O ta ratou “i rave maite”
“Teie hoi te hinaaro [here] i te Atua, o te haapao i ta ˈna parau.”—IOANE 1, 5:3.
1. Eaha te nehenehe e parauhia no nia i te faito o te here o te Atua?
“E [HERE] TE ATUA.” Te feia atoa o te matau i te Atua e o te auraro i ta ˈna mau faaueraa, e haafaahiahia rahi ratou i taua here hohonu ra. “O te [here] mau teie, e ere râ e na tatou i [here atu] i te Atua, oia râ tei [here] mai ia tatou nei, e ua tono mai i ta ˈna Tamaiti ei taraehara i ta tatou nei hara.” A faatupu noa ˈi tatou i te faaroo i roto i te tusia taraehara faufaa a Iesu, ‘te parahi ra tatou i roto i te here a te Atua.’ (Ioane 1, 4:8-10, 16) E fanaˈo ïa tatou e rave rahi haamaitairaa i te pae varua i teie nei e i roto i te faanahoraa o te mau mea no a muri aˈe, te ora mure ore.—Ioane 17:3; Ioane 1, 2:15, 17.
2. Nafea te apee-maite-raa i te mau faaueraa a te Atua ia haamaitai i ta ˈna mau tavini?
2 E rave rahi mau hiˈoraa i roto i te faatiaraa a te Bibilia no nia i te feia o tei auraro i te mau faaueraa a te Atua e ua haamaitai-rahi-hia ratou ei faahopearaa. Tei roto atoa te mau Ite na mua ˈˈe te tau kerisetiano, no vetahi o ratou ua papai te aposetolo Paulo e: “I pohe anaˈe atura taua feia ra ma te faaroo, aita i noaa tei parauhia maira, ua hiˈo râ ratou i taua mau mea ra i te atea ê, e ua faaroo papu e ua farii maite, e ua faˈi hua e, e taata ěê ratou e te purutia i teie nei ao.” (Hebera 11:13) I muri iho, ua fanaˈo te mau tavini haapao maitai kerisetiano a te Atua i ‘te aroha e te parau mau na roto ia Iesu Mesia.’ (Ioane 1:17) I te roaraa o na 6 000 matahiti aamu taata, ua haamaitai o Iehova i te mau ite haapao maitai o tei auraro i ta ˈna mau faaueraa, e ere mau hoi “i te mea teimaha.”—Ioane 1, 5:2, 3.
I te tau o Noa
3. I roto i teihea tuhaa o Noa i “rave maite” ai?
3 Te parau nei te faatiaraa a te Bibilia e: “No te faaroo hoi to Noa, a faaitehia mai ai oia e te Atua i te mau mea aore â i itea maira, e roohia ihora e te mǎtaˈu, i tarai ai i te pahi ia ora to ˈna fetii; faahapa ihora i to te ao, e riro atura oia ei fatu i te parau-tia e noaa i te faaroo ra.” Ei ‘taata poro no te parau-tia,’ ua auraro maite o Noa i te Atua, ma te faaara i te ao ino na mua ˈˈe i te Diluvi i te haavaraa a te Atua e fatata ra i te tupu. (Hebera 11:7; Petero 2, 2:5) Na roto i te paturaa i te araka, ua apee maite oia i te hohoˈa i horoahia e te Atua. I muri iho, ua haaputu oia i roto te mau animala tei anihia e te mau maa. “Ua na reira hoi Noa i te mau mea atoa ta te Atua i faaue mai ia ˈna ra, o ta ˈna ïa i rave maite.”—Genese 6:22.
4, 5. (a) Nafea te huitaata i teie nei mahana ia faaruru i te hoê mana ino mau? (b) No te aha e tia ia tatou ia “rave maite” na roto i te auraroraa i te mau faaueraa a te Atua?
