te hoê buka ite rahi (The New International Dictionary of New Testament Theology) e te peeraa ia Iesu ei pǐpǐ, o te haapaeraa ïa ma te taotia ore i to tatou iho ora no te roaraa o to tatou oraraa. Te pee maite nei ïa te hoê Kerisetiano mau i te mau haapiiraa e faaueraa a Iesu, tei haamau i te Kerisetianoraa, ma te taotia ore.
E nehenehe anei e itea i tera mau taata i rotopu i te rahiraa e parau nei e e Kerisetiano ratou? Eaha ta Iesu i parau ia itea ia tatou ta ˈna mau pǐpǐ mau? A hiˈo na eaha te pahonoraa a te Bibilia i teie mau uiraa. I to muri nei mau tumu parau, e hiˈopoa tatou e pae faahitiraa a Iesu e itea ˈi ia tatou o vai ma ta ˈna mau pǐpǐ mau. Oia atoa mea nafea te mau Kerisetiano matamua i te pee-maite-raa i te reira. E e tutava anaˈe i te hiˈo o vai te na reira atoa ra i rotopu i te rahiraa taata e parau ra e e Kerisetiano ratou.