A ara i te feia tâhitohito!

I teie mahana, ua rahi te mau tohu, e te manuïa nei te ohipa tuatapaparaa i te tau no a muri aˈe. “A piri roa mai ai te matahiti 2000,” o ta te vea ra The Daily Telegraph no Lonedona ïa e parau ra, “te tupu nei te hoê mea matau-ore-hia, e ere râ i te mea maere roa. E mau tausani taata na te ao nei o te ite nei i te mau manaˈo huru ê no nia i te tau no a muri aˈe, e pinepine, e mau manaˈo riaria.” No te feia mataitai e rave rahi, ua riro noa teie anaanatae rahi i te tau no a muri aˈe ei tapiti-faahou-raa o te mau tauiraa i tiaturihia na na mua ˈˈe, aita râ i tupu.

I TE mea e ua rahi mai te mau pereoo hutihia e te mau puaahorofenua i te senekele 19 ra, ua tohu te hoê taata e e apǐ roa te mau oire no Europa i te pae hopea i te mau para puaahorofenua. Parau mau, e mea hape ta ˈna tohu. No reira te vea ra The Times no Lonedona i parau ai, i to ˈna faaiteraa e mea pinepine te mau tohu i te ore e tupu, e: “Te tau no a muri aˈe, o te hoê noa ïa haapueraa para o te puaahorofenua.”

Te tâhitohito nei vetahi i te feia e ite ra i te fifi e tupu i mua. Ei hiˈoraa, ua faatihaehae te hoê orometua haapii i te ohipa tapihoo i te hoê fare haapiiraa tuatoru Marite, i te feia i faaara i te inoraa o te natura, no te parie e e ino roa ˈtu anei. Mai tei tapaohia i roto i te vea ra New Scientist, te parau ra te orometua haapii e “te maitai maira to tatou huru oraraa e e na reira noa tatou e a muri noa ˈtu.”

I roto i te huenaneraa o te mau parau i faahitihia e te mau parau faahapa, e rave rahi o te tiaturi ra e eita te mau mea atoa e taui. Na roto i te tâhitohitoraa i te manaˈo e e ohipa mai te Atua i roto i te mau ohipa a te taata nei, te faaite ra ïa ratou i te hoê haerea mai to te feia tâhitohito i te senekele matamua o to tatou tau.

Ua taui anei te mau mea atoa?

Ua faaara te piti o te rata faauruahia a te aposetolo kerisetiano ra o Petero, tei papaihia i te area matahiti 64 T.T., e: “Ia tae i te mau mahana hopea ra, e itea mai ai te feia tâhitohito [“e ta ratou tâhitohitoraa,” MN], i te haapaoraa i to ratou iho hinaaro.”—Petero 2, 3:3.

Te imi ra te feia tâhitohito i te faariro i ta ratou ohipa tâhitohito ei ohipa arearea. E nehenehe te taata e vare i te tâhitohitoraa e topa i roto i te hoê marei miimii, no te mea te hinaaro pinepine ra te taata tâhitohito e ia farii te feia e faaroo ra ia ˈna, i to ˈna manaˈo. Peneiaˈe e mai teie te huru o vetahi o te feia tâhitohito o ta Petero i faaara, “i te haapaoraa i to ratou iho hinaaro.” I to ˈna faaararaa i te feia e taio i ta ˈna rata, ua faahiti te aposetolo i te hoê huru parau papu maitai. Ua faaara oia i te faraa mai o “te feia tâhitohito e ta ratou tâhitohitoraa.”

Ua uiui taua feia tâhitohito ra o te senekele matamua no nia i te tupuraa mau o “te [vairaa] mai” o te Mesia “i parauhia ra,” i to ratou na ôraa e: “Teihea te [vairaa] mai no ˈna i parauhia ra? te vai noa nei â hoi te mau mea atoa mai te taotoraa mai â o te feia metua ra [i roto i te pohe], mai te hamaniraa mai â i te matamua ra.” (Petero 2, 3:4; MN) O te reira hoi to ratou manaˈo. Tera râ, i te matahiti 33 T.T., ua tohu na o Iesu e e tupu te ati i nia i te oire no Ierusalema. “Te fatata maira hoi te tau,” o ta ˈna ïa i parau, “e haaatihia ˈi oe e to mau enemi i te aua, a haapuni ai ia oe e ati noa ˈˈe, a tapea ˈi ia oe i roto. E e huri hoi ia oe i raro roa i te repo, e to tamarii atoa i roto ia oe na; e e ore roa te hoê ofai i roto ia oe na e vaiihohia i nia iho i te tahi.” Auê te hape o te feia i tâhitohito i taua faaararaa ra! I te matahiti 70 T.T., ua haaati atura te mau nuu Roma ia Ierusalema e ua haamou atura i te oire, e ua haapohe e rave rahi o to ˈna mau taata. No te aha aita te rahiraa o te feia no te oire i vai ineine no teie ati? No te mea aita ratou i ite maite e ua hiˈopoa mai te Atua ia ratou na roto i te arai o ta ˈna Tamaiti, o Iesu.—Luka 19:43, 44.

Te faahiti ra te aposetolo Petero no nia i te ohiparaa mai te Atua Mana hope i mua nei. “E tae mai râ te mahana o [“Iehova,” MN] mai te eiâ,” o ta Petero ïa i faaara. (Petero 2, 3:10) Ia tae i taua mahana ra, e haamou te Atua i te feia paieti ore i nia i te fenua taatoa e e faaora mai oia i te feia e faarirohia ei feia parau-tia. Mai ta teie vea i faataa pinepine na, ua haamata “te vairaa mai” o Iesu Mesia i te matahiti 1914. Area ta ˈna ohipa e faaore roa i te ino ei Mauhaa na te Atua ra, e tupu ïa a muri aˈe. No reira, te tano ra te faaararaa a te aposetolo ia ara i te feia tâhitohito i teie mahana ma te ru rahi atu â.

E mea maoro paha to outou tiai-noa-raa e ia ohipa mai te Atua i roto i te mau ohipa a te taata. Na te aha e tauturu ia outou ia tiai ma te faaoromai, ma te ore e hema i te feia tâhitohito? A taio na ïa i te tumu parau i muri iho.

[Parau iti faaôhia i te api 4]

“Te fatata maira hoi te tau e haaatihia ˈi oe e to mau enemi . . . a tapea ˈi ia oe i roto . . . e e ore roa te hoê ofai i roto ia oe na e vaiihohia i nia iho i te tahi.” E ere teie i te hoê faaararaa te tia ia tâhitohitohia. Ua haamou te mau nuu Roma ia Ierusalema, e ua haapohe e rave rahi taata.