4 Ua tia ia Noa e to ˈna utuafare ia faaruru i te mana ino o te mau melahi faaroo ore. Ua rave taua mau tamaiti a te Atua ra i te mau tino taata e ua faaea e te mau vahine, fanau mai nei te mau huaai aito o tei hamani ino i te huitaata. “Ua ino roa ra te fenua i mua i te aro o te Atua, ua î te fenua i te parau-tia ore.” Ua afai mai o Iehova i te Diluvi no te haamou i taua ui iino ra. (Genese 6:4, 11-17; 7:1) Mai te tau mai â o Noa aita o Iehova i faatia faahou i te mau melahi ia rave mai i te hoê tino taata. Teie nei râ, “te vai noa nei to te ao atoa i raro aˈe i taua varua ino ra,” te Diabolo ra o Satani. (Ioane 1, 5:19; Apokalupo 12:9) Na roto i te parau tohu, ua faaau o Iesu i te ui orure hau no te tau o Noa i te ui o te huitaata o tei patoi ia ˈna mai te taime mai â a haamata ˈi te tapao no to ˈna ‘vairaa mai’ i te ite-papu-hia i te matahiti 1914.—Mataio 24:3, 34, 37-39; Luka 17:26, 27.
5 I teie nei mahana, mai i te tau o Noa, te tamata nei o Satani i te aratai i te huitaata e te palaneta taatoa i te ati. (Apokalupo 11:15-18) No reira e mea ru mau â e ia faaroo tatou i teie faaueraa i faauruahia e: “A ahu na i te haana tamaˈi atoa a te Atua ra, ia tia ia outou ia patoi atu i te mau ravea paari a te diabolo ra.” (Ephesia 6:11) No te reira, e faaitoitohia tatou na roto i te tamau-noa-raa i te haapii i te Parau a te Atua e te faaohiparaa i te reira i roto i to tatou oraraa. Hau atu, te vai nei ia tatou ra te faanahonahoraa aupuru a Iehova, e ta ˈna “tavini haapao maitai e te paari” i faatavaihia e ta ˈna mau matahiapo here mau, no te haapao ia tatou ma te faaoromai i roto i te eˈa te tia ia tatou ia haere. E tia ia tatou ia rave i te hoê ohipa pororaa i nia i te fenua atoa nei. (Mataio 24:14, 45-47) Mai ia Noa, o tei auraro maite i te mau faaueraa a te Atua, ia “rave maite” tatou i te reira e tia ˈi.
Mose—Te taata haehaa roa ˈˈe
6, 7. (a) Eaha te maitiraa maitai ta Mose i rave? (b) Eaha te huru hiˈoraa itoito mau ta Mose i vaiiho mai no tatou?
6 A hiˈopoa na i te tahi atu taata tei faatupu i te faaroo—o Mose. Ua nehenehe oia e fanaˈo i te oraraa maitai i rotopu i te mau taoˈa unauna no Aiphiti. Ua maiti râ oia i “te rave atoa i te pohe i te amuiraa i te taata no te Atua ra; ia rave i te navenave poto noa o te parau ino ra.” Mai ta Iehova i faaue i ta ˈna tavini, “te haapao maite ra hoi oia i te utua ra ei hoo [e] itoito maite atura oia i te hiˈoraa ˈtu i te Atua, i tei ore e itea ia hiˈo ra.”—Hebera 11:23-28.
7 I roto i te Numera 12:3, te taio nei tatou e: “E mamahu [haehaa] rahi to taua taata ra to Mose, i to te taata atoa o te ao atoa nei.” Ma te huru taa ê, ua ohipa o Pharao mai te hoê o te mau taata teoteo roa ˈˈe. I to Iehova faaueraa ia Mose raua o Aarona ia faaite i ta ˈna haavaraa ia Pharao, eaha ta raua i pahono? Te faaitehia ra ia tatou e: “E ua na reira hoi Mose raua o Aarona i ta Iehova i faaue mai ia raua ra; o ta raua ïa i rave.” (Exodo 7:4-7) Auê hoi hiˈoraa itoito mau no tatou o te faaite nei i te mau haavaraa a te Atua i teie nei mahana!
8. Nafea râ i titauhia ˈi i te mau ati Iseraela ia “rave maite,” e nafea te oaoa i noaa mai e tuea ˈi i te ohipa e tupu i mua nei?
