Ta Iesu i haapii mai no nia ia ˈna iho

“Ua papu ia Iesu e o vai o ˈna, nohea mai oia, no te aha oia i tonohia mai ai, e eaha te tiai ra ia ˈna.”—TAATA PAPAI O HERBERT LOCKYER.

HOU a farii ai e a tiaturi ai i ta Iesu i haapii atu, e mea tia ia ite tatou: O vai mau o Iesu? Nohea mai oia? Eaha ta ˈna fa i roto i te oraraa? I roto i te mau Evanelia—Mataio, Mareko, Luka e Ioane—e pahono vaha mai Iesu i teie mau uiraa.

I ora na oia hou a riro mai ai ei taata Ua parau Iesu: “Aita Aberahama i fanau, te vai nei au.” (Ioane 8:58) Ua ora Aberahama fatata e 2 000 matahiti hou to Iesu fanauraa. Ua ora râ Iesu hou Aberahama taiva ore i opuahia ˈi. Ihea ïa? “I pou mai nei . . . au mai te raˈi mai,” ta ˈna i faataa.—Ioane 6:38.

Te Tamaiti a te Atua Mea rahi ta Iehova tamaiti melahi. Mea otahi râ o Iesu. Ua faataa oia ia ˈna iho mai “te Tamaiti fanau tahi a te Atua.” (Ioane 3:18) Te auraa, o Iesu anaˈe ta te Atua i poiete tia ˈtu. Mea na roto anaˈe i te Tamaiti fanau tahi Iehova i te poieteraa i te mau mea atoa.—Kolosa 1:16.

“Te Tamaiti a te taata” Pinepine aˈe Iesu i te faaohipa i teie parau no ˈna iho. (Mataio 8:20) No ˈna, e ere roa ˈtu oia i te hoê melahi aore ra varua tei rave i te tino taata. E taata mau râ oia. Ma to ˈna varua moˈa, ua tuu mai te Atua i te ora o ta ˈna Tamaiti i roto i te opu o te paretenia ra o Maria. Te faahopearaa, ua fanauhia Iesu ei taata tia roa e te hara ore.—Mataio 1:18; Luka 1:35; Ioane 8:46.

Te Mesia fafauhia “Ua ite au e, te haere mai na te Mesia,” te reo ïa o te hoê vahine Samaria ia Iesu. Pahono atura oia: “O vau ïa e parau atu ia oe na.” (Ioane 4:25, 26) Te auraa o te parau “Mesia,” mai te parau “Kirito,” oia ïa “Tei faatavaihia.” Ua faatavaihia, aore ra faatoroahia, Iesu e te Atua no te hoê tuhaa taa ê i roto i te tupuraa o ta te Atua i fafau.

Tumu matamua o to ˈna haereraa mai Ua parau Iesu: “E parau haere â vau i te parau maitai o te basileia o te Atua . . . e tia ˈi, i tonohia mai ai hoi au.” (Luka 4:43) Noa ˈtu e ua hamani maitai oia i te feia rii, o te pororaa i te Basileia o te Atua te fa matamua o to ˈna oraraa. E hiˈohia ta ˈna i haapii atu no nia i te Basileia i te mau api i muri nei.

E ere iho â Iesu mai ia tatou.a Mai ta tatou e ite, ua haafaufaa ˈtu â to ˈna oraraa i nia i te raˈi i ta ˈna mau parau i te fenua nei. Eiaha ïa e maere e ua ohipa puai ta ˈna poroi i nia tau mirioni taata e ati aˈe te ao.

[Nota i raro i te api]