Te taaraa i te Bibilia—Te hoê fanaˈoraa e vai ra ia outou
TE VAI ra i roto i te Bibilia te pue parau mau faufaa roa no ǒ mai i te Atua ra. Te haamaramarama ra te reira ia tatou no nia i te tumu o te oraraa e o te mauiui o te taata, e te oraraa no a muri aˈe o te huitaata. Te haapii ra te reira ia tatou e nafea e itea ˈi te oaoa, e nafea e noaa ˈi te mau hoa, e e nafea e faatitiaifaro ai i te mau fifi ma te manuïa. Te mea faufaa roa ˈtu â, te haapii ra tatou no nia i to tatou Atua Poiete e Metua i te raˈi ra o Iehova. Te hopoi maira taua ite ra i te oaoa e te horoa maira i te tumu o to tatou oraraa.
Ua faaauhia te noaaraa mai te ite no nia i te Atua i roto i te Bibilia i te tamaaraa. Ua parau Iesu e: “E ore te taata e ora i te maa anaˈe ra, i te mau mea atoa râ i haapaohia e te Atua.” (Mataio 4:4; Hebera 5:12-14) Mai te amuraa i te maa maitai i te mahana taitahi e mea faufaa no te faaoraora ia tatou, e mea faufaa atoa te taio-tamau-raa i te Parau a te Atua no tatou no te fanaˈo i te ora mure ore o te parau fafau a te Atua.
Mea au na tatou e tamaa no te mea ua poiete Iehova ia tatou mai tera e no te mea e haamâha te reira i te hoê hinaaro tumu. Tera râ, te vai ra to tatou te tahi atu hinaaro tumu e mea tia ia haamâhahia ia hinaaro tatou e oaoa. Ua parau Iesu e: “E ao to tei ite i to ratou veve i te pae varua.” (Mataio 5:3, MN) E tia ia oaoa no te mea e nehenehe tera hinaaro e haamâhahia na roto i te taaraa i te Parau a te Atua.
E parau mau, te manaˈo ra te tahi mau taata e mea fifi ia taa i te Bibilia. Ei hiˈoraa, e hinaaro paha outou i te tauturu no te mau irava o te faahiti ra i te mau peu mautau-ore-hia aore ra te mau parau faahohoˈa. Te vai ra atoa te mau parau tohu i papaihia na roto i te mau parau taipe o te nehenehe e taahia ma te hiˈo noa i te tahi atu mau irava bibilia e faataa ra i te hoê â tumu parau. (Daniela 7:1-7; Apokalupo 13:1, 2) Noa ˈtu râ, e nehenehe mau outou e taa i te Bibilia. E nafea outou e nehenehe ai e papu i te reira?
Te hoê fanaˈoraa e vai ra i te taatoaraa
E Parau a te Atua te Bibilia. To roto to te Atua parauraa i to ˈna hinaaro ia tatou. E horoa mai anei te Atua i te hoê buka eita e nehenehe e maramaramahia aore ra o te feia tei haere i te haapiiraa teitei anaˈe te taa? Eita, e ere o Iehova i te Atua ino. Ua parau te Mesia ra o Iesu e: “O vai ïa metua i ǒ outou nei e hopoi atu i te ofai na te tamaiti ia ani mai i te pane ra? e ia ani mai i te iˈa, e hopoi atu anei i te ophi eiaha te iˈa, ia ˈna? E ia ani mai hoi i te huero moa, e hopoi atu anei i te pata? E tena na, te ite na outou i te horoa i te mea maitai na ta outou tamarii, ino noa ˈi outou na, e rahi atu ïa to outou Metua i te ao ra i te horoa i te [varua moˈa] i te feia i ani atu ia ˈna ra.” (Luka 11:11-13; MN) No reira, e nehenehe outou e papu e e tia iho â ia outou ia taa i te Bibilia e mai te peu e e ani outou i te Atua ma te haavare ore, e horoa ˈtu ïa oia i te tauturu ta outou e hinaaro no te taa i ta ˈna Parau. Inaha, e nehenehe atoa te mau tamarii e aapo e e taa i te mau haapiiraa tumu o te Bibilia!—Timoteo 2, 3:15.
Noa ˈtu e e titauhia ia tutava no te taa i te Bibilia, e nehenehe te na reiraraa e ohipa puai a faaitoito atu ai ia tatou. I muri aˈe i to ˈna tia-faahou-raa, ua fa Iesu i e piti o ta ˈna mau pǐpǐ e ua paraparau atu no nia i te mau parau tohu bibilia. Te na ô ra te faatiaraa a Luka e: “Ua faaite maira oia ia raua i te auraa i te mau parau no ˈna iho i roto i te mau parau atoa i papaihia ra, mai ia Mose mai â e tae roa ˈˈera i te mau peropheta atoa.” Eaha te faahopearaa? I taua ahiahi ra, a feruri ai raua i ta raua i haapii, ua parau ihora te mau pǐpǐ raua raua iho: “E ere, e hoa, i anaanatae to tâua aau ia ˈna i paraparau mai ia tâua i te aratia ra, a faaite mai ai ia tâua i te auraa i te mau parau i papaihia ra.” (Luka 24:13-32) Ua horoa te Parau a te Atua na raua i te hoê fanaˈoraa no te mea ua haapuai te reira i to raua faaroo i te mau parau fafau a te Atua e ua horoa ˈtu i te hoê manaˈo maitai no te oraraa no a muri aˈe.
E ere te taaraa i te Parau a te Atua i te mea teimaha e mea anaanatae râ e te maitai, mea au mai te amuraa i te maa maitai. E nehenehe outou atoa, e taa i te Parau a te Atua e e au i “te ite i te Atua.”—Maseli 2:1-5.
[Hohoˈa i te api 4]
Mai te hoê metua î i te here, te horoa ra Iehova i te varua moˈa no te tauturu ia tatou ia taa i te Bibilia