8 Ua turu maite anei te mau ati Iseraela ia Mose? I muri aˈe i to Iehova tairiraa ia Aiphiti i te iva o na ati e hoê ahuru, ua horoa oia na Iseraela i te mau faaueraa atoa no nia i te faatupuraa i te oroa Pasa. “Piˈo anaˈe ihora te mau taata i raro, ma te haamori i te Atua. Haere atura te tamarii a Iseraela, rave atura i ta Iehova i parau mai ia Mose raua o Aarona ra; na reira ˈtura ratou.” (Exodo 12:27, 28) I te tuiraa po o taua rui ohipa roa ra, i te 14 no Nisana, i te matahiti 1513 hou to tatou nei tau, ua haere te melahi a te Atua e haapohe i te mau tamarii matahiapo atoa a to Aiphiti e ua na nia noa râ oia i te mau fare a te mau ati Iseraela. No te aha te mau tamarii matahiapo a te mau ati Iseraela i faaorahia ˈi? No te mea ua ite ratou i te parururaa i roto i te toto o te arenio Pasa, tei paraihia i nia i to ratou mau uputa fare. Ua rave noa ratou mai ta Iehova i faaue atu ia Mose e o Aarona. Oia mau, “i na reira ˈtura ratou i te rave.” (Exodo 12:50, 51) I te Miti Uteute, ua faatupu o Iehova i te tahi atu â semeio na roto i te faaoraraa i to ˈna nunaa auraro a haapohe ai oia ia Pharao e to ˈna nuu puai mau. Auê hoi te mau ati Iseraela i te oaoa e! Hoê â huru atoa i teie nei mahana, e oaoa te rahiraa o tei auraro i te mau faaueraa a Iehova ia riro ei ite no ta ˈna faatitiaifaroraa i Aramagedo.—Exodo 15:1, 2; Apokalupo 15:3, 4.
9. Eaha te mau haamaitairaa no teie nei tau i tohuhia na roto i te ‘rave-maite-raa’ a te mau ati Iseraela no nia i te sekene?
9 I to Iehova aniraa ia Iseraela ia haaputu i te ô e ia patu i te sekene i roto i te medebara, ma te mafatu horoa noa, ua horoa mai te nunaa i to ratou turu taatoa. I roto atoa i te mau tuhaa rii, ua apee o Mose e ta ˈna feia rave ohipa aau tae i te hohoˈa fare i horoahia e Iehova. “Oti roa aˈera taua ohipa sekene ra, i te tiahapa amuiraa ra. Ua rave hoi te mau tamarii a Iseraela i te mau mea atoa a Iehova i parau mai ia Mose ra; na ratou ïa i rave.” Hoê â huru atoa, i te faatahinuraahia te autahuˈaraa, “na reira ˈtura hoi Mose; te mau mea atoa ta Iehova i parau mai ia ˈna ra, o ta ˈna ïa i rave.” (Exodo 39:32; 40:16) I teie tau apî, tei ia tatou te ravea no te turu ma te mafatu atoa i te ohipa pororaa e te mau porotarama no te faarahi i te ohipa a te Basileia. Te reira ta tatou haamaitairaa no te tahoê i te ohipa ma te “rave maite.”
Iosua—Itoito e te puai rahi
10, 11. (a) Na te aha i haamanuïa ia Iosua? (b) Nafea tatou ia haapaarihia no te faaruru i te mau tamataraa no teie nei tau?
10 I to Mose faaueraa ia Iosua e aratai ia Iseraela i te fenua i tǎpǔhia, papu maitai te Parau papai i faauruahia e Iehova e vai ra, o te mau buka noa ïa e pae a Mose, hoê aore ra e piti salamo, e te buka a Ioba. Ua faaue o Mose ia Iosua ia haaputu i te nunaa ia tae ratou i te Fenua Tǎpǔhia e “[ia taio] i teie nei ture i mua i to Iseraela atoa ra ia ite ratou.” (Deuteronomi 31:10-12) Hau atu, ua faaue o Iehova iho ia Iosua e: “Eiaha te buka ture na ia taa ê atu i roto i to vaha, ia haamanaˈo maite oe i te reira i te rui e te ao, ia haapao hua oe i tei papai-atoa-hia i roto ra, ei reira e maitai ai to oe haerea, ei reira oe e manuïa roa ˈi.”—Iosua 1:8.
