Aita anei oe i haavarehia?

MEA mauiui roa ia ite oe e ua haavare mai te hoê taata tiaturihia. Eaha paha oe i te huru ê e i te riri! E mutu roa te auhoaraa e te faaipoiporaa e e pau rahi te moni a te taata i te haavare.

Mai te aha râ to oe huru a ite ai e ua haavarehia oe no nia i te Atua? Mai te peu e e taata tiaturi oe i te Atua, e peapea roa paha ïa oe mai teie nau taata haere pure, tei parau:

● “To ˈu manaˈo, ua punu ta ˈu haapaoraa ia ˈu.”—DEANNE.

● “To ˈu riri rahi, ua tavirihia vau, ua faufaa ore atura ta ˈu mau tiaturiraa e opuaraa.”—LUIS.

Eita paha oe e manaˈo e ua haavarehia oe no nia i te Atua. Na to oe paha na metua, te hoê pope, orometua, aore ra hoa rahi i haapii ia oe. E taata tiaturihia hoi ratou o te ore roa ˈtu e haamauiui ia oe. Mea maoro paha to oe tiaturiraa i te tahi haapiiraa. Noa ˈtu e mea rahi te tiaturi ra i te hoê parau, e haavare te reira. Ua faˈi te hoê peretiteni Marite e eita roa te hoê haavare o te faahiti-noa-hia e riro ei parau mau.

E nafea oe e ite ai e ua haavarehia oe? I pure na Iesu i te Atua: “O to parau na te parau mau.” (Ioane 17:17) Na te Parau iho â a te Atua, te Bibilia, e faataa eaha te mea mau e eaha te mea haavare.

E vaiiho anaˈe ïa i te Bibilia ia pahono mai e pae haavare matauhia no nia i te Atua e e nafea to oe oraraa e maitai atu â ˈi i te parau mau.