O vai te ora ˈtu i te “anotau ahoaho”?
“O tei tau i te iˈoa ra ia Iehova, o te faaorahia ïa.”—IOELA 2:32.
1. Ia au i te parau a Daniela e a Malaki, eaha te mea e faataa ê ra i te feia e ora ˈtu i te “tau ahoaho” i mua nei?
MA TE faaite atea i to tatou nei tau, ua papai te peropheta Daniela e: “Ei reira te anotau ahoaho, aita ïa ahoaho mai te tupuraa mai o te fenua ra e tae roa aˈenei i teie nei taime: ia tae hoi i te reira tau e ora ˈi to oe mau taata, te feia atoa i papaihia i roto i te buka ra.” (Daniela 12:1) E parau tamahanahana mau â teie! E haamanaˈo o Iehova i te feia fariihia e ana, mai ta Malaki 3:16 e faaite atoa ra: “I reira te feia i mǎtaˈu ia Iehova i te parau pinepineraa te tahi i te tahi; e ua faaroo maira Iehova, e ua ite, e papaihia ihora te tahi buka manaˈoraa i mua ia ˈna, no te feia i mǎtaˈu ia Iehova, e tei manaˈo i to ˈna ra iˈoa.”
2. Eaha ta te manaˈoraa i te iˈoa o Iehova e faatupu?
2 E aratai te manaˈoraa i te iˈoa o Iehova i te ite papu no nia ia ˈna, ta ˈna Mesia, e te mau opuaraa rahi a to ˈna Basileia. Inaha, te haapii nei to ˈna nunaa i te faatura ia ˈna, i te faatupu i te mau taairaa hohonu e te piri roa e o ˈna, e i te here ia ˈna ‘ma to ratou mafatu atoa e to ratou maramarama atoa e to ratou puai atoa.’ (Mareko 12:33; Apokalupo 4:11) Ua rave o Iehova i te hoê faanahoraa maitai roa, na roto i te tusia o Iesu Mesia, ia noaa te ora mure ore i te feia haehaa o te fenua nei. No reira, e nehenehe ratou e faahiti atoa ma te tiaturi i te mau parau a te nuu o te raˈi o tei arue i te Atua i te taime a fanauhia ˈi o Iesu, i te na ôraa e: “Ia haamaitaihia te Atua i nia i te raˈi teitei, ei hau to teie nei ao, e ia ite auhia mai te taata nei.”—Luka 2:14.
3. Hou te hau e tupu ai i nia i teie fenua, eaha te ohipa te tia ia Iehova ia rave?
3 Ua fatata roa mai teie nei hau i ta te rahiraa o te taata e manaˈo ra. Na mua ˈˈe râ, e tia ia tupu te haavaraa a Iehova i nia i teie nei ao ino. Te faaite ra ta ˈna peropheta o Zephania e: “Ua fatata te mahana rahi o Iehova, te fatata maira, te peepee maira i te haere.” Eaha ïa te huru o taua mahana ra? Te na ô faahou ra te parau tohu e: “O te roo ra o taua mahana o Iehova ra, e ino rahi ïa; e pii hua te feia puai rahi i reira. E mahana riri taua mahana ra, e mahana ati rahi e te mauiui; e mahana pau rahi e te pohe; e mahana pouri e te rumaruma; e mahana ata rahi e te pouri taotao; e mahana no te pu e no te hitimaue no te mau oire i auahia, e te mau pare teitei. E tuu mai au i te ati i te taata nei, e mai to te matapo ra to ratou haere, no te mea ua hara ratou ia Iehova.”—Zephania 1:14-17; hiˈo atoa Habakuka 2:3; 3:1-6, 16-19.
