E haamaitairaa rahi te roaa mai ia haere tatou na te mau eˈa o Iehova

UA HAHAERE aˈena anei oe na nia i te mouˈa? Mai te peu e e, ua riro paha oe mai te huru ra e to nia oe i te tafare o te ao. Auê te au e ia huti i te mataˈi apî, ia hiˈo i te atea-roa-raa, ia fanaˈo maitai i te haviti o te natura! Peneiaˈe e ua huru faufaa ore atura te mau tapitapi o te ao i raro mai.

Mea varavara taua huru hahaereraa ra no te rahiraa o te taata, mai te peu râ e e Kerisetiano pûpûhia oe, mea huru maoro paha to oe haereraa na te mau vahi teitei—i te pae varua. Mai te papai salamo i tahito ra, ua pure mau paha oe e: “E faaite mai oe ia ˈu i to mau eˈa, e Iehova; e haapii mai oe ia ˈu i to mau haerea.” (Salamo 25:4) Te haamanaˈo ra anei oe eaha to oe huru i te taime matamua i haere ai oe i nia i te mouˈa o te fare o Iehova e to oe haamataraa i te haere na te mau vahi teitei? (Mika 4:2; Habakuka 3:19) Aita e feaaraa, aita i maoro to oe iteraa e i to oe haereraa na teie mau eˈa teitei o te haamoriraa viivii ore, ua noaa ia oe te paruru e te oaoa. Taa ˈtura ia oe te mau huru aau o te papai salamo: “E ao to te mau taata i ite i te reo oaoa ra! e hahaere â ratou, e Iehova, i te maramarama o to mata ra.”—Salamo 89:15.

I te tahi râ taime, e tia i te feia hahaere na nia i te mouˈa ia tutava i nia i te mau eˈa tarere e te teitei. E haamata to ratou avae i te mauiui, e e rohirohi roa ratou. E nehenehe atoa tatou e farerei i te fifi i roto i ta tatou taviniraa i te Atua. Aita i maoro aˈenei, mea huru fifi paha to tatou mau taahiraa. E nafea e noaa faahou mai ai te itoito e te oaoa? Te taahiraa matamua, te fariiraa ïa i te huru hau ê o te mau eˈa o Iehova.

Te mau ture teitei a Iehova

“E teitei” aˈe te mau eˈa o Iehova ‘i to te taata,’ e ua ‘faatia-papu-hia’ ta ˈna haamoriraa ‘i nia i te tupuai mouˈa, e ua faateiteihia i nia i te mau aivi.’ (Isaia 55:9; Mika 4:1) Te paari o Iehova, o ‘te paari ïa no nia mai.’ (Iakobo 3:17) To nia ê ta ˈna mau ture i te tahi atu. Ei hiˈoraa, i te tau a rave ai to Kanaana i te peu taehae ra e pûpû i te tamarii ei tusia, ua horoa Iehova i te mau ture teitei i te pae morare e te î i te aumihi na to Iseraela. Ua parau atu oia e: “Eiaha oe e [faatia paetahi] i te taata rii, eiaha hoi e auraro atu i te taata rarahi. . . . Ia riro râ te taata ê . . . mai te taata tupu atoa ia outou, e aroha hoi oe ia ˈna mai te aroha ia oe ihora.”—Levitiko 19:15, 34; MN.

Hoê ahuru ma pae senekele i muri aˈe, ua horoa Iesu i te mau hiˈoraa hau o te ‘ture tura’ a Iehova. (Isaia 42:21) I roto i te Aˈoraa i nia i te mouˈa, ua parau oia i ta ˈna mau pǐpǐ e: “E aroha ˈtu i to outou mau enemi; . . . e pure hoi i te feia i . . . hamani ino mai ia outou; ia riro outou ei tamarii na to outou Metua i te ao ra.” (Mataio 5:44, 45) “E te mau mea atoa ta outou i hinaaro ia vetahi ê ra, e na reira atoa ˈtu outou ia ratou,” o ta ˈna ïa i parau faahou. “O ta te ture ïa e ta te mau peropheta.”—Mataio 7:12.

E ohipa teie mau ture teitei i nia i te mafatu o te feia farii, e e turai atu ia pee i te Atua ta ratou e haamori ra. (Ephesia 5:1; Tesalonia 1, 2:13) A feruri na i te tauiraa i tupu i nia ia Paulo. Te taime matamua i faahitihia ˈi no nia ia ˈna, te “mauruuru” ra oia ia “taparahihia” Setephano e te ‘hamani ino ra i te amuiraa.’ Tau matahiti noa i muri aˈe, te haa ra oia ma te mǎrû i nia i te mau Kerisetiano i Tesalonia mai “te hoê metua vahine ia aupuru i ta ˈna mau tamarii ta ˈna e faatamaa ra.” Ua faariro te haapiiraa no ǒ mai i te Atua ra i te taata hamani ino ra o Paulo ei Kerisetiano î i te here. (Ohipa 8:1, 3, MN; Tesalonia 1, 2:7, MN) Ua mauruuru mau â oia e ua ohipa te haapiiraa a te Mesia i nia i to ˈna huru taata. (Timoteo 1, 1:12, 13) E nafea te mauruuru mai tera e tauturu mai ai ia tamau i te haere na te mau eˈa teitei o te Atua?

