Mau uiraa a te feia taio

Teihea o Daniela a tamatahia ˈi na Hebera e toru i mua i te tii rahi ta Nebukanesa i faatia i te vahi papu no Dura?

Aita te Bibilia e faataa ra i te reira, no reira aita hoê aˈe taata i teie mahana e nehenehe e haapapu teihea o Daniela i taua taime tamataraa ra.

Ua parau vetahi pae e mea teitei aˈe to Daniela tiaraa mana ta Nebukanesa i horoa na ˈna i to Sadaraka, Meseka, e Abede-nego, e no reira aita o Daniela i faahepohia ia haere i te vahi papu no Dura. Te faaite ra iho â te Daniela 2:49 e no te hoê taime, e tiaraa teitei aˈe to ˈna i to to ˈna na hoa e toru. Eita râ ta tatou e nehenehe e haapapu e aita Daniela i putuputu e o vetahi ê i mua i te tii no to ˈna tiaraa.

No te tamata i te faataa teihea o Daniela, ua parau vetahi ê e ua haere paha oia no te hoê ohipa haamanahia aore ra ua maˈihia oia e no reira aita ta ˈna e nehenehe e haere atu. Aita râ te Bibilia e parau ra i te reira. Noa ˈtu râ, eita te haerea o Daniela e nehenehe e faahapahia, mai te peu e tera iho â, papu maitai e e faaohipa te mau tia mana pohehae Babulonia i te reira no te pari ia ˈna. (Daniela 3:8) Na mua ˈˈe e i muri aˈe atoa i teie tupuraa, ua riro mau â o Daniela ei taata o te tapea i te hapa ore, te haapao maitai i te Atua noa ˈtu eaha te fifi ta ˈna i faaruru. (Daniela 1:8; 5:17; 6:4, 10, 11) No reira, noa ˈtu e aita te Bibilia e parau ra no te aha Daniela i ore ai i haere atu i te vahi papu no Dura, e nehenehe tatou e tiaturi e ua riro oia ei taata haapao maitai fati ore i te Atua ra o Iehova.—Ezekiela 14:14; Hebera 11:33.