11 Ua tauturu te taioraa i te mau mahana atoa i te “buka” a Iehova ia Iosua ia faaruru i te mau tamataraa i mua, mai ta te taioraa i te Parau a Iehova i te mau mahana atoa, te Bibilia, e haapaari i To ˈna mau Ite no teie nei tau ia faaruru i te mau tamataraa o teie nei “anotau hopea” fifi mau. (Timoteo 2, 3:1) I te mea e ua haaatihia tatou e te hoê ao haavî, ia haapao tatou i te aˈoraa i horoahia ia Iosua ra: “E faaetaeta, e ia itoito roa; eiaha e mǎtaˈu, eiaha hoi e amiami; tei pihai-atoa-iho hoi to Atua o Iehova ia oe i to mau haerea atoa ra.” (Iosua 1:9) I muri aˈe te haruraahia o Kanaana, ua haamaitai-rahi-hia te mau opu o Iseraela i to ratou tomoraa i roto i ta ratou tufaa. “O ta Iehova i parau mai ia Mose ra, o ta te tamarii a Iseraela ïa i rave.” (Iosua 14:5) Hoê â huru tufaa teie e tiai nei ia tatou paatoa i teie nei mahana, o te taio nei i te Parau a te Atua e o te faaohipa ra i roto i to tatou oraraa, ma te auraro “maite.”
Te mau arii—Haapao maitai e faaroo ore
12. (a) Eaha te faaueraa i horoahia i te mau arii no Iseraela? (b) Eaha te faahopearaa ia ore te mau arii ia auraro?
12 Eaha ïa no te mau arii i Iseraela? Ua faaue o Iehova i te arii ia auraro i teie nei faaueraa: “E i parahi oia i nia i te terono i to ˈna ra basileia, ei reira oia e papai ai i teie nei ture na ˈna iho i roto i te hoê buka, no roto i te buka ture e vai i te feia tahuˈa ra i te ati Levi ra. E ei ia ˈna iho te reira vai ai, e e taio hoi oia e hope noa ˈtu o ˈna pue mahana i te ao nei, ia mǎtaˈu oia i to ˈna ra Atua ia Iehova, e ia haapao i te mau parau atoa o teie nei ture, e teie nei mau haapaoraa ia ravehia.” (Deuteronomi 17:18, 19) Ua auraro anei te mau arii no Iseraela i taua faaueraa ra? Ua hape ino roa te rahiraa, no reira ratou i mauiui ai i te ati i tohuhia i roto i te Deuteronomi 28:15-68. I te pae hopea, ua purara ê o Iseraela “mai te tahi hopea mai o te mau fenua ra e tae noa ˈtu i te tahi hopea o te fenua ra.”
13. Eaha ta tatou e fanaˈo, mai ia Davida, na roto i te faaiteraa i te here no te Parau a Iehova?
13 Teie nei râ, ua faaite o Davida—te arii haapao maitai matamua i Iseraela—i te hoê huru haamoriraa taa ê ia Iehova. Ua riro oia mai ‘te liona apî no Iuda ra,’ o te faahohoˈa ra ia Iesu Mesia, ‘te liona e upootia o te opu o Iuda, te aa o Davida.’ (Genese 49:8, 9; Apokalupo 5:5) Ihea roa i noaa ˈi ia Davida i te puai rahi? Ua haafaahiahia oia i te Parau papaihia a Iehova e ua ora oia ia au i te reira. I roto i te Salamo 19, ‘te hoê himene a Davida,’ te taio nei tatou e: “Te ture a Iehova aita e hapa.” I muri aˈe i te faahitiraa i te haamanaˈo-faahou-raa, i te mau aˈoraa, te faaueraa, e te mau faaotiraa i te pae o te haavaraa a Iehova, te tamau faahou ra o Davida i te parau e: “E taoˈa hinaaro-rahi-hia ïa i to te auro, i te auro rahi ra e te maitatai; e momona rahi ïa i to te meli i te topataraa no roto i te melikerio. Na te reira hoi i haapii mai i to tavini; e tei te haapao i te reira te utua rahi.” (Salamo 19:7-11) Mai te peu e ua riro te taioraa e te feruri-hohonu-raa i te Parau a Iehova ei haamaitairaa a 3 000 matahiti i teie nei, ua hau atu ïa i teie nei nei mahana!—Salamo 1:1-3; 13:6; 119:72, 97, 111.