Haereraa ma te mauruuru

Mea au roa na te feia hahaere te mau mataitairaa faahiahia roa e vai ra i te mau vahi teitei. E haapii atoa ratou i te oaoa i te mau mea rii i te hiti eˈa, mai te hoê mato taa ê, te hoê tiare nehenehe, aore ra te ite-rii-raa ˈtu i te hoê animara oviri. I te pae varua, e tia ia tatou ia ite atu i te mau haamaitairaa—te mea rahi e te mea iti—e noaa mai ia haere tatou e te Atua. Ia ite maite tatou i te reira, e haere tatou ma te itoito faaapîhia e e riro te hoê tere rohirohi ei haereraa faaoraora. E farii tatou i te mau parau a Davida: “Aroha vave mai oe ia ˈu; te tiaturi nei hoi au ia oe. E faaite mai oe ia ˈu i tau eˈa ia haere ra.”—Salamo 143:8.

Te na ô ra o Mary, e rave rahi hoi matahiti i teie nei to ˈna haereraa na te mau eˈa o Iehova, e: “Ia hiˈo vau i tei poietehia e Iehova, eita vau e ite noa i te huru hamaniraa fifi, i te huru î i te here atoa râ o te Atua. E animara anei, e manu anei, aore ra e manumanu, e mau ohipa taa ê anaˈe e te maere rahi. Hoê â te oaoaraa e noaa mai i te mau parau mau pae varua o te maramarama noa ˈtu i te roaraa o te mau matahiti.”

E nafea tatou ia faahohonu atu â i to tatou mauruuru? I te hoê pae, na roto ïa i te oreraa e haafaufaa ore i ta Iehova e rave ra no tatou. “Eiaha e tuutuu i te pure,” o ta Paulo ïa i papai. “E haamaitai i te Atua i te mau mea atoa ra.”—Tesalonia 1, 5:17, 18; Salamo 119:62.

E tauturu te haapiiraa ia tatou iho i te faahotu i te aau mehara. Ua faaitoito Paulo i te mau Kerisetiano no Korinetia e: ‘A tamau i te haere e te Mesia ra o Iesu, ma te î roa i te faaroo a faaite ai i te aau mehara.’ (Kolosa 2:6, 7, MN) Ia taio tatou i te Bibilia e ia feruriruri i ta tatou e taio ra, e puaihia to tatou faaroo e e fatata ˈtu â tatou i te Fatu o te Bibilia. I roto i to ˈna mau api, te vai ra te mau taoˈa maitatai o te nehenehe e turai ia tatou ia “î roa i te faaroo a faaite ai i te aau mehara.”

E ohie aˈe atoa te haereraa ia tavini tatou i pihai iho i to tatou mau taeae. Ua parau te papai salamo no nia ia ˈna iho e: “E taata au hoi au i te feia atoa i mǎtaˈu ia oe ra.” (Salamo 119:63) Te tahi o to tatou mau taime oaoa roa ˈˈe, ia haere ïa tatou i te mau tairururaa Kerisetiano aore ra ia fanaˈo tatou i te auhoaraa o to tatou mau taeae. E farii tatou e maoti Iehova e to ˈna mau eˈa teitei e vai ai to tatou fetii Kerisetiano here na te ao atoa nei.—Salamo 144:15b.

Taa ê atu i te mauruuru, ia amo iho â tatou i ta tatou hopoia, e itoitohia tatou i te tamau i te haere i mua i nia i te mau eˈa teitei o Iehova.

Haereraa ma te amo iho â i te hopoia

Ua ite te feia hahaere o te amo iho â i ta ratou hopoia e e titauhia ia haapao maitai i te haereraa ia hinaaro ratou eiaha ratou ia moe aore ra ia oere piri roa ˈtu i te mau vahi tarere. I te mea e e tiamâraa to tatou e maiti, e faatia Iehova ia fanaˈo tatou i te tahi maa tiamâraa e ia mata tatou i te rave i te tahi mau mea. E titau râ taua tiamâraa ra ia amo iho â tatou i ta tatou hopoia ia haapao tatou i ta tatou mau ohipa Kerisetiano.