4. O vai i teie mahana o te pahono nei i te titauraa e ite e e tavini i te Atua?
4 Ma te oaoa mau, e mau mirioni i teie mahana o te pahono nei i te titauraa e ite e e tavini i te Atua. No nia i te mau kerisetiano faatavaihia, o tei faaôhia i roto i te faufaa apî, ua tohuhia e: “E ite paatoa hoi ratou ia ˈu, o tei haehaa e o tei rahi, te parau maira Iehova.” (Ieremia 31:34) Na ratou i rave i te upoo i roto i te ohipa pororaa i teie nei tau. E a rahi noa ˈi te feia o te toea faatavaihia o te faaoti nei i ta ratou hororaa i nia i te fenua nei, ua haere mai te “feia rahi roa” o te mau “mamoe ê atu” no te ‘haamori i te Atua i te rui e te ao’ i roto i ta ˈna faanahoraa e faaauhia i te hoê hiero. (Apokalupo 7:9, 15; Ioane 10:16) Tei rotopu anei outou i te feia o te fanaˈo nei i teie hopoia hau aˈe i te maitai?
Nafea ‘te mau mea hinaarohia’ e tae mai ai
5, 6. Hou te mau nunaa atoa e haamouhia ˈi, eaha te ohipa faaoraraa e ravehia ra?
5 E hiˈo anaˈe na i teie nei i te Hagai 2:7, i reira Iehova e tohu ai no nia i to ˈna fare haamoriraa i te pae varua. Te na ô ra oia e: “E na ˈu e faaaueue i te mau fenua atoa, e e tae mai tei hinaarohia e te mau fenua atoa ra: e faaî hoi au i teie nei fare i te hanahana.” Te faaite ra te mau parau tohu a te Bibilia e e tano te parau ra ‘e faaaueue i te mau fenua atoa’ i to Iehova faatupuraa i ta ˈna haavaraa i nia i te mau nunaa. (Nahuma 1:5, 6; Apokalupo 6:12-17) E naeahia te ohipa a Iehova tei tohuhia i roto i te Hagai 2:7 i to ˈna puairaa i te taime e faaueue-roa-hia ˈi te mau nunaa—oia hoi ia haamouhia ratou. Eaha râ no te mau mea “tei hinaarohia [o] te mau fenua atoa ra”? E tia anei ia ratou ia tiai e ia tupu te aueueraa o teie haamouraa hopea e haere mai ai ratou? Eita.
6 Te na ô ra te Ioela 2:32 e “o tei tau i te iˈoa ra ia Iehova, o te faaorahia ïa: ei te mouˈa ra hoi ei Ziona e ei Ierusalema te ora, ta Iehova i parau maira; i roto hoi i te toea taata ta Iehova e parau ra.” Na Iehova e ume mai ia ratou i rapae, e e tau ratou i to ˈna iˈoa ma te faatupu i te faaroo i roto i te tusia o Iesu na mua ˈˈe i te aueueraa hopea o te ati rahi. (A faaau e te Ioane 6:44; Ohipa 2:38, 39.) Ma te oaoa, ‘te haere maira’ te feia rahi hinaarohia ra, tei hau atu i te maha mirioni i teie nei, i te fare haamoriraa a Iehova a tiai noa ˈtu ai i ta ˈna ‘aueueraa i te mau fenua atoa’ i Aramagedo.—Apokalupo 7:9, 10, 14.
7. Eaha tei titauhia i roto i te ‘tauraa i te iˈoa o Iehova’?
7 Nafea teie feia o te ora mai e tau ai i te iˈoa o Iehova? Te horoa maira o Iakobo 4:8 i te hoê faaiteraa i te na ôraa e: “E haafatata ˈtu i te Atua, e na ˈna e haafatata mai ia outou na; E horoi na i to outou rima, e te feia rave hara ra; e tamâ na i to outou aau, e te feia aau piti ra.” Mai te toea faatavaihia o tei rave i te upoo, e tia i te feia e hinaaro ra e riro ei melo no te feia rahi roa o te ora ˈtu i Aramagedo ia ohipa ma te papu. Mai te peu e te hinaaro ra outou e ora ˈtu, e tia ia outou ia inu hua i te Parau tamâ a Iehova e ia faaohipa i ta ˈna mau ture tia i roto i to outou oraraa. E tia ia outou ia faaoti e pûpû i to outou ora na Iehova, ma te faataipe i te reira na roto i te bapetizoraa i roto i te pape. No te tau ia Iehova ma te faaroo, e titau-atoa-hia te faaiteraa i te parau no ˈna. No reira, i roto i te Roma pene 10, irava 9 e te 10, te papai ra o Paulo e: “Ia faˈi hoi to vaha i te Fatu ra ia Iesu, e ia faaroo to aau e ua faatia te Atua ia ˈna i te poheraa ra, e ora ïa oe. O te aau hoi to te taata nei i faaroo, e ia roaa ˈtu te parau-tia; o te vaha hoi tei faˈi i te parau, e ia roaa ˈtu te ora.” I muri iho, i roto i te irava 13, te faahiti ra te aposetolo i te parau tohu a Ioela, ma te haapapu e “o te tiaoro atoa hoi i te iˈoa o Iehova ra, e hope roa ïa i te ora.”
