Te haamanaˈo ra anei outou?

Ua au anei outou i te taioraa i te mau numera hopea o Te Pare Tiairaa? A hiˈo mai te peu e e nehenehe ta outou e pahono i te mau uiraa i muri nei:

• No te aha e tia ˈi ia hiˈopoa-maite-hia te mau uiraa i faahitihia i roto i te Ioba pene 38 i teie atoa mahana?

Eita ta te mau aivanaa no teie tau e nehenehe e maramarama roa i te mau mea taa ê e rave rahi ta te Atua i haapao. Mai teie nafea te puai aratoraa e tapea ˈi i te fenua i nia i te reni haaatiraa tano, eaha mau na te maramarama, no te aha i hope ai te rau o te mau huˈahuˈa hiona, nafea te topata ûa e tupu ai, e eaha te taairaa i roto i te ito e te mau vero.—15/4, api 4-11.

• Eaha te tahi mau hiˈoraa bibilia o te nehenehe e tauturu ia tatou ia haavî i te mau huru faatoaruaru o te aau?

Ua faaruru Asapha, Baruka e Naomi i te mau taime toaruaruraa aore ra te tahi atu mau huru haaparuparu o te aau, e e nehenehe te faatiaraa a te mau Papai no nia i to ratou haavîraa ma te manuïa i teie mau tupuraa e tauturu ia tatou.—15/4, api 22-24.

• Eaha te tahi mau ravea e au ia faaohipahia no te tauturu i te mau ivi Kerisetiano?

E nehenehe te mau hoa e pûpû mau e ma te hamani maitai i te tauturu. E nehenehe te mau fetii aore ra te tahi atu mau taata e pûpû i te tauturu i te pae moni aore ra i te pae materia, ia hinaaro-mau-hia. E nehenehe atoa te mau hoa Kerisetiano e tauturu na roto i te pûpûraa i te auhoaraa î i te here ma te horoa i te turu pae varua e te tamahanahanaraa.—1/5, api 5-7.

• No te aha mea faufaa ia faaipoipo ‘ia au i te Fatu,’ mai ta te Korinetia 1, 7:39 e aˈo ra?

Ua riro pinepine te mau faaipoiporaa e te mau taata tiaturi ore ei fifi rahi. Hau atu â, e tumu parau o te taiva-ore-raa i te Atua ra o Iehova te peeraa i teie aˈoraa. Ia faaohipa tatou i te Parau a te Atua, eita to tatou aau e faahapa ia tatou. (Ioane 1, 3:21, 22)—15/5, api 20-21.

• I te mea e o Iehova anaˈe te nehenehe e faaore i ta tatou mau hara, no te aha te mau Kerisetiano e faˈi ai i ta ratou mau hara ino i te mau matahiapo i roto i te amuiraa?

Oia, o te faaoreraa o Iehova i te mau hara ino e tia i te hoê Kerisetiano ia imi. (Samuela 2, 12:13) Teie râ, mai te peropheta o Natana o tei tauturu ia Davida, e nehenehe te mau matahiapo paari i roto i te amuiraa e tauturu i te mau taata rave hara e tatarahapa ra. E tuati te haereraa i te mau matahiapo ra i te faaueraa e horoahia i roto i te Iakobo 5:14, 15.—1/6, api 31.

• Eaha te haapapu ra e e tia ia tatou ia aupuru i te mau otare e te mau vahine ivi e ere ra?

Te faaite ra te tuatapaparaa e e tapao teie huru aupururaa o te haamoriraa mau i rotopu i te mau Hebera i tahito ra e te mau Kerisetiano matamua. (Exodo 22:22, 23; Galatia 2:9, 10; Iakobo 1:27) Ua horoa te aposetolo Paulo i roto i te mau Papai i te mau faaueraa papu na te mau Kerisetiano, e aupuru i te mau vahine ivi veve. (Timoteo 1, 5:3-16)—15/6, api 19-11.

• Eaha te ravea e fanaˈo ai i te hoê oraraa oaoa e auraa to te reira?

E tia ia tatou ia faatupu e ia atuatu i te hoê taairaa maitai e o Iehova, to tatou Metua i te raˈi. E tauturu faufaa te haapiiraa i te Bibilia ia na reira tatou.—1/7, api 4-5.

• E varua pohe ore anei to te taata atoa o te ora ˈtu i muri aˈe i te pohe?

Noa ˈtu e te tiaturi ra te tahi mau taata e mea pohe ore te hoê varua, eiaha te hoê nephe, aita te Bibilia e paturu ra i te reira manaˈo. Te faaite ra oia e ia pohe te hoê taata, e hoˈi oia i te repo e aita oia e ora ra. Teie râ, tei te Atua noa te ravea e hoˈi mai ai te ora i roto ia ˈna, tei te Atua ïa te tiaturiraa o te oraraa no a muri aˈe, maoti te hoê tia-faahou-raa. (Koheleta 12:7)—15/7, api 3-6.

• Teihea o Daniela a tamatahia ˈi na Hebera e toru i te vahi papu no Dura?

Aita te Bibilia e parau ra. Peneiaˈe aita o Daniela i faahepohia ia haere mai no to ˈna tiaraa, aore ra e ua haere paha oia no te hoê ohipa haamanahia. E nehenehe râ tatou e tiaturi e aita oia i ofati i to ˈna haapao maitai ia Iehova.—1/8, api 31.