Ei hiˈoraa, e tiaturi Iehova e e haapao ta ˈna mau tavini i ta ratou mau ohipa ma te amo iho â i ta ratou hopoia. Eita oia e faataa ehia rahiraa ito e taime e tia ia tatou ia horoa i roto i te mau ohipa Kerisetiano aore ra ehia moni e tia ia tatou ia horoa ei ô e te vai ra ˈtu â. E au râ te mau parau a Paulo i to Korinetia ia tatou paatoa: “E horoa te taata atoa i ta ˈna i opua i roto i to ˈna aau.”—Korinetia 2, 9:7; Hebera 13:15, 16.

Ta te Kerisetiano horoaraa ma te amo iho â i ta ˈna hopoia, te faaite-atoa-raa ïa i te parau apî maitai ia vetahi ê. E faaite atoa tatou e e amo iho â tatou i ta tatou hopoia na roto i te horoaraa i te ô moni no te ohipa a te Basileia na te ao atoa nei. Te faataa ra o Gerhardt, te hoê matahiapo, e ua haamaraa rahi raua ta ˈna vahine i ta raua ô i muri aˈe i to raua haereraa i te hoê tairururaa i Europa Hitia o te râ. “Ua ite atu mâua e mea iti roa ta to tatou mau taeae i te pae materia; te mauruuru roa ra râ ratou i ta tatou mau papai niuhia i nia i te Bibilia,” o ta ˈna ïa e parau ra, “no reira mâua i faaoti ai e horoa i te tauturu rahi roa ˈˈe e maraa ia mâua no to tatou mau taeae veve no te tahi atu mau fenua.”

Haapaariraa i to tatou faaoromai

E titauhia te itoito no te hahaere na nia i te mouˈa. E faaetaeta te feia hahaere i to ratou tino i te mau taime atoa e nehenehe ai, e e rave rahi o te haere no te tahi mau tere poto ei faaineineraa ia ratou no te mau tere roa. Oia atoa, ua faaitoito Paulo ia ohipa noa tatou i roto i te taviniraa teotaratia no te atuatu i to tatou ea pae varua. Ua parau Paulo e e tia i te feia e hinaaro ra ‘ia au to ratou haerea ia Iehova’ e ia “faaetaeteahia” ratou, ‘ia faatupu i te mau ohipa maitatai.’—Kolosa 1:10, 11.

E ohipa atoa te manaˈo turai i nia i te faaoromai o te taata hahaere. E nafea? Ia haamanaˈo noa oia i te fa taa maitai, mai te hoê mouˈa atea, e itoitohia oia. E ia tapae te taata hahaere i te tahi mau vahi i tapaohia, e nehenehe ta ˈna e faito i to ˈna haereraa ˈtu i mua i te fa hopea ra. Ia hiˈo oia i muri i te tuhaa i oti ia ˈna, e ite oia i te mauruuru.

Oia atoa, e turu e e turai to tatou tiaturiraa i te ora mure ore ia tatou. (Roma 12:12) Na roto i taua taime ra, a haere ai tatou na te mau eˈa o Iehova, e ite tatou i te mauruuru ia haamau tatou e ia raea ia tatou te tahi mau fa Kerisetiano. E auê ïa tatou i te oaoa e ia hiˈo tatou i muri i te mau matahiti taviniraa haapao maitai aore ra ia hiˈo tatou i te mau tauiraa ta tatou i rave i roto i to tatou huru taata!—Salamo 16:11.

No te haere atea e te faaherehere i te ito, e tapea te feia hahaere i te hoê tere tamau. Oia atoa, maoti te peu matau tuutuu ore, to roto atoa hoi te haere-tamau-raa i te mau putuputuraa e i roto i te taviniraa, e raea mǎrû noa ˈtu ai ia tatou ta tatou fa. No reira Paulo i faaitoito ai i te mau hoa Kerisetiano e: “E tamau anaˈe i te haere ma te haapao maite i taua tapao nei â.”—Philipi 3:16, MN.

Papu maitai, eita tatou e haere o tatou anaˈe na te eˈa o Iehova. “E haapao maite â tatou te tahi i te tahi, a faaaraara ˈtu ai ia rahi te aroha, o te rave i te mau ohipa maitatai ra,” o ta Paulo ïa i papai. (Hebera 10:24) Maoti te auhoaraa pae varua maitai e ohie aˈe ai ia tapea i tauâ tere ra a haere ai tatou e te mau hoa faaroo.—Maseli 13:20.

I te pae hopea, e te mea faufaa roa ˈˈe, eiaha roa ˈtu tatou ia haamoe i te puai ta Iehova e horoa. “E haere â” te feia o Iehova to ratou puai “ma te etaeta e ia noaa ˈtu â te etaeta.” (Salamo 84:5, 7) Noa ˈtu e i te tahi taime, e tia ia tatou ia haere na te mau vahi papu ore, maoti te tauturu a Iehova, e tae tatou.