‘A imi, a imi, a imi’
8. (a) Ia au i te peropheta Zephania, eaha ta Iehova e titau ra ia noaa mai te ora? (b) Eaha te faaararaa ta te parau ra “peneiaˈe” i roto i te Zephania 2:3 e horoa maira na tatou?
8 Ia rave tatou i te buka bibilia a Zephania, pene 2, irava 2 e te 3, te taio ra tatou i ta Iehova e titau ra ia noaa te ora: “Aita outou i roohia mai e te riri aa no ǒ ia Iehova, e aore â i tae mai te mahana riri o Iehova i nia ia outou. E imi ia Iehova, e te feia i haehaa i nia i te fenua nei, o tei faatupu i te parau au na ˈna ra; e imi i te parau-tia, e imi i te haehaa: peneiaˈe outou o te faatapunihia ia tae i te mahana e riri ai Iehova ra.” A tapao na i te parau ra “peneiaˈe.” Eiaha ïa e manaˈo e ia ora anaˈe te hoê taata, ua ora iho â ïa oia. Ua taaihia to tatou tapuniraahia i taua mahana ra i to tatou tamau-noa-raa i te rave i teie na mea e toru nei. E tia ia tatou ia imi ia Iehova, ia imi i te parau-tia, e ia imi i te haehaa.
9. Nafea te feia e imi ra i te haehaa ia haamauruuruhia?
9 Mea faahiahia mau te haamaitairaa e noaa mai na roto i te imiraa i te haehaa! I roto i te Salamo 37, irava 9 e tae atu i te 11, te taio ra tatou: “O te feia râ i tiaturi ia Iehova ra, no ratou ïa te fenua. No parahirahi aˈe te paieti ore, e aita ra; . . . Area te feia mǎrû ra, e parahi ïa i te fenua, e oaoa ratou i te rahi o te hau ra.” Eaha ïa no nia i te imiraa i te parau-tia? Te na ô ra te irava 29 e: “E parahi te feia parau-tia i nia i te fenua, e parahi tamau â ratou i reira.” No nia i te imiraa ia Iehova, te faaite maira te mau irava 39 e te 40 e: “Te ora o te feia parau-tia ra, no ǒ ïa ia Iehova ra, oia to ratou etaeta i te anotau ahoaho. E tauturu mai Iehova ia ratou, e e faaora ia ratou i te rima o te paieti ore ra; e faaora oia ia ratou, no te mea te tiaturi ra ratou ia ˈna.”
10. O vai tei haapapu maitai e te patoi ra ratou i te imi ia Iehova e i te imi i te haehaa?
10 Aita te mau pǔpǔ faaroo ěê a te amuiraa faaroo kerisetiano i imi ia Iehova. Ua haapae roa hoi to ratou mau upoo faatere i to ˈna iˈoa hanahana, ma te tumâ roa ia ˈna ma te teoteo i roto i ta ratou mau tatararaa a te Bibilia. Mea au aˈe na ratou ia haamori i te hoê Fatu aore ra te hoê Atua aita to ˈna e iˈoa e e faatura i te hoê Toru Tahi etene. Hau atu, aita te amuiraa faaroo kerisetiano e imi ra i te parau-tia. E rave rahi o to ˈna mau melo o te farii nei aore ra o te turu nei i te mau huru oraraa faatia noa. Maoti i te imi i te haehaa mai ta Iesu i rave, te rave nei ratou i te peu faaiteite, ei hiˈoraa na roto i te afata teata, o te mau taoˈa faufaa e mea pinepine te oraraa taiata. Te monihia nei te mau ekalesiatiko i nia i te tua o to ratou mau nǎnǎ. Ia au i te parau a Iakobo 5:5, ua parahi ratou “i te ao nei ma te navenave, e te taiata.” A fatata mai ai te mahana o Iehova, e ite papu atu ratou i te tanoraa o teie mau parau faauruahia no ratou e: “Aita e faufaa to te taoˈa i te mahana e tupu ai te riri ra.”—Maseli 11:4.