14. I roto i teihea tuhaa te haerea a Solomona e faaite ra i te faufaaraa ia titau hau atu â i te ite?
14 Teie nei râ, aita e navai noa ia noaa i te ite. Mea faufaa atoa no te mau tavini a te Atua ia ohipa ia au maite i taua ite ra, ia faaohipa i te reira ia au i te hinaaro o te Atua—oia, ia “rave maite.” E nehenehe te reira e faahohoˈahia i te tupuraa a te tamaiti a Davida o Solomona, ta Iehova i maiti no te “parahi i nia i te terono o te basileia o Iehova i nia ia Iseraela nei.” Ua parauhia ia Solomona ia patu i te hiero, ma te faaohipa i te hohoˈa fare tei noaa ia Davida “i te varua ra.” (Paraleipomeno 1, 28:5, 11-13) Nafea o Solomona ia faatupu i taua ohipa faahiahia mau ra? Ei pahonoraa i te hoê pure, ua horoa o Iehova na ˈna i te paari e te ite. E taua mau huru ra, e na roto i te apee-maite-raa i te hohoˈa i horoahia e te varua o te Atua, ua nehenehe o Solomona e patu i taua fare haviti mau ra, o tei î hoi i te hanahana o Iehova. (Paraleipomeno 2, 7:2, 3) I muri iho râ, ua hape o Solomona. I roto i teihea tuhaa? Ua faaue te ture a Iehova i te arii no Iseraela e: “Eiaha hoi oia e faarahi i te vahine na ˈna, ia ore ia taiva tana aau.” (Deuteronomi 17:17) Tera râ, “e hitu hanere a [Solomona] vahine, e hui arii anaˈe, e toru hanere i te vahine tavini, . . . faafariu-ê-hia ihora tana aau e te mau vahine na ˈna, a pee atu ai i te mau atua ěê.” I roto i to ˈna mau matahiti hopea, ua ruri ê o Solomona i te “rave maite.”—Te mau arii 1, 11:3, 4; Nehemia 13:26.
15. Mea nafea o Iosia i “rave maite” ai?
15 Mea iti roa te mau arii faaroo i Iuda, te hopea i rotopu ia ratou, o Iosia ïa. I te matahiti 648 hou to tatou nei tau, ua haamata oia i te faaore i te haamoriraa idolo i roto i te fenua e i te tataˈi faahou i te hiero a Iehova. I reira to te tahuˈa rahi iteraa i “te buka ture a Iehova i papaihia e Mose ra.” Eaha ta Iosia i rave no nia i te reira? “Ua haere ihora te arii, e to Iuda atoa ra, e to Ierusalema, e te mau tahuˈa, e te mau ati Levi, e te taata atoa ra, te feia rarahi e te taata rii, i te fare o Iehova: ua taio ihora oia i te mau parau atoa i roto i taua buka faufaa i itea i roto i te fare o Iehova ra ia ite mai ratou. Te tia noa ra te arii i to ˈna tiaraa, e ua faaau ihora i te faufaa i te aro o Iehova, e e pee oia ia Iehova, e haapao â oia i ta ˈna parau, e ta ˈna haapaoraa, e ta ˈna mau peu, ma te aau atoa, e ma te varua atoa, i te haapao-maite-raa i te parau i te faufaa i papaihia i roto i taua buka nei.” (Paraleipomeno 2, 34:14, 30, 31) Oia mau, o ta Iosia “i rave maite.” Ei faahopearaa o to ˈna haerea haapao maitai, aita ˈtura te haavaraa a Iehova i tupu i nia ia Iuda faaroo ore e tae roa i te mau mahana o ta ˈna mau tamaiti orure hau.
