E haafatata ˈtu i te Atua
“O Iehova to ˈu tiai”
A HIˈO na i te hohoˈa i nia i teie api. Te taa ra anei ia oe te huru o teie mamoe? Mea hau oia i nia i te ouma o to ˈna tiai, e ere anei? I roto i te Salamo 23, te faaohipa ra te Bibilia i te huru o te hoê tiai i nia i ta ˈna mau mamoe no te faahohoˈa i te aupuru î i te here a Iehova i ta ˈna mau tavini. Te hinaaro ra oia ia ite tatou i te hau o te feia e parau ra ma te tiaturi mai te fatu salamo Davida: “O Iehova to ˈu tiai.”a—Irava 1.
E tiai mamoe Davida, te fatu o teie salamo, i to ˈna apîraa. Ua ite oia i te mau hinaaro o te mamoe e te mau hopoia a te tiai. Ua papai Davida, tei aupuruhia hoi e te Atua i roto i to ˈna oraraa, i tei parauhia “te hoê salamo faaitoito e te tiaturi.” E itehia te iˈoa o te Atua o Iehova i te omuaraa e i te hopea o te salamo. (Irava 1, 6) E i roto, e itehia ïa e toru ravea e aupuru ai Iehova i to ˈna nunaa mai te hoê tiai i nia i ta ˈna mau mamoe.—Salamo 100:3.
Te aratai ra Iehova i ta ˈna mau mamoe. E moe te mamoe aita anaˈe to ratou tiai. Oia atoa, e titauhia ia tauturuhia tatou no te ite i te eˈa tia i roto i te oraraa. (Ieremia 10:23) Te faataa ra Davida e te aratai ra Iehova i to ˈna nunaa i “te mau aua heeuri” e i “te pape atatia . . . na te eˈa titiaifaro.” (Irava 2, 3) Te faaitoito maira te faataaraa o teie mau aua ia tiaturi i te Atua. Ma te pee i te aratairaa a te Atua maoti te Bibilia, e fanaˈo tatou i te hoê oraraa oaoa, te haumǎrû e te haapeapea ore.
Te paruru ra Iehova i ta ˈna mau mamoe. E riaria e e noaa-hanoa-hia te mamoe aita anaˈe to ratou tiai. Te parau ra Iehova i to ˈna nunaa eiaha ia mǎtaˈu, ia ‘haere atoa ratou na te peho o te mǎrǔ pohe,’ oia hoi i te mau taime fifi roa ˈˈe paha o te oraraa. (Irava 4) Te haapao ra Iehova ia ratou e ua ineine oia i te tauturu atoa ˈtu. E nehenehe oia e horoa i ta ˈna mau tavini te paari e te puai hinaarohia no te faaruru i te mau tamataraa.—Philipi 4:13; Iakobo 1:2-5.
Te faaamu ra Iehova i ta ˈna mau mamoe. Aita e maa ta te mamoe aita anaˈe to ratou tiai. E hinaaro pae varua to tatou e haamâhahia maoti noa te tauturu a te Atua. (Luka 11:28) Ma te oaoa, ei Atua aau horoa noa, te faanaho ra Iehova i te hoê amuraamaa î maitai no ta ˈna mau tavini. (Irava 5) Te haamâha ra te Bibilia e te mau mauhaa no te haapii i te reira, mai teie vea ta oe e taio ra, i to tatou mau hinaaro pae varua. Maoti hoi te reira e ite ai tatou i te auraa o te oraraa e ta te Atua opuaraa no tatou.
Te ora hau ra Davida. Ua ite oia e ia vai piri noa oia i to ˈna Tiai i nia i te raˈi, e fanaˈo oia i te aupuru î i te here o Iehova “e maoro noa ˈtu o ˈ[na] pue mahana.” (Irava 6) Te hinaaro ra anei oe i taua oraraa hau ra? Mai te peu e e, a haapii e nafea ia haafatata ˈtu ia Iehova. E ora hau ïa oe i roto i te rima o te Tiai mamoe Rahi o te aratai, o te paruru e o te faaamu i te feia o te vai taiva ore noa ia ˈna.—Isaia 40:11.
Taioraa bibilia no me:
[Nota i raro i te api]
a Mea rahi te taata taio tei matau i teie parau “O te Fatu to ˈu tiai.” No te ite no te aha vetahi mau huriraa Bibilia i iriti ai i te iˈoa o te Atua, Iehova, a hiˈo i te mau api 195-197 o te buka Eaha ta te Bibilia e haapii mau ra? piahia e te mau Ite no Iehova.