11. O vai te taata hara ra, e nafea to ˈna haapueraa i te hoê utua toto rahi?
11 I te senekele matamua o to tatou nei tau, mai ta te aposetolo Paulo e faaite ra i roto i te piti o ta ˈna rata i to Tesalonia, ua horuhoru roa te manaˈo o te tahi mau kerisetiano, no te mea ua manaˈo ratou e ua tae mai te mahana o Iehova i nia ia ratou. Teie râ, ua faaara ˈtu o Paulo e na mua ˈˈe e tupu te hoê ohipa apotata rahi, e e fa mai “taua taata hara ra.” (Tesalonia 2, 2:1-3) I teie nei senekele 20, e nehenehe tatou e ite i te aanoraa o taua ohipa apotata ra e te hara a te mau faatere a te amuiraa faaroo kerisetiano i mua i te aro o te Atua. I roto i teie mau mahana hopea mai te matahiti 1914 mai â, ua haapue te mau raatira faaroo i te hoê utua toto rahi na roto i te tururaa ˈtu i te tamaˈi. (Ioela 3:10) Ua tamau noa atoa ratou i te haapii i te mau haapiiraa hape, mai te pohe-ore-raa o te nephe taata nei, te vahi tamâraa hara, te haamauiuiraa o te poauahi, te bapetizoraa i te tamarii, te Toru Tahi, e te tahi atu â. Ihea roa ratou e tia mai ai ia faatupu Iehova i ta ˈna haavaraa? Te na ô ra te Maseli 19:5 e: “O tei parau i te parau haavare ra, e ore ïa e ora.”
12. (a) Eaha te mau “raˈi” e te “fenua” taata nei o te fatata roa i te haamouhia? (b) Eaha ta tatou e haapii na roto i te haamouraa o teie nei ao ino e fatata maira?
12 I roto i te Petero 2, 3:10, te taio ra tatou e: “E tae mai râ te mahana o [Iehova] mai te eiâ i te rui ra; e pee ê atu ai teie nei raˈi ma te haruru rahi, e mou hoi te mau mea rii tumu i te veavea rahi, e te fenua hoi e te mau ohipa i nia iho, e pau ïa i te auahi.” E tumâ-roa-hia te mau faatere tia ore o tei parare roa mai te mau raˈi ra i nia i te huitaata nei, e tae noa ˈtu te mau tuhaa atoa o te totaiete taata viivii o teie nei tau, i nia i te fenua o te Atua. Te feia hamani e te feia hoo i te mau mauhaa tamaˈi riaria, te feia eiâ, te feia faaroo haavare e to ratou mau faatere, te feia e turu nei i te peu hairiiri, te haavîraa puai, e te taparahiraa taata—e haamou-pauroa-hia teie mau taata. E tahe ratou i roto i te riri o Iehova. Teie râ, i roto i te mau irava 11 e te 12, te horoa atoa ra o Petero i teie faaararaa i te mau kerisetiano e: “E teie nei, e mou anaˈe taua mau mea atoa nei, mai te aha to outou huru e tia ˈi i te haapao maitai e te paieti; i te tiairaa e te ruraa ˈtu ia tae mai taua mahana o te Atua ra.”
E tia mai o Mihaela no te ohipa!
13, 14. O vai te Taata faatiamâ rahi o te faatereraa a Iehova, e mea nafea oia i te ohiparaa mai te matahiti 1914 mai â?
13 Nafea te taata ia ora mai i te “anotau ahoaho” a Iehova? Te Mauhaa ta te Atua e faaohipa no te faaoraraa o te raatira melahi ïa o Mihaela, teie hoi te auraa o to ˈna iˈoa “O vai mai te Atua?” Ma te tano roa, Na ˈna e faatiamâ i te faatereraa a Iehova, ma te turu ia Iehova mai te Atua hoê roa e te Fatu Mana hope parau-tia o te ao taatoa nei.