Te oraraa ma te haapao i te Parau a te Atua
16, 17. (a) I roto i teihea tuhaa e tia ia tatou ia apee i te taahiraa avae o Iesu? (b) O vai te tahi atu mau tavini haapao maitai a te Atua o tei horoa mai i te hiˈoraa no tatou?
16 I te mau taata atoa o tei ora aˈenei, te hiˈoraa maitai roa ˈˈe o tei feruri hohonu no nia i te Parau a te Atua e o tei ora ia au i te reira, o te Fatu ïa o Iesu Mesia. Mai te maa ra te Parau a te Atua no ˈna. (Ioane 4:34) Ua parau atu oia i te feia e faaroo ra ia ˈna e: “Eita e tia ta te Tamaiti ia rave oia anaˈe ihora, maori râ o ta ˈna i ite i te Metua i te raveraa ra; te mau mea atoa ta ˈna e rave ra, oia atoa ta te Tamaiti e rave.” (Ioane 5:19, 30; 7:28; 8:28, 42) Ua “rave maite” o Iesu, ma te parau e: “I pou mai nei hoi au mai te raˈi mai e haapao i to tei tono mai ia ˈu nei hinaaro, eiaha to ˈu iho hinaaro.” (Ioane 6:38) O tatou te mau Ite no Iehova, pûpûhia te anihia ra tatou ia “rave maite” na roto i te apeeraa i te taahiraa avae o Iesu.—Luka 9:23; 14:27; Petero 1, 2:21.
17 Mea faufaa roa i roto i te feruriraa o Iesu te raveraa i te hinaaro o te Atua. Ua ite papu oia i te Parau a te Atua e ua ineine atura no te horoa i te mau pahonoraa no roto mai i te mau Papai. (Mataio 4:1-11; 12:24-31) Na roto i te haapao-maite-raa i te Parau a te Atua, e nehenehe atoa tatou ‘e aravihi, e ineine roa no te mau ohipa maitatai atoa ra.’ (Timoteo 2, 3:16, 17) Ia apee na tatou i te hiˈoraa o te mau tavini a Iehova no te tau tahito e no te tau i muri mai e, hau atu â, i te hiˈoraa o to tatou Fatu, o Iesu Mesia, o tei parau e: “Ia ite râ to te ao e, te [here] nei au i te Metua, e te haapao nei au i ta ˈna i faaue mai ia ˈu ra.” (Ioane 14:31) E nehenehe tatou e faaite i to tatou here no te Atua ma te tamau noa i te “rave maite.”—Mareko 12:29-31.
18. Na te aha e faaitoito ia tatou ia ‘riro ei feia rave i te parau,’ e eaha te tuatapapahia i muri nei?
18 A feruri noa ˈi tatou i nia i te haerea auraro o te mau tavini a te Atua no te tau Bibilia, aita anei tatou i itoito no te rave i ta tatou taviniraa haapao maitai i teie nei tau hopea o te amuiraa ino a Satani? (Roma 15:4-6) E tia mau â e ia itoito tatou no te ‘riro ei feia rave i te parau’ i roto i to ˈna auraa taatoa, mai ta te tumu parau i muri mai e tuatapapa.—Iakobo 1:22.
[Hohoˈa i te api 15]
Ua “rave maite” o Noa, o Mose, e o Iosua
Te haamanaˈo ra anei outou?
◻ Eaha te auraa no tatou ‘te here o te Atua’?
◻ Eaha ta tatou e haapii ra na roto i te mau hiˈoraa o Noa, o Mose, e o Iosua?
◻ Ua auraro te mau arii no Iseraela i te “parau” a te Atua i roto i teihea faito?
◻ Mea nafea to Iesu riroraa ei Hiˈoraa no tatou i te ‘rave-maite-raa’?