Ua matau anei oe i to oe Metua i te raˈi?

UA MATAU maitai anei oe i to oe metua tane? E mea maere paha teie uiraa mai te peu e ua paari oe i roto i te hoê utuafare î i te here. ‘Ua matau maitai iho â hoi au ia ˈna!’ ta oe paha ïa e pahono. Oia mau, ua ite te rahiraa o te taata eaha ta to ratou metua tane e au e e ore e au, eaha to ˈna huru i roto i te tahi mau tupuraa, e e nafea oia e haapao ai i te utuafare.

Teie râ, i te tahi taime ua hitimaue paha oe i te iteraa i te huru manaˈo-ore-hia o to oe metua tane. Ei hiˈoraa, ua matau paha te hoê tamaiti i to ˈna papa mai te hoê taata feruriraa hau e te mǎrû—a tupu mai ai te hoê tupuraa ru. Te ite taue ra oia i to ˈna metua tane ei taata aueue ore i te parururaa i to ˈna utuafare.

E to tatou Atua Poiete ïa? No nia ia ˈna, te parauhia ra e: “No ˈna . . . to tatou ora, e i hahaere ai, e i parahi ai hoi.” (Ohipa 17:28) Ua pûpû tatou i to tatou ora no te Atua; te auraa ïa e o ˈna te Metua o te feia atoa e ora nei. (Isaia 64:8) Peneiaˈe tera to oe manaˈo no nia i te Atua, e mea maitai e e mea tano te reira. Mea rahi atu â râ ta tatou e nehenehe e ite e e haapii i nia ia ˈna—no to tatou maitai e oaoa.

E ohipa te matau-maitai-raa i to oe metua tane i nia i to oe mau huru aau no ˈna e to oe faatura ia ˈna. Hoê â atoa, ia matau maitai atu â oe i te Atua, e piri roa ˈtu â to oe taairaa e o ˈna. E nehenehe te Atua e tauturu ia oe i roto i te mau fifi e herepata o te oraraa ia haamatau maitai oe ia ˈna e ia haapii oe i te rave i to ˈna hinaaro.

Eaha te huru o te Atua? E nafea to ˈna mau huru maitatai e ohipa ˈi i nia i to oe mau huru aau no ˈna? Te titau ra anei te matauraa ia ˈna ia amo i te tahi hopoia? E ite oe i te mau pahonoraa i tera mau uiraa i roto i te tumu parau i muri nei.

[Parau iti faaôhia i te api 3]

E ohipa te matau-maitai-raa ia vetahi ê i nia i to oe mau huru aau no ratou