14 Te faataa ra te Apokalupo pene 12, irava 7 e tae atu i te 17 i te mau ohipa faahiahia mau no nia i “te mahana o te Fatu” mai te matahiti 1914 mai â! (Apokalupo 1:10) Ua huri te raatira melahi ra o Mihaela i te orure hau ra o Satani mai nia mai i te raˈi i raro i te fenua. I muri aˈe, mai tei faataahia i roto i te Apokalupo pene 19, irava 11 e tae atu i te 16, ‘e taataahi [hoê o tei piihia “te Haapao mau e te Parau mau”] i te neneiraa uaina ra o te hoturaa rahi o te riri o te Atua Puai hope ra.’ Ua mairihia teie aito puai no te raˈi i te iˈoa ra “O te arii o te mau arii, e te Fatu o te mau fatu.” I te pae hopea, te faahiti ra te Apokalupo pene 20, irava 1 e te 2, i te hoê melahi rahi o te huri ia Satani i roto i te abuso e o te tapea ia ˈna i reira e hoê tausani matahiti noa ˈtu. Ma te papu maitai, te faahiti ra teie mau irava atoa i te Taata faatiamâ rahi o te mana arii o Iehova, oia hoi te Fatu ra o Iesu Mesia, ta Iehova i tuu i nia i to ˈna terono hanahana i nia i te raˈi i te matahiti 1914.
15. Na roto i teihea auraa taa ê o Mihaela “e tia mai ai”?
15 Ua “tia” mai o Mihaela, mai te faaitehia ra i roto i te Daniela 12:1, i pihai iho i te nunaa o Iehova mai te tau mai â a faatoroahia ˈi oia ei Arii i te matahiti 1914. Teie râ, fatata roa o Mihaela i te “tia mai” i roto i te tahi auraa taa ê roa—na nia i te tiaraa Mauhaa a Iehova no te faaore i te ino atoa i nia i te fenua nei e ei Faaora i te totaiete o te nunaa a te Atua. Te uˈana o taua “anotau ahoaho” ra, ua faaitehia ïa na roto i te mau parau a Iesu i roto i te Mataio 24:21, 22: “E ati rahi hoi tei te reira tau, aitâ ïa ati mai te matamehai mai o teie nei ao, e tae roa aˈenei i teie nei mahana, e e ore roa hoi a muri atu. Ahiri hoi e haamaorohia taua tau ra, aore roa ïa e taata e ora; e haapotohia ra taua tau ra, no te feia maitihia ra.”
16. O vai te taata e faaorahia i te ati rahi?
16 E nehenehe tatou e oaoa i te mea e e ora mai vetahi mau taata i taua taime ra! Eiaha râ mai te mau ati Iuda orure hau o tei mau i Ierusalema i te matahiti 70 o to tatou nei tau, vetahi hoi tei hopoi-tîtî-hia i Roma. Area ra, te feia o te ora ˈtu i “te tau hopea,” e riro ïa ratou mai te amuiraa kerisetiano o tei faarue ê na ia Ierusalema i te taime a haamata ˈi te haruraa oire hopea. O ratou te riro ei nunaa na te Atua, te mau mirioni taata o te feia rahi roa e tae noa ˈtu te feia faatavaihia o te vai noa mai paha i nia i te fenua nei. (Daniela 12:4) Ua “haere mai [te feia rahi roa] mai roto mai i te ati rahi.” No te aha? No te mea “ua horoi [ratou] i to ratou ahu, e ua teatea, i te toto o te Arenio ra.” Te faatupu nei ratou i te faaroo i roto i te mana taraehara o te toto o Iesu i haamaniihia e te faaite nei ratou i teie faaroo na roto i te taviniraa i te Atua ma te taiva ore. I teie nei atoa, te tapoˈi nei Iehova, “Tei parahi i nia iho i te terono ra,” ia ratou i ta ˈna sekene paruru, a tiai ai e a aratai ai te Arenio, o Iesu Mesia, ia ratou i te mau pape ora pihaa.—Apokalupo 7:14, 15.
