Ua fafau anei te Atua ia taoˈahia outou?

‘Te hinaaro ra te Atua ia taoˈahia outou, ia rahi to outou pereoo, ia tere maitai ta outou ohipa. A tiaturi noa ia ˈna, a iriti i ta outou pute moni, e a horoa pauroa i ta outou moni na ˈna.’

TERA te poroi ta te tahi mau pǔpǔ faaroo i Beresilia e faatianiani ra, ia au i te hoê vea i neneihia i reira. Mea rahi te taata e faaroo ra i teie poroi. No nia i te feia i Marite e parau ra e Kerisetiano ratou, tei uiuihia, te faatia ra te vea Time: “E 61 % e tiaturi ra e te hinaaro ra te Atua ia onahia te taata. E 31 % . . . e farii ra e ia horoa oe i ta oe moni na te Atua, e horoa rahi mai ïa oia i te moni.”

Te atutu oioi ra teie huru tiaturiraa, tei parau-pinepine-hia te haapiiraa faaroo o te taoˈa rahi, i te mau fenua Marite Latino, mai ia Beresilia, e mea rahi te taata e putuputu ra i roto i te mau fare pure o te fafau ra i te haamaitairaa a te Atua i te pae materia. Ua fafau mau anei te Atua ia taoˈahia te feia e tavini ra ia ˈna? Mea ona anei te mau tavini atoa a te Atua i tahito ra?

E parau mau e i roto i te mau Papai Hebera, e taio pinepine tatou e ua taoˈahia te feia ta te Atua i haamaitai i te pae materia. Ei hiˈoraa, te na ô ra te Deuteronomi 8:18: “E haamanaˈo . . . oe i to Atua ra ia Iehova: na ˈna hoi i horoa mai i to oe itoito e noaa ˈi ta oe taoˈa.” E haapapuraa teie e ia faaroo Iseraela i te Atua, e faariro oia ia ratou ei nunaa ona.

E te tavini taitahi a te Atua ïa? Mea ona roa te taata haapao maitai ra o Ioba, e i muri aˈe i to Satani haaveveraa ia ˈna, ua “tataipiti” Iehova i ta Ioba taoˈa. (Ioba 1:3; 42:10) Mea ona atoa Aberahama. Ia au i te Genese 13:2, “e taoˈa rahi roa ta [ˈna], i te puaa, i te ario, e te auro.” A haru ai te mau nuu amui a na arii e maha no Hitia o te râ, ia Lota te tamaiti fetii a Aberahama, “ua haaputu ihora [Aberahama] i to ˈna ra mau taata i tei fanau i to ˈna ihora utuafare, e i haapiihia e ana ra, e toru hanere, hoê ahuru, e vau.” (Genese 14:14) Ia apitihia mai na ‘taata haapiihia’ e 318 mea ite i te faaohipa i te mauhaa tamaˈi, mea huru rahi ïa te utuafare o Aberahama. Te neheneheraa oia e aupuru i te hoê utuafare rahi, e tapao faaite ïa e mea rahi roa ta ˈna taoˈa, e ta ˈna nǎnǎ animara.

Mea ona mau â e rave rahi tavini haapao maitai a te Atua i tahito ra, mai ia Aberahama, Isaaka, Iakoba, Davida, Solomona, e te vai ra ˈtu â. Te auraa anei râ e e faaona te Atua i te feia atoa e tavini ra ia ˈna? E no te hoê taata veve, te auraa anei ïa e aita te Atua i haamaitai ia ˈna? E pahono to muri nei tumu parau i teie na uiraa.