17. Mea nafea te feia rahi roa e faaitoitohia ˈi ia ohipa ia nehenehe ratou e faatapunihia i te mahana ahoaho e haere maira?
17 Ma te imi ia Iehova, te parau-tia, e te haehaa, eiaha roa ˈtu te mau mirioni taata o te feia rahi roa ia vaiiho i to ratou here matamua no te parau mau ia toetoe! Mai te peu e tei rotopu outou i teie feia e au i te mamoe ra, eaha ïa te tia ia outou ia rave? Mai tei papaihia i roto i te Kolosa pene 3, irava 5 e tae atu i te 14, e tia ia outou ia ‘haapae i te taata tahito e ta ˈna atoa ra mau peu.’ A imi i te tauturu a te Atua, a tutava i te ‘ahu i te huru taata apî, niuhia i nia i te ite papu.’ Ma te haehaa, a faatupu e a tapea maite i te itoito na roto i te arueraa ia Iehova e te faaiteraa i ta ˈna mau opuaraa rahi ia vetahi ê. E nehenehe ïa outou e faatapunihia i te “tau ahoaho,” i te mahana “e riri ai Iehova ra.”
18, 19. I roto i teihea auraa te faaoromai tamau i riro ai ei ohipa faufaa ia noaa te ora?
18 Ua fatata roa teie mahana! Te haere oioi maira oia. Ua ravehia te haaputuputuraa o te mau melo o te feia rahi roa i roto i te roaraa e 57 matahiti i teie nei. Ua pohe vetahi e te tiai nei ratou i te tia-faahou-raa. Teie râ, te haapapu maira te parau tohu a te Apokalupo e ei pǔpǔ e haere mai te feia rahi mai roto mai i te ati rahi ei pu no te totaiete o “te fenua apî.” (Apokalupo 21:1) Tei roto atoa anei outou? E nehenehe, no te mea ua parau Iesu i roto i te Mataio 24:13: “Area te mau papu e tae noa ˈtu i te hopea ra, oia te ora.”
19 Eita e ore e e haere noa ˈtu te mau fifi e farereihia e te nunaa o Iehova i roto i teie nei ao tahito i te rahi. E ia tupu anaˈe te ati rahi ahoaho ra, e nehenehe outou e farerei i te mau hamani-ino-raa. Teie râ, a ati maite atu ia Iehova e i ta ˈna faanahonahoraa. A vai ara noa! “E tiai mai na râ ia ˈu, te na reira maira Iehova, e ia tae i te mahana e tia ˈi au i nia e rave i ta ˈu i noaa ra; teie hoi ta ˈu parau, e haaputu i te mau fenua, e amui mai i te mau basileia, ia ninii atu vau i ta ˈu nei tahoo i nia ia ratou, i te uˈana atoa o to ˈu nei riri: e pau roa hoi te mau fenua i te auahi ra i to ˈu nei hae.”—Zephania 3:8.
20. A fatata oioi mai ai te “tau ahoaho” rahi, eaha te tia ia tatou ia rave?
20 Ia paruruhia e ia faaitoitohia tatou, ua horoa mai Iehova na to ˈna nunaa i te hoê ‘reo viivii ore,’ oia hoi te poroi rahi no nia i to ˈna Basileia, ‘ia tiaoro ratou i te iˈoa o Iehova, ia tavini ratou ia ˈna tera tapono e tera tapono.’ (Zephania 3:9) A fatata oioi mai ai te “tau ahoaho” rahi, ia tamau noa tatou i te tavini ma te itoito e tia ˈi, ma te tauturu i te feia haehaa ia ‘tau i te iˈoa o Iehova’ ia noaa ia ratou te ora.
Te haamanaˈo ra anei outou?
◻ Eaha te ohipa a Iehova o te tupu na mua ˈˈe i te haamauraa o te hau i nia i te fenua?
◻ Ia au i te parau a Ioela, eaha te tia ia rave ia noaa mai te ora?
◻ Ia au i te parau a Zephania, nafea te feia haehaa ia paruruhia i te riri uˈana o Iehova?
◻ O vai te “taata hara,” e nafea to ˈna haapueraa i te utua toto?
◻ Eaha te faufaaraa o te faaoromai tamau e noaa